¹ Jesu waya entsabeni yemincumo. ² Lokwa ngeluvivi waya ethempelini futsi, bonkhe labantfu beta; wahlala phasi wabafundzisa. ³ Babhali kanye nebafarisi baletsa umfati labamkhadza aphinga. Bambeka emkhatsini. ⁴ Base batsi kuye, ' Mfundzisi, lomfati lona utfolakele aphinga. ⁵ Nyalo emtsetfweni, Mose wasiphocelela kutsi sibagcobe ngematje bantfu labanje; utsini ngaye?' ⁶ Basho loku khona batombekela lugibe, khona batoba nalebangambeka licala ngako, kodwa Jesu wagobondzela wabhala phasi ngemunwe wakhe. ⁷ Nabachubeka kumbuta imibuto, wasukuma watsi kubo, ''lokhona lamkhatsini wenu lote sono, akabe wekucala kumjikijela ngelitje.' ⁸ Waphindze wagobondzela, wabhala phasi ngemuno wakhe. ⁹ Nabakuva loku, bahamba ngamunye ngamunye, kwacala labadzala. ¹⁰ Ekugcineni Jesu wasala yedvwa, nalomfati lobekasolo asemkhasini. Jesu wasukuma watsi kuye, 'Mfati, baphi labakubeke licala? Kute lokulahlile?' ¹¹ Watsi 'Kute Nkhosi.' Jesu watsi, ' Nami angikulahli. Hamba ungasoni.' ¹² Jesu waphindze wakhuluma nabo, watsi, 'Ngikukhanya kwemhlaba; loyo longilandzelako angeke ahambe ebumnyameni kodvwa utoba nekukhanya kwemphilo.' ¹³ Bafarisi batsi kuye, 'Uyatifakazela, bufakazi lobungasilo liciniso.' ¹⁴ Jesu waphendvula watsi, "Noma ngitifakazela bami bufakazi buliciniso. Ngiyati langichamuka khona nalapho ngiya khona, kodvwa nine anati langachamuka khona noma lapho ngiya khona. ¹⁵ Nine nehlulela ngekwenyama; Mine angehluleli muntfu. ¹⁶ Kodvwa nangehlulela, kwehlulela kwami kuliciniso ngoba angisingedvwa, kepha nginaBabe longitfumile. ¹⁷ Yebo, futsi emtsetfweni wenu kubhalwe bufakazi bemadvodza lamabili buliciniso . ¹⁸ Nginguye loletsa bufakazi ngami, kanye naBabe longitfumile uyangifakazela.' ¹⁹ Batsi kuye, "Uphi babe wakho?'' Jesu waphendvula watsi, "Anati mine noma babe wami; kube beningati, ngabe niyamati nababe wami." ²⁰ Washo lamagama ngasemphongolweni weminikelo nakasafundzisa ethempelini, futsi kute lowambopha ngoba lihora lakhe lalisengakefiki. ²¹ Waphindze watsi kubo, ' Ngiyahamba, nitongifuna futsi nitawufela etonweni tenu. Lapho ngiya khona, angeke nikhone kuta.' ²² EmaJuda atsi, 'Utotibulala? Ngabe kungako atsi, ' Lapho ngiyakhona angeke nikhone kuta.? ²³ Jesu watsi kubo, "Nibuya phasi; Ngibuya etulu. ²⁴ Ngakoke, ngitsite kini nitawufela etonweni tenu. Ngaphandle kwekutsi nikholwe kutsi NGINGUYE, nitawufela etonweni tenu.'' ²⁵ Base batsi kuye, "Ungubani wena?'' Jesu watsi kubo, "Loko lengikushilo kini kusukela ekucaleni. ²⁶ Nginetintfo letiningi lengifuna kutikhuluma ngiphindze ngehlulele ngani. Kepha ke, loyo longitfumile ucinisile, futsi letintfo lengitivile kuye, letintfo ngitisho emhlabeni wonkhe.'' ²⁷ Abacondzisisanga kutsi abekhuluma kubo ngeYise. ²⁸ Jesu watsi, 'Nase niyiphakamisile INdvodzana yeMuntfu, lapho nitokwati kutsi Nginguye, futsi kute lengikwenta ngekwami. Njengoba Babe angifundzisa, ngikhuluma letintfo. ²⁹ Loyo longitfumile unami, akakangishiyi ngedvwa, ngoba ngihlale ngenta loko lokutsandzeka kuye." ³⁰ Jesu asasho letintfo, labaningi bakholwa nguye. ³¹ Jesu watsi kulawo maJuda labebekakholwe nguye, "Nangabe nihlala evini lami, lapho ke nitabe nibafundzi bami ngeliciniso; ³² futsi nitawulati liciniso, liciniso litanikhulula." ³³ Bamphendvula, "Sisitukulwane sa-Abrahama futsi asikake sibe tigcila tanoma ngangubani; usho kanjani kutsi, "Nitawukhululeka?" ³⁴ Jesu wabaphendvula, "Ngicinisile, ngicinisile, Ngitsi kini, wonkhe umuntfu lowenta sono usigcila sesono. ³⁵ Lesigcila asihlali endlini siphelane; indvodzana ihlala siphelane. ³⁶ Ngako ke, nangabe Indvodzana inikhulula, nitawukhululeka ngeliciniso. ³⁷ Ngiyati kutsi nisitukulwane sa-Abrhama; nifuna kungibulala ngoba livi lami lite indzawo kini. ³⁸ Ngisho loko lengikubonile ngaBabe wami, nani nenta loko lenikuvile kubabe wenu." ³⁹ Baphendvula batsi kuye, "Babe wetfu ngu-Abrahama."Jesu watsi kubo, "Kube benibantfwana ba-Abrahama, ningenta imisebenti ya-Abrahama. ⁴⁰ Kodvwa, nyalo nifuna kungibulala, umuntfu lonitjele liciniso lengilivile ku-Nkulunkulu. Abrahama akakwentanga loku. ⁴¹ Nenta imisebenti yababe wenu. "Batsi kuye, "Asitalelwanga ebugwadleni; sinaBabe munye; Nkulunkulu." ⁴² Jesu watsi kubo, "Kube Nkulunkulu abenguBabe wenu, benitangitsandza, ngoba ngasuka ku Nkulunkulu sengilapha; ngoba angikatiteli nekutitela, kodvwa ungitfumile. ⁴³ Aniwacondzisisi ngani emagama ami? Kungoba aniweva emagama ami. ⁴⁴ NibaSathane, babe wenu, futsi nifuna kwenta tifiso tababe wenu. Abengumbulali kusukela ekucaleni futsi akemi ecinisweni ngoba kute liciniso kuye. Nakacamba emanga, ukhuluma kusukela emvelweni yakhe ngoba ungumcambi manga futsi ngubabe wemanga. ⁴⁵ Kodvwa ngoba ngikhuluma liciniso, aningikholwa. ⁴⁶ Ngubani munye wenu longibeka licala lekona? ⁴⁷ Loyo lowaNkulunkulu uva emavi a-Nkulunkulu, aniweva ngoba anisibo ba-Nkulunkulu." ⁴⁸ EmaJuda aphendvula atsi kuye, "Asisho yini ngeliciniso kutsi ungumSamariya futsi unelidimoni?" ⁴⁹ Jesu waphendvula, "Ngite lidimoni, kepha ngihlonipha Babe wami, nine nihlambalata mine. ⁵⁰ Angitifuneli inkhatimulo yami, munye loyifunako nalowehlulelako. ⁵¹ Ngicinisile, ngicinisile ngitsi kini, loyo logcina livi lami, angeke akubone kufa." ⁵² EmaJuda amphendvula atsi kuye, "Nyalo siyati kutsi unelidimoni. Abrahama kanye nemaprofethi bafa; kodvwa utsi," Loyo logcina livi lami, angeke akuve kufa. ⁵³ Awumkhulu kunababe wetfu Abrahama lowafa, umkhulu? Baprofethi nabo bafa. Utenta kutsi ngubani ke wena?" ⁵⁴ Jesu waphendvula, "Nangitikhatimulisa, inkhatimulo yami ayisilutfo; nguBabe wami longikhatimulisako- lelenitsi nguNkulunkulu wenu. ⁵⁵ Nisengakamati, kodvwa mine ngiyamati. Nangingatsi, "Angimati," ngingafana nani, umcambi manga. Kodvwa ke, ngiyamati futsi ngiyaligcina livi lakhe. ⁵⁶ Babe wenu Abrahama wajabula ngekubona lilanga lami; walibona wajabula." ⁵⁷ EmaJuda atsi kuye, "Usengakabi neminyaka lengemashumi lasihlanu, sowumbonile Abrahama?" ⁵⁸ Jesu watsi kubo, "Ngiciniile, ngicinisile ngitsi kini, angakabikho Abrahama, NGINGUYE." ⁵⁹ Base babutsa ematje batomjikijela ngawo, kodvwa Jesu watifihla wase uyaphuma ethempelini.