¹ Emva kwekufa kwa-Ehudi, bantfu baka-Izrayeli baphindza benta lokubi emehlweni aSimakadze. ² Simakdze wabatsengisa emandleni aJabhini inkhosi emaKhenani lebekabusa eHazo. Umholi wemphi yakhe kwakunguSisera, bekahalala eHaroshethi Hagoyimi. ³ Bantfu baka-Izrayeli bamemeta bacela lusito kuSimakadze, ngoba Sisera bekanetincola tensimbi letingemakhulu layimfica futsi bekacindzetele bantfu baka-Izrayeli ngemandla iminyaka lengemashumi lamabili. ⁴ Nyalo ke Debhora, umprofethikati (umfati waLappidothi), bekasikhulu lesisembili ngaleso sikhatsi ka-Izrayeli. ⁵ Bekavamise kuhlala ngephasi kwelisundvu laDebhora emkhatsini kwaRama neBetheli etintsabeni telive i-Efrayimi, bantfu baka-Izrayeli beta kuye kutocatulula imibango. ⁶ Debhora watfumelela kuBharakhi indvodzana ya-Abhinayomi waseKhedeshi eNafithali. Watsi kuye, ''Simakadze, Nkulunkulu wema-Izrayeli, uyakutfuma, 'Hmba uye eNtsaba Thabhori, uhambe nemadvodza latinkhulungwane letilishumi aNefthali newaZebulun. ⁷ Ngitonikhiphela Sisera, umholi wemphi yaJabhini, kutsi aphume nihlangane ngasemfuleni iKhishoni, netincola takhe nemabutfo akhe, phindze nginivumele nibancobe.'' ⁸ Bharakhi watsi kuDebhora, ''Nawutohamba nami, ngitohamba, kepha nawungahambi nami, ngeke ngihambe. ⁹ Waphendvula watsi, ''Nemambala ngitohamba nawe. Noko kunjalo, lendlela lotoyihamba kute tibongo lototitfola, ngoba Simakadze utokwenta Sisera ahlulekiswe ngumfati.'' Wabese Debhora uyasukuma bayahamba naBharakhi kuya eKhedeshi. ¹⁰ bharakhi wabita emadvodza aZebulun nemaNafthali kutsi ahlangane eKhedeshi. Lishumi letinkhulungwane temadvodza tamulandzela, naDebhora wahamba nabo. ¹¹ Ngaleso sikhatsi Hebha(umkhenani) bekatihlubulile kulamanye emaKhenani-bebasikutulwane saHabhabi(babetala waMozisi)-wafaka lithende lakhe celeni kwe-oak eZananimi dvute neKhadeshi. ¹² Nabatjela Sisera kutsi Bharakhi indvodzana ya-Abhinoyami seyenyukile kuya entsabeni iThabho, ¹³ Sisera wabita tonkhe tincola takhe, lebetingemakhulu lamane, nemabutfo akhe onkhe, kusuka eHaloshethi Hagoyimi kuya emfuleni iKhoshoni. ¹⁴ Debhora watsi kuBharakhi, ''Hamba! Ngoba namuhla ngulelilanga Simakadze latsi lekuncoba Sisera. Akusuye yini Simakadze lokuholako?'' Ngakoke Bharaki wehla entsabeni iThabho nemadvodza latinkhulungwane letilishumi amulandzela. ¹⁵ Simakadze wasanganisa Sisera netincola takhe tonkhe kutsi imphi yakhe ingaboni kahle. Sisera wabese uyehla encoleni yakhe wabaleka ngetinawo. ¹⁶ Kepha Bharaki wagijimisa letincola nalamabutfo aSisera babheka eHaroshethi Haggoyimi, imphi yonkhe yaSisera yabulawa ngetikhali, kute lowasindza. ¹⁷ Kepha Sisera wabaleka ngetinyawo wabalekela ethendeni laJayeli, umfati waHebha umkhenani, ngoba bekunekuvana emkhatsini waJabini inkhosi yaseHazo nesive saHebhe umkhenani. ¹⁸ Jayeli waphuma koyohlangana naSisera wafike watsi, ''Wota, mphatsi wami; wota ngakimi futsi ungesabi.'' Ngakoke weta ngakuye wangena ethendeni laJayeli, Jayeli wamumbonya ngengubo. ¹⁹ Sisera watsi kuJayeli, ''Ngicela ungiphe emanti lamancane ekunatsa, ngoba ngomile.'' Jayeli wamvulela sikhwama selugogo lokuhlala khona lubisi wamuniketa, wabese uyamumbhonya futsi. ²⁰ Sisera watsi kuye, ''Mela ngasekungeneni. Nakunalotako akubute kutsi, ''kukhona yini lokhona lana?', phendvula utsi 'Kute'.'' ²¹ Wabese Jayeli (umfati waHebhe) utsatsa sikhonkwane selithende nesandvo wanyenya wabuyela kuSisera, ngoba bekalele lobudze butfongo adziniwe, Jayeli wabetsela lesikhonkwane eceleni kwebuso saze saphumela phasi emhlabatsini, wafa Sisera. ²² Ngoba Bharaki bekagijimisa Sisera, Jayeli waphuma waya kuye watsi kuye, ''Ngilandzele, ngitokukhomba lendvodza loyifunako.'' Ngakoke wangena naye, phasi kwakulele Sisera afile, nesikhonkwane enhloko. ²³ Ngakoke ngalelolanga Nkulunkulu wancoba Jabhini, inkhosi yaseKhenani, embikwebantfu baka-Izrayeli. ²⁴ Emandla ebantfu baka-Izrayeli akhula akhula kunaJabhini inkhosi yemaKhenani, bate bagcine bamncobile.