¹ EmaPhilistines alwa nema-Israel. Yonkhe indvodza yaka-Israel yawabalekela emaPhilistines bayikuwa entsabeni iGilboa. ² EmaPhilistines abagijimisa abalandzela dvute boSaul nemadvodzana akhe. EmaPhilistines abulala Jonathan, na-Abinadab, naMalki-Shua, emadvodzana aSaul. ³ Lemphi yashuba kuSaul, nalabadubula ngebutjoki bamkhandza Saul, bamubeka emanceba. ⁴ Saul wabese utsi kulona lomphatsela tikhali takhe, ''Khipha inkemba yakho ungihlabe ngayo. Ngale kwaloko, batofika labantfu labangakasoki bangigcilale.'' Kepha lona lebekamphatselentikhali takhe bekangeke akhone kukwenta, ngoba bekesaba kakhulu. Ngakoke Saul watsatsa inkemba yakhe watiwisela kuyo. ⁵ Ngesikhatsi lona lomphatsela tikhali takhe abone kutsi Saul ufile, naye watiwisela enkembeni yakakhe wafa. ⁶ Ngakoke Saul wafa nemadvodzana akhe afa, ngakoke indlu yakhe yonkhe yafa yafela ndzawonye. ⁷ Ngesikhatsi onkhe emadvodza aka-Israel esigodzini abona kutsi akhonile kubaleka nekutsi Saul nemadvodzana akhe bafile, bashiya emadolobha abo babaleka. Abese emaPhilistines ayeta ahlala kuwo lamadolobha. ⁸ Kwatsi ngelilanga lelilandzelako, ngesikhatsi emaPhilistines eta kutohlubula tidvumbu, batfola Saul nemadvodzana akhe bafele entsabeni iGilboa. ⁹ Bamkhumula Saul bajuba inhloko yakhe batsatsa netikhali takