¹ Abe onkhe ema-Israel ahlanganyela naDavid eHebron atsi kuye, ''Buka, tsine siyinyama nematsambo akho. ² Esikhatsini lesendlulile Saul bekayinkhosi kitsi, bekunguwe bohola imphi yetfu. Simakadze longuNkulunkulu wakho watsi kuwe, ''Wena utoba ngumelusi webantfu baka-Israel, futsi utoba yinkhosi yebantfu bami baka-Israel.'' ³ Ngakoke tonkhe tikhulu ta-Israel teta enkhosini eHebron, David wenta sivumelwano nato embikwaSimakadze. Bagcooba Davide kutsi abe yinkhosi ya-Israel. Ngalena ndlela, livi laSimakadze lebekakadze akhulunywe nguSamuel agcwaliseka. ⁴ David na-Israel baya eJerusalem (lokuyiJebus). EmaJebusites, takhamuti tendzawo, betikhona. ⁵ Takhamuti taseJebus tatsi kuDavid, ''Ngeke ungene lana.'' Kepha David wayitsatsa incaba yaseZion, lokulidolobha laDavid. ⁶ Davide bekakadze atse, ''Nobe ngubani lotohlasela kucala emaJebusites utoba yindvuba yemphi.'' Ngakoke Joab indvodzana yaZeruiah yahlasela kucala, bamenta indvuna. ⁷ Wabese Davide uhlala khona kulencaba. Ngakoke bayibita ngelidolobha laDavid. ⁸ Walakha lelidolobha latungeletela iMillo nangemuva kwelubondza lolutungeletele.Joab wakha kabusha lelidolobha. ⁹ David wabanemandla kakhulu kakhulu ngenca yekutsi Simakadze wemabandla bekanaye. ¹⁰ Leti bekutindvuna taDavide, letatimeseka David embusweni wakhe, nawo onkhe ema-Israel, kumenta inkhosi, nekuhlonipha livi laSimakadze mayelana nema-Israel. ¹¹ Lolu luhla lwetingwazi taDavide: Jashobeam, indvodzana yemHakmonite, bekuyindvuna yemabutfo. Jashobeam wabulala emakhulu lamatsatfu emadvodza ngesikhali sakhe emphini yinye. ¹² Jashobeam alandzelwa ngu-Eleazar indvodzana yaDodo, lebekangum-Ahohite, lebekangulomunye waletingwazi letintsatfu. ¹³ Bekakanye naDavid ePas Dammin, lokwahlanganyela khona emaPhilistines alungela imphi, lapho khona bekunensimu yebarley nelibutfo laka-Israel lawabalekela emaPhilistines. ¹⁴ Bema emkhatsini wensimu. Bayivikela bajuba onkhe emaPhilistines naSimakadze wabavikela ngekubancobisa lokukhulu. ¹⁵ Babese labatsatfu labayincenye yaletindvuna letingemashumi lamatsatfu behlela phasi edvwaleni keDavid, emhomeni wase-Adullam. Imphi yemaPhilistines beyente inkambu esigodzini saseRephaim. ¹⁶ Ngaleso sikhatsi David bekasencabeni yakhe, umhome, ngesikhatsi emaPhilistines akha inkambu yawo eBethlehem. ¹⁷ David besekome kakhulu watsi, ''Nakungaba nemuntfu nje longangiletsela emanti ekunatsa esiyalweni saseBethlehem, kulesiyalo lesingasesangweni!'' ¹⁸ Ngakoke letingwazi letintsatfu tahlasela taphuma emkhatsini wemphi yemaPhilistines tawakha emanti esiyalweni saseBethlehem, siyalo lesisesangweni. Tatsatsa lamanti taya nawo kuDavid, kepha Davide wala kuwanatsa. Esikhundleni sekunatsa, David wawatsela kuSimakadze. ¹⁹ Wabese utsi