¹ Macondzana nemnikelo losita labangcwele, njengoba ngayala emabandla aseGalathiya, yentani njalo nani. ² Njalo-nje elangeni lekucala evikini, akube ngulowo nalowo alondvolote loko lokumlingene, kuze kutsi iminikelo ingentiwa nasengikhona. ³ Nase ngifikile, labo lesenibakhetsile ngitabatfumela kanye netincwadzi tekubetfula, bamikise letipho tenu telutsandvo eJerusalema. ⁴ nangabe kufanele kutsi nami ngihambe, ngiyawuhamba kanye nabo, batewungipheketela. ⁵ Ngitawufika lapho kini sengendlule eMasedoniya, ngobe ngifuna kwendlula khona kucala. ⁶ Mhlawumbe ngingadzimate ngihlale lapho kini kuze kwendlule nabusika, kute nitongisita ekuchubekeni kwami, nome kukuphi lapho ngiya khona. ⁷ Phela angifisi kunibona kwamanje ngitakwendlula nje, Ngoba ngetsemba kutsi ngitawufike ngihlale lapho sikhatsi , iNkhosi nayivuma. ⁸ Kepha ngitawuhlala e-Efesu, kudzimate kufike lilanga lePhentekhoste. ⁹ Ngobe litfuba lekusebenta lingivulekele, noko, banyenti labemelene nami. ¹⁰ Nakufika Thimothi lapho kini, nibocaphelelisisa kutsi nimemukele, ativele asekhaya, ngobe wenta msebenti weNkhosi, njengami. ¹¹ Ngako-ke kubete lomedzelelako, nimelekelele nase abuya ngekuthula, nase eta kimi. Ngobe ngimbhekile kanye nebazalwane. ¹² Macondzana nemzalwame Apholosi ngamcela kakhulu kutsi ete kini kanye nebazalwane, kepha bekungasiyo intsandvo yakhe kutsi ete nyalo, noko utawuta nase sikhatsi sikahle. ¹³ Lindzani nisime ekukholweni, nibe ngemadvodza, nicine. ¹⁴ Konkhe lenikwentako nikwente ngelutsandvo. ¹⁵ Bazalwane, niyati kutsibakaStefanasi baba bekucala kubase-Akhaya kuphendvuka nekutsi batimisele ngekukhonta bantfu baNkulunkulu labangcwele. Ngiyanicela ke, bazalwane, ¹⁶ nibatfole labanjalo nabo bonkhe labasebentisana batikhandla kanye natsi. ¹⁷ Ngiyatfokota ngekufika kwaStefanasi, naFothunatusi, na-Akhayikhusi, ngobe bayanimelela noma ningekho. ¹⁸ Ngobe bawuhlumelele umoya wami newenu; ngako-ke, bahlonipheni labanjalo. ¹⁹ Emabandla ase-Asiya ayakhonta kini nonkhe. Bo-Akhwila naPhrisila bakhonta kakhulu kini eNkhosini, kanye nelibandla lelikhontela endlini yabo. ²⁰ Nebazalwane bonkhe bayakhonta kini. Bingelelanani ngekwangana lokungcwele. ²¹ Nako-ke kukhonta kwami mine Pawula ngesandla sami. ²² Nangabe ukhona longayitsandzi iNkhosi akabe ngulocalekisiwe. Wota Nkhosi yetfu! ²³ Umusa weNkhosi yetfu Jesu awube nani. ²⁴ Lutsandvo lwami alube nani nonkhe kuKhristu Jesu.