¹ Solomoni indvodzana yaDavide waciniswa embusweni wakhe, naSimakadze Nkulunkulu wakhe bekadze anaye futsi wamenta wabanemandla kakhulu. ² Solomoni wakhuluma ku Israyeli wonkhe, wakhuluma etindvuneni tetinkhulungwane kanye nemakhulu, kanye nebahluleli, nakuyo yonkhe inkhosana ka Israyeli wonkhe, netinhloko tetindlu tabobabe babo. ³ Ngakoke Solomoni nelibandla lonkhe baya endzaweni lephakeme eGibeon ngoba khona kwakunelithende lekuhlanganyela laNkulunkulu lelakhiwa ehlane nguMose inceku yaSimakadze. ⁴ Kodvwa Davide bekadze akhuphule libhokisi laNkulunkulu lisuka eKiriath Jearim aliyisa endzaweni bekadze alilungiselele yona, bekadze alimisele nelithende khona eJerusalema. ⁵ Ngetululu kwaloko, lilati lelitfusi lelalakhiwe nguBhezaleli indvodzana ya-Uri loyindvodzana yaHuri belisolo likhona embikwelithende laSimakadze; ngakoke Solomoni nelibandla baya kulo ⁶ Solomoni wenyuka waya khona kulelilati lelitfusi embikwaSimakadze lebelisethendeni lekuhlanganyela, wanikela tikwalo umnikelo loshisiwe loyinkhulungwane. ⁷ Nkulunkulu wavela ngalobo busuku kuSolomoni watsi kuye, ''Cela! Yini lofuna ngikuphe yona?'' ⁸ Solomoni waphendvula watsi, ''Ukhombe lokukhulu kutsembeka esivumelwaneni kuDavide babe wami, futsi ungente inkhosi esikhundleni sakhe. ⁹ Nyalo-ke Simakadze Nkulunkulu, yenta setsembiso sakho kuDavide babe wami sifezeke ngoba wena ungente ngabayinkhosi tikwebantfu lamanyenti ngatsi lutfuli lwasemhlabeni. ¹⁰ Ngako-ke ngiphe inhlakanipho nelwati kute ngitohola labantfu laba, ngoba ngubani longabusa bantfu bakho labanengi kangaka?'' ¹¹ Nkulunkulu waphendvula Solomoni watsi, ''Ngoba loku bekusenhlitiyweni yakho, futsi ngoba awukaceli bunjinga, nengcebo noma kuhlonishwa, nome kanye nemphilo yalabo labakwenyanyako, nome kanye imphilo lendze, kodvwa uticelele inhlakanipho nelwati kuze utokhona kubusa bantfu bami lengikubeke kutsi ube yinkhosi yabo, loku ngulengitokwenta. ¹² Nyalo ngitokunika inhlakanipho nelwati. Futsi ngikunike nengcebo, nebunjinga kanye nenhlonipho lengazange ibekhona etinkhosi ngembili kwakho, futsi emvakwakho kute leyoba nako.'' ¹³ Ngako-ke Solomoni wefika eJerusalema asuka lendzaweni lephakeme leseGibeon, asuka embikwe lithende lekuhlangana; Solomoni wabusa ka-Izrayeli. ¹⁴ Solomoni wabutsisa tincola nemahhashi lanebagibeli, abenetincola letingu 1,400 kanye nebagibeli labangu 12,000 labekadze akubeke emadolobheni ekubeka tincola, naletinye kanye naye njengenkhosi eJerusalema. ¹⁵ Inkhosi yenta lisiliva neligolide kwadvuma eJerusalema njelukhetse, wenta nemisedari yadvuma njengetihlahla temkhiwa letisetindzaweni letiphasi. ¹⁶ Kutsengwa kwemahhashi atsengelwa Solomoni bekalandvwa eGibhithe naseKuwe, batsengisi benkhosi bebawatsenga eKuwe ngentsengo. ¹⁷ Batsenga incola eGibhithe ngemashekeli langu 600 esiliva, nelihhashi ngemashekeli langu150. Bebaphindze bawatfumele emakhosini emaHithi nema -Aramini.