David, ''Akuvumi kutsi ngingakwenta loku embikwaNkulunkulu! Ngingayinatsa yini ingati yalamadvodza lebekabeke timphilo tawo engotini?'' David wala kuwanatsa. Lena bekuyimisebenti yaletingwazi letintsatfu. ²⁰ Abishai umnakaboJoab bekangumholi waletingwazi. Wake wabulala ngesikhali sakhe emakhulu lamatsatfu emadvodza. Wadvuma kanye naletingwazi letintsatfu. ²¹ Kunalaba labatsatfu, Abishai wadvunyiswa ngalokuphindvwe kabili wentiwa indvuna yaletingwazi, lite nome Abishai bekangabalwa nalaba labatsatfu. ²² Benaiah lebekayindvodzana yaJehoiada bekangumbutfo lotetsembako waseKabzeel, lowenta imisebenti lemikhulu. Wabulala lamadvodzana lamabili a-Ariel waseMoab. Waphindze wangena emgodzini wabulala libhubezi ngelilanga kwehla sitfwatfwa. ²³ Wabulala ngisho nemGibhithe, indvodza lengemamitha lamabili budze. LomGibhithe bekaphetse sikhali lesifana neliplango lekutfungela, kepha bamushaya ngendvuku kuphela. Beniaiah watsatsa lesikhali esandleni salomGibhithe wamugwaza ngaso. ²⁴ Benaiah indvodzana yaJehoiada yenta lobuchawe lobu, naye wabitwa kanye naletingwazi letintsatfu. ²⁵ Yena bekahlonishwa kakhulu kunalelibutfo lelingemashumi lamatsatfu, kepha bekangadvunyiswa kufana njengaletingwazi letintsatfu. Noko kunjalo Davide wamenta umholi walabo labamgadzako. ²⁶ Letingwazi temabutfo bekubo-Asahel umnakaboJoab, na-Elhanan indvodzana yaDodo waseBethlehem, ²⁷ naShammoth umHarorite, naHelez umPelonite, ²⁸ na-Ira indvodzana ya-Ikkesh umTekoite, na-Anathothite, ²⁹ naSibbekai umHushathite, na-Ahohite, ³⁰ Maharai umNetophathite, naHeled indvodzana yaBaanah umNetophathite, ³¹ na-Ithai indvodzana yaRibai waseGibeah situkulwane saBenjamin, naBenaiah umPirathonite, ³² naHurai wasesigodzini saseGaash, na-Abiel um-Arbathite, ³³ na-Azmaveth umBaharumite, na-Eliahba umShaalbonite, ³⁴ nemadvodzana aHashem umGizonite, naJonathan indvodzana yaShagee umHararite, ³⁵ na-Ahiam indvodzana yaSakar umHararite, na-Eliphal indvodzana ya-Ur, ³⁶ naHepher umMekerathite, na-Ahijah umPelonite, ³⁷ naHezro umCarmelite, naNaraai indvodzana ya-Ezbai, ³⁸ NaJoel umnakaboNathan, naMibhar indvodzana yaHagri, ³⁹ naZelek um-Ammonite, naNaharai umBerothite (lebekaphatsa tikhali taJoab indvodzana yaZeruiah) ⁴⁰ na-Ira um-Ithrite, naGareb um-Ithrite, ⁴¹ na-Uriah umHittite, naZabad indvodzana ya-Ahlai, ⁴² Na-Adina indvodzana yaShiza umReubenite nalabanye labangemashumi lamatsatfu benaye, ⁴³ Hanan indvodzana yaMaakah, naJoshaphat umMithnite, ⁴⁴ na-Uzzia um-Ashterathite, naShama naJeiel emadvodzana aHotham um-Aroerite, ⁴⁵ NaJediael indvodzna yaShimri, naJoha (umnakabo longumTizite), ⁴⁶ na-Eliel umMahavite, naJeribai naJoshaviah emadvodzana a-Elnaam, na-Ithmah umMoabite, ⁴⁷ na-Eliel, na-Obed naJaasiel emaMezobaite.