^{1 2 3} Ngemnyaka welishumi nesiphohlongo wembuso waJeroboam, Abijah wacala kubusa kaJuda. Wabusa iminyaka lemitsatfu eJerusalema; libito lenina kwakunguMacaiah, indvodzakati ya-Uriel waseGibeah. Bekunemphi emkhatsini wa-Abijah kanye naJeroboam. Abijah waya emphini nemphi lenemandla, tingwazi letinesibindzi, 400,000 wemadvodza. Jeroboam wemisa imphi ya 800,000 wemadvodza, netingwazi. ^{4 5} Abijah wena entsabeni iZemaraim, leyiseveni letintsaba ka-Ephraim, wamemeta watsi, ''Lalelani, wena Jeroboam na-Izrayeli wonkhe! Niyati yini kutsi Simakadze Nkulunkulu wa-Izrayeli wanika Davide netitukulwane takhe umbuso waka-Izrayeli phakadze naphakadze ngesivumelwano seluswayi? ^{6 7} Noko Jeroboam indvodzana yaNebat, sisebenti saSolomoni indvodzana yaDavide, wavukela inkhosi yakhe. emadvodza langenamsebenti, nemagwala, ahlanganyela kanye naye Jeroboam. Bavukela Jehoboam indvodzana yaSolomoni, ngesikhatsi Rehoboam asemncane anekusaba, bebanemandla kakhulu kunaye. ^{8 9} Nyalo nihlose kuvukela umbuso waSimakadze losesandleni sesitukulwane saDavide, ngoba niyimphi lenkhulu, nine, kanye nematfole eligolide lakhiwa nguJeroboam kutsi abe bonkulunkulwana benu. Kepha anikabacoshi yini bapristi baSimakadze, situkulwane sa-Aaron, kanye nemaLevi, nase nitakhela benu bapristi ngendlela labanye bantfu benta ngayo kulamanye emave? Lota kutawuba ngumpristi, anikele ngenkundzana kanye netihhanca letisikhombisa, ubese uba ngumpristi waletithico. ^{10 11} Kepha tsine, Simakadze unguNkulunkulu wetfu, futsi asikamulahli. Sinebapristi, besitukulwane sa-Aaron, labasebentela Simakadze, nemaLevi, lasebenta imisebenti yayo. Onkhe emalanga ekuseni nasentsambama bashisela Simakadze iminikelo nemphepho lenuka kamnandzi. Baphindze bahlele sinkhwa etafuleni lelingcwele; banakekela tintsi teligolide tetibane, kutsi tivutse onkhe emalanga ntsambama. Siyayigcina yonkhe imitsetfo yaSimakadze, kodvwa wena soyilahlile. ¹² Lalela, Nkulunkulu unatsi, kanye nebapristi bakhe bakhona nemacilongo labatowakhalisela nine. Madzodzana a-Izrayeli, ningalwi naSimakadze, longuNkulunkulu wabokhokho benu, ngoba ngeke niphumelele.'' ^{13 14 15} Kodvwa Jeroboam walungiselela kubatuma ngumuva; libutfo lakhe lalisembikwaJuda, kanye nelibutfo lekutuma lalingemuva kwaJuda. Ngesikhatsi Juda abuka emuva, betfuka, imphi yayibahlasela ngembili kanye nangemuva. Bakhala kuSimakadze, kanye nebapristi bafutsa emacilongo. Abese emadvodza akaJuda ayamemeta kutsi akuhlaselwe, asamemeta lamadvodza, Simakadze washaya Jeroboam nawo onkhe ema-Izrayeli bekasembikwa Abijah naJuda. ^{16 17 18} Sive saka-Izrayeli sabalekela emaJuda, Nkulunkulu wabanikela etandleni temaJuda. Abijah nemphi yakhe babulala emadvodza lamanengi 500,000 aka-Izrayeli. Kanjalo, sive saka-Izrayeli sehlulwa ngaleso sikhatsi; sive semaJuda sancoba ngoba sasitsembele kuSimakadze, Nkulunkulu wabokhokho babo. ^{19 20 21 22} Abijaha walandzela Jeroboam, wamemuka emadolobha: lidolobha iBheteli netigodzi tayo, kanye ne-Ephron netigodzi tayo. Jeroboam akazange aphindze abe nemandla ngesikhatsi sa-Abijah; Simakadze wamshaya, wafa Jeroboam. Abijah wabese ubanemandla kakhulu; watitsatsela bafati labalishumi nakune watala emadvodzana langemashumi lamabili nakubili kanye nemadvodzakati lalishumi nesitfupha. Lokunye ngemisebenti ya-Abijah, nangekutiphatsa kwakha, kanye nemagama abhaliwe emlandvweni wemprofethi Iddo.