^{1 2} Kwatsi ngesikhatsi Davide atikhibikele endlini yakhe, watsi kuNathan umprofethi, ''Buka la, ngihlala endlini lecinile, kepha libhokisi lesivumelwano saSimakadze lihleti ethendeni. Wabese Nathan utsi kuDavide, ''Hamba, wente lokusenhlitiyweni yakho, ngoba Nkulunkulu unawe.'' ^{3 4 5 6} Kepha ngalobo busuku lefika livi laNkulunkulu kuNathan, latsi, ''Hamba utjele Davide incuku yami, 'Simakadze utsi: Ngeke ungakhele indlu lengitohlala kuyo. Ngoba angikake ngahlalala endlini solo ngakhipha ema-Izrayeli eGibhithe kute kube kunyalo. Kepha, solo ngihlala ethendeni, nasemathebanekelini, nasetindzaweni letahlukahlukene. Kutotonkhe tindzawo lengihambe kuto ka-Izrayeli wonkhe, kukhona yini lengake ngakusho kubaholi ba-Izrayeli, lengabakhomba mine kutsi beluse bantfu bami, ngatsi, ''Anikangakheli ngani indlu yami lecine njenge ceda?''' ^{7 8} Nyalo ke, tjela inceku yami Davide, 'Naku lokukhulunywa nguSimakadze wetingilozi: Ngikutsetse emadlelweni, ulusa timvu, kute utoba yinkhosi yebantfu bami baka-Izrayeli. Ngibe nawe yonkhe indzawo loye kuyo phindze ngajuba tonkhe titsa takho embikwakho, futsi ngitokwentela ligama, lelifana nemagama lamakhulu alabo labakhona emhlabeni. ^{9 10} Ngitokhomba indzawo yebantfu bami baka-Izrayeli ngibahlanyele kuyo, kute batewuhlala endzaweni yabo bodvwa bangasahlushwa. Ngeke bantfu labakhohlakele basabacindzetela, njengoba bebenta itolo, njengoba bekwentiwa ngetikhatsi lapho bengibeke khona tindvuna tiwebantfu bami baka-Izrayeli. Ngitobese ngikwenta ubuse tonkhe titsa takho, ngyakutjela ngitsi mine, Simakadze, ngitokwakhela indlu. ^{11 12} Kutokwenteka kutsi ngesikhatsi sakho semalanga sekaphelele kutsi songaya kuboyihlo, ngitovusa situkulwane sakho emvakwakho, ngitoniketa yena bukhosi. Nguye lotawukungakhela indlu, ngitomisa sihlalo sakhe sebukhosi phakadze naphakadze. ^{13 14 15} Ngitakuba ngubabe kuye, naye abe yindvodzana yami. Ngeke ngimemuke sivumelwano sami sekutsembeka kuye, kanjengoba ngasitsatsa kuSawula, lobekabusa embikwakho. Ngiyakumbeka tikwendlu yami nasebukhosini bami phakadze naphakadze, nesihlalo sakhe sebukhosi sitakuma phakadze naphakadze.''' Nathani wakhuluma naDavide amutjela onkhe lamagama, futsi wamutjela ngasosonkhe lesambulo. ^{16 17 18} Wabese Davide inkhosi uyahamba uyohlala embikwaSimakadze; wabuta watsi, ''Bengingubani mine, Simakadze Nkulunkulu, nemundeni wami bewuyini, kutsi ungihole kwate kwaba lapha? Ngoba konkhe loku kubonakala kukuncane emehlweni akho, Nkulunkulu. Sokhulume nangelikusasa lendlu yenceku yakho, wangikhomba netitukulwane letitako, Simakadze Nkulunkulu. Bekuyini lokunye lengingakwenta, mine Davide, ngitsini kuwe? Uyiphakamisile inceku yakho. Uyincomile inceku yakho ngalokwehlukile. ¹⁹ Simakadze, ngenca yenceku yakho, kute utogcwalisa inhloso yakho, utente tonkhe letintfo letinhle kuveta yonkhe imisebenti yakho lemikhulu. ²⁰ Simakadze, kute lonjengawe, futsi kute lomunye Nkulunkulu ngaphandle kwakho, njengoba besihlale siva. ²¹ Ngoba bobani sive emhlabeni lesifana nebantfu bakho baka-Izrayeli, wena, Nkulunkulu, wabakhulula eGibhithe njengebantfu bakho, kutakhela libito lakho kutsi libe likhulu nemisebenti yakho lemangalisako? Wasusa tive embikwebantfu bakho, lobakhiphe eGibhithe wena. ^{22 23 24} Wente Izrayeli sive sakho phakadze naphakadze, phindze wena, Simakadze, waba nguNkulunkulu wabo. Ngakoke nyalo, Simakadze, shengatsi lesetsembiso losentile mayelana nenceku yakho nemndeni wayo singema phakadze naphakadze. Yenta njengobe ukhulumile. Shengatsi libito lakho lingema phakadze naphakadze libe likhulu, kute bantfu batotsi, 'Simakadze wetingilozi unguNkulunkulu wa-Izrayeli,' nendlu yami, mine Davide, inceku yakho ime embikwakho. ^{25 26 27} Ngoba wena, Nkulunkulu wami, sotivetile encekwini yakho kutsi utomakhela indlu. Kungako mine, inceku yakho, ngatfola litsemba lekuthantaza kuwe. Phindze wena, Simakadze, unguNkulunkulu, wente lesitsembiso lesi lesihle encekwini yakho. Kukutfokotisile kubusisa indlu yenceku yakho, kute ichubeke iphile phakadze naphakadze embikwakho. Wena, Simakadze, uyibusisile, futsi iyohlala ibusisekile.''