¹ Ake ucabange nje kutsi ngikhuluma ngetilimi tebantfu netingelozi, kepha ngite lutsandvo, ngifanana nensimbi lebabanga umsindvo nelitfusi lelikhencetako. ² nome ngingaphrofetha ngati timfihlakalo tonkhe, nelwati lonkhe, nome nginekukholwa lokukhulu kangangekutsi ngingagudlula tintsaba, kepha nangite lutsandvo, angisiyontfo yalutfo. ³ Nome ngingephana ngako konkhe lenginako ngondle timphuya, nome futsi nginganikela ngemtimba wami kutsi ushiswe, kodvwa nangite lutsandvo, akungisiti ngalutfo. ⁴ Lutsandvo luyabeketela, futsi lumnene, lute umona, lutsandvo alutigabatisi, futsi alutikhukhumeti. ⁵ Lutsandvo alutiphatsi ngalokungakafaneli, alutifuneli kwalo, alucansuki, alunamagcubu, ⁶ alukujabuleli lokubi, kodvwa lujabulela liciniso. ⁷ Lutsandvo lubeketelela tintfo tonkhe, lukholwa tintfo tonkhe, lwetsemba tintfo tonkhe, lukhutsatelela tintfo tonkhe. ⁸ Lutsandvo alusoze luphele; kepha nome kukhona kuphrofetha, kuyawuphela; nome kukhona tilimi, tiyawuphela. ⁹ Ngobe sati incenye, futsi siphrofetha incenye; ¹⁰ kepha nasekufike lokuphelele, loko lokuyincenye kuyawuphela. ¹¹ Ngesikhatsi ngingumntfwana ngakhuluma buntfwana, ngacabanga kwebuntfwana, ngacondza kwebuntfwana. Ngesikhatsi sengiyindvodza ngakuyekela kuntfwanata. ¹² Ngobe nyalo sibona esibukweni kaluvitsi, kodvwa ngale siyawubukana buso nebuso. Nyalo ngati lokuncane, kepha ngale ngiyawukwati ngalokuphelele, njengobe ngatiwa ngalokuphelele. ¹³ Kutsatfu lokuyawuhlale kumile: kukholwa, kwetsemba, nelutsandvo. Kodvwa lokukhulu kunako konkhe lutsandvo.