^{1 2} Ahazi abeneminyaka lengemashumi lamabili budzala nakacala kubusa; wabusela eJerusalema iminyaka lelishumi nesitfupha, Akentanga kahle emehlweni aSimakadze, ³ Ngalokungetiwe watfuncisa imphepho esigodzini sakaBheni Hinomu, futsi wanikela ngemadvodzana akhe kutsi ashiswe ngemlilo, alandzela imikhuba lesinengiso yalesive sakhona Simakadze labesicoshe ngesikhatsi kufika ema-Israyeli. ⁴ Wanikela ngemihlatjelo washisa imphepho etindzaweni letiphakeme nasetulu eticongweni tetintsaba nangephansi kwato tonkhe tihlahla letiluhlata. ⁵ Ngako ke Simakadze Nkulunkulu wa Ahazi wamnikela esandleni senkhosi yema Aramu. Sive semaAramu samehlula, satfumba bantfu bakhe labanyenti, baba titfunjwa beta nabo eDamaseko. Ahazi waphindze wanikelwa esandleni senkhosi yaka-Israyeli leyamehlula kabuhlungu. ⁶ Ngalanga linye nje Phekha, indvodzana yaRemaliya wabulala emasotja akaJuda lanemandla lati 120,000 ngobe phela Juda abesashiye Simakadze Nkulunkulu waboyisemkhulu. ⁷ Zikhri, ingwazi leyayingum-Efrayimu wabulala Maseya, indvodzana yenkhosi, Azrikamu indvuna leyayiphetse sigodlo na-Elkhana labewesibili enkhosini. ⁸ Lemphi yaka -Israyeli yatfumba kuletihlobo tabo bantfu labati 200,000, lokwakubafati nemadvodzana kanye nemadvodzakati. Baphindze bashuba nemphango lenkhulu kakhulu, lababuyela nayo eSamariya. ⁹ Kodvwa kwaku-nemphrofethi waSimakadze, libito lakhe kungu Odedi. Waphuma kuyawuhlangabeta emabutfo, nasabuyela eSamariya. Wakhuluma kuwo watsi "Njengobe Simakadze , Nkulunkulu waboyihlomkhulu abetfukutselele bakaJuda, uvele wabaniketa esandleni senu . Kodvwa nyalo senibabulele ngesihluku lesidzimate sefika ezulwini. ¹⁰ Kodvwa manje senicondze kwenta lamadvodza nalabafati baka Juda nebaseJerusalema kutsi babe tigcili tenu. Kodvwa nine anilahlwa yini licala letono tenu embikwaSimakadze Nkulunkulu wenu? ¹¹ Manje ke asenilalele lapha kimi; Babuyiseleni emuva labomnakenu lesenibente tiboshwa, ngobe intfukutselo yaSimakadze leyesabekako isetikwenu." ¹² Kwase kutsi labanye bebaholi baka-Efrayimu, bo Azariya indvodzana yaJehohanani, naBherekhiya, indvodzana yaMeshilemothi, naJehizkiya indvodzana yaShalumi, naAmasa indvodzana yaHadilayi babhekana nalabo bebefika baphuma emphini. ¹³ Batsi kubo "Akukafaneli kutsi nite naletitfunjwa lapha, ngobe sitawutfolakala sinelicala embikwa Simakadze, Kungabe nicondze kungeta kuletono netiphambuko tetfu, empheleni tiphambuko tetfu tinkhulu, nentfukutselo yakhe leyesabekako seyisetikwa - Israyeli." ¹⁴ lamabutfo avele akhulula letiboshwa nalemphango embikwetindvuna nalo lonkhe libandla. ¹⁵ Emadvodza lamabili akhetfwa ngemabito awo asukuma atsatsa batfunjwa agcokisa bonkhe labo labebangcunu emkhatsini wabo letimphahla letatitsatfwe kulemphango. Babagcokisa babafaka tincabule. Babanika kudla nekwekunatsa., babagcobisa tilondza batsatsa labo lababutsakatsaka babagibelisa etimbongolweni. babancandzekisa bababuyisela emuva kubakubo eJericho, (Lidolobha Lemasundvu). Babese babuyela eSamariya. ¹⁶ Ngaleso sikhatsi inkhosi Ahazi yatfumela titfunywa enkhosini yaseAsiriya kuyawucela usito. ¹⁷ Ema-Edomu abesaphindze efika atewuhlasela bakaJuda, ahamba netitfunjwa. ¹⁸ Kantsi nemaFilisti nawo abesahlasele lamadolobha labengaphansi kwetintsaba naseningizimu yelive lakaJuda. Atfumba adla iBhethi Shemeshi, ne-Ayaloni, neGederothi, neSokho, neThimna, neGimzo kanye nemiti leyayiwatungeletile. Bahamba bayawuhlala kuleto tindzawo. ¹⁹ abesatfobise Juda ngenca ya-Ahazi, inkhosi yaka Israyeli; ngobe wakhutsata kwandza kwebubi kaJuda, wangete wetsembeka ngisho nakancane nje embikwa Simakadze. ²⁰ Thiglathi Phileseri, inkhosi yase-Asiriya, weta kuye kodvwa wamnika kukhatsateka esikhundleni sekumucisisa ngelusito. ²¹ Ahazi watsatsa letinye tetimphahla letiligugugu tasethempelini laSimakadze netasesigodlweni nakutiphatsimandla, watetfula enkhosini yase-Asiriya. Kodvwa kwenta loku akutange sekumusite. ²² Yona leyo nkhosi lengu Ahazi yachubeka nekungetsembeki kwayo embikwa Simakadze ngesikhatsi sekuhlupheka kwakhe. ²³ Wanikela ngemihlatjelo etithicweni tase Damaseko letasetimehlulile. Watsi" njengobe tithico temakhosi aseAramu tiwasitile emaSiriya nami ngitakwenta umhlatjelo kuto khona titangisita." Kodvwa ngito kanye letamwisa taphindze tawisa onkhe ema -Israyeli. ²⁴ Ahazi wabutsela ndzawonye tonkhe timphahla ethempelini laNkulunkulu waticoba taba ticucu. Wavala iminyango yelithempeli laSimakadze futsi watakhela emalati kuwo onkhe emakona etitaladi tase Jerusalema. ²⁵ Kuwo onkhe emadolobha akaJuda wakha tindzawo letiphakeme tekutfuncisela imphepho etithicweni; Wachukuluta Simakadze , Nkulunkulu waboyisemkhulu, kutsi atfukutsele. ²⁶ Leminye yemisebenti yakhe, nato tonkhe tindlela takhe kusukela ekucaleni kuye ekugcineni kubhaliwe etincwadzini temakhosi aka-Juda newaka-Israyeli. ²⁷ Ahaz wakhotsama wafihlwa naboyisemkhulu bamgcwabela edolobheni eJersalema, kodvwa abamletsanga emathuneni emakhosi aka Israyeli. Hezekiya, indvodzana yakhe yaba yinkhosi esikhundleni sakhe.