¹ Emvakwekutsi Jesu atalwe eBhetlehema yaseJudiya ngetinsuku taHerodi inkhosi, tifundziswa letichamuka emphumalanga tefika eJerusalema tatsi, ² ''Uphi lona lotelwe ayiNkhosi yemaJuda? Sabona inkhanyeti yakhe emphumalanga site kutomkhonta.'' ³ Ngesikhatsi iNkhosi Herodi ikuva loku, yakhatsateka , kanye neJerusalema yonkhe. ⁴ Herodi wahlanganisa bonkhe bapristi labakhulu netati temtsetfo, wababuta , ''Utawutalelwa kuphi Khristu?'' ⁵ Batsi kuye, ''EBhethlehema yase Judiya, ngoba loku ngulokwabhalwa ngumphrofethi, ⁶ ''Kepha wena, Bhetlehema, live lakaJuda, awumncane kubabusi bakaJuda, ngoba kuwe kuyawuphuma umbusi lotawelusa bantfu bami baka-Israyeli. ⁷ Ngako -ke Herodi wabita lamadvodza lafundzile ngasese kutowabutisisa sikhatsi lenkhanyeti lebonakele ngaso. ⁸ Wabatfumela eBhetlehema, watsi, ''Hambani nifunisise lomntfwana lomncane. Uma senimtfolile, nibuyise livi kimi khona nami ngitokuta ngitomkhonta. ⁹ Emvakwekuba beve inkhosi, bachubeka nendlela yabo, nalenkhanyeti lebebayibonile emphumalanga yahamba embikwabo yaze yefika yema lapho bekunalontfwana khona lomncane. ¹⁰ Nababona lenkhanyeti, batfokota ngentfokoto lenkhulu. ¹¹ Bangena kulendlu babona lontfwana lomncane ana make wakhe Mariya. Baguca phasi bamkhonta. Bavula emagugu abo bamupha tipho teligolide, nemphepho, nemakha. ¹² Nkulunkulu wabacwayisa ephusheni kutsi bangabuyeli ku Herodi, ngako ke babuyela emuva eveni labo ngalenye indlela. ¹³ Emvakwekuba sebahambile, ingelosi yeNkhosi yavela kuJosefa ephusheni yatsi, ''Vuka, tsatsa lomtfwana lomncane na make wakhe, nibaleke niye eGibhithe. Hlalani lapho ngize ngikutjele, ngoba Herodi utofuna lomntfwana lomncane kutombulala.'' ¹⁴ Ngalobo busuku Josefa wavuka watsatsa lomntfwana lomncane na make wakhe bahamba baya eGibhithe. ¹⁵ Wahlala khona waze wafa Herodi. Loku kwagcwalisa lokwakhulunywa yiNkhosi ngemphrofethi, ''Ngayibita indvodzana yami kutsi iphume eGibhithe.'' ¹⁶ Kwatsi Herodi, kube abone kutsi amyengile lamadvodza lafundzile, watfukutsela kakhulu. Watfumela kutsi kubulawe bonkhe bantfwana labadvuna baseBhetlehema nakuleso sifundza labaneminyaka lemibili budzala nalabangaphasi, kwaya ngendlela yesikhatsi labutisise ngaso kulamadvodza lafundzile. ¹⁷ Kwabese kugcwaliseka lokwakukhulunywe ngemphrofethi Jeremiya, ¹⁸ ''Livi levakala eRama, kukhala nekulila lokukhulu, Rakheli akhalela bantfwabakhe, angavumi nekudvudvutwa, ngoba bebangasekho.'' ¹⁹ Kwatsi kube kufe Herodi, bheka, ingelosi yeNkhosi yavela ngeliphupho kuJosefa eGibhithe yatsi, ²⁰ ''Vuka utsatse lomntfwana na make wakhe uye eveni laka Israyeli, ngoba labo labebafuna imphilo yalomntfwana bafile.'' ²¹ Josefa wavuka, watsatsa lomtfwana na make wakhe, wabuyela endzaweni yaka Israyeli. ²² Kodvwa watsi nakeva kutsi Akhelawusi abesabusa etikwe Judiya endzaweni yababe wakhe Herodi, wesaba kuya khona. Emvakwekutsi Nkulunkulu amucwayise ephusheni, wesuka waya esifundzeni saseGalile ²³ waya wayohlala edolobheni lelibitwa ngekutsi yiNazaretha. Loku kugcwaliseka lokwakhulunywa ngebaphrofethi, kutsi utawubitwa ngekutsi ngumNazaretha.