¹ Hezekiya watfumela titfunywa kulo lonkhe laka-Israyeli, nelaka-Juda waphindze wabhala tincwadzi atibhalela baka-Epfrayimu nebakaManase, ababema kutsi bete ethempelini laSimakadze eJerusalema kutawugubha liphasika kuSimakadze,Nkulunkulu wema-Israyeli. ² Inkhosi netiphatsimandla tayo kanye nalo lonkhe libandla laseJerusalema bancuma kugubha liPhasika enyangeni yesibili. ³ Babehlulekile kuligumba njengasemihleni, ngobe bebangakeneli baphristi lababetingcwelisile, kantsi nebantfu bebangakahlangani ndzawonye eJerusalema. ⁴ Lelicebo labonakala lilihle enkhosini nakulo lonkhe libandla. ⁵ Bancuma kutfumela lesimemetelo kulo lonkhe laka-Israyeli, kusukela eBherisheba kuye kulakaDani, kumenywa bonkhe bantfu kutsi bete eJerusalema batewugubha umkhosi weliPhasika kuSimakadze, NKulunkulu wema-Israyeli. Lelisuku lalingatange like ligujwe bantfu labanyenti kangaka ngaphambilini njengobe kwakubhaliwe. ⁶ Ngako letigijimi talihamba lonkhe laka-Israyeli nelakaJuda tiphetse tincwadzi letatiphuma kuyo inkhosi nakutiphatsimandla tayo, letatitsi " Nine bantfu baka Israyeli, buyelani kuSimakadze, Nkulunkulu wa-Abrahama, na-Isaka, na-Israyeli ,khona atewubuyela kini nine lenisele ngekuphunyula esandleni semakhosi ase-Asiriya. ⁷ 7 Ningalingisi bobabemkhulu benu nabomnakenu, labangatange betsembeke kuSimakadze Nkulunkulu waboyisemkhulu, ngenca yaloko wabenta baba yinkoyoyo yekuhlupheka njengobe nibona nje. ⁸ ningabi netinhloko letilukhuni njengaboyihlo, kodvwa titfobeni kuSimakadze. Wotani endzaweni lengcwele, layingcwelisile kuze kube phakadze, nikhonte Simakadze Nkulunkulu wenu khona intfukutselo yakhe levutsako ingetikunehlela. ⁹ Ngobe nanibuyela kuSimakadze, labomnakenu nebantfwabenu batawutfola sihawu kulabatfumbi babo, bese bayabuya kulelive. Ngobe Simakadze Nkulunkulu wenu unemusa nebubele, angeke anifulatsele, nanibuyela kuye. ¹⁰ Ngako letigijimi taphuma tangena kuwo onkhe emadolobha aka-Ephrayimu, newaka-Manase kuze kuyewufika kulaka-Zebuloni, kodvwa sive sasiteya sihlekise ngato. ¹¹ Noko lamanye emadvodza aka-Asheri newakaManase, newakaZebuloni atitfoba aya eJerusalema. ¹² Sandla saSimakadze sasisetikwa Juda kutsi sibanike bunye bengcondvo ekwenteni loko inkhosi netiphatsimandla tayo babatsite akwentiwe ngekulandzela livi laSimakadze. ¹³ Kwahlangana lesikhulu sicumbi sebantfu eJerusalema kutawugubha lusuku lwesinkhwa lesingenambiliso enyangeni yesibili ¹⁴ .Basukuma basusa emalati lebekase Jerusalema nawo onkhe emalati emphepho; bawalahlela esigodzini sase Khidroni. ¹⁵ Babese bahlaba lizinyane lemvu yeli-Phasika ngelusuku lwelishumi nakune enyangeni yesibili. Baphristi nemaLevi baba nemahloni base bayatingcwelisa bona baletsa iminikelo yekushiswa ethempelini laSimakadze. ¹⁶ 16 Batsatsa tindzawo tabo, njengobe kubhaliwe encwadzini yemtsetfo yaMosi, umuntfu waNKulunkulu. Baphristi bafafata ingati lababenikwe yona ngemaLevi. ¹⁷ Njengobe linyenti lebantfu lababekulesicumbi bebangakatingcwelisi bona. Ngako ke emaLevi ahlaba emazinyane etimvu eliPhasika egameni labo bonkhe lababengcolile ngekwemtsetfo , kute abangcwelise lamazinyane etimvu kuSimakadze. ¹⁸ Nome linyenti lalabantfu , linyenti labo babephuma kulaka-Efrayimu, nelaka-Manase, nelaka-Isakhari kanye nelakaZebuloni bebangakatihlanti bona cobo lwabo, noko balidla liPhasika ,lokwakuphambene naloko lokwakubhaliwe. Kodvwa Hezekiya wabathandazela watsi "Shangatsi Simakadze lomuhle angabatsetselela bonkhe ¹⁹ labo labatimisele ngenhlitiyo yabo kufuna Nkulunkulu, Simakadze, Nkulunkulu waboyisemkhulu, nome bangakahlanteki njengekusho kwemtsetfo wendzawo lengcwele". ²⁰ Ngako Simakadze wawuva lomthandazo waHezekiya wase uyasiphilisa sive. ²¹ Bantfu baka-Israyeli lababekhona eJerusalema bawugubha loMkhosi weSinkhwa Lesingenambiliso kwadzimate kwaphela e,alanga lasikhombisa kunekujabula lokukhulu. Ema-Levi nebaphristi badvumisa Simakadze onkhe lawo malanga bahlabelela ngemsindvo lomkhulu wetingubhu kuSimakadze. ²² Hezekiya wakhuluma awakhutsata onkhe emaLevi labeyicondza kahle lenkonzo yaSimakadze. Bebadla kuwo onkhe lamalanga lasikhombisa emkhosi, banikela ngeminikelo yebudlelwane badvumisa Simakadze, Nkulunkulu waboyisemkhulu. ²³ Lonkhe lelo bandla lancuma kutsi liwugubhe lomkhosi emalanga lasikhombisa ngetulu futsi bakwenta loko ngekujabula. ²⁴ Hezekiya, inkhosi yaka-Juda, wanika lelibandla tinkunzi letiyinkulungwane netimvu letitinkulungwane letisikhombisa njengemnikelo, kwase kutsi letiphatsimandla tona taletsa kulelibandla tinkunzi letiyinkulungwane netimvu netimbuti letitinkulungwane letilishumi. Baphristi labanyenti batingcwelisa bona matfupha. ²⁵ Lonkhe lelo bandla lakaJuda, nebaphristi nema-Levi nabo bonkhe bantfu lababephuma kulo lonkhe laka-Israyeli, bahlangana ndzawonye nato tonkhe tive lebetiphuma kulo lonkhe laka-Israyeli nalabo lebebahlala kaJuda, bajabula bonkhe. ²⁶ Ngako kwaba nekujabula lokukhulu eJerusalema, ngobe kusukela etikhatsini taSolomoni indvodzana yaDavide, inkhosi yaka-Israyeli bekungakase kwaba nentfo lefanana nalena eJerusalema. ²⁷ Babese baphristi nemaLevi bayasukuma babusisa bantfu. Liphimbo labo lavakala kuNkulunkulu nemkhuleko wabo wafinyelela ezulwini, endzaweni yakhe lengcwele lahlala kuyo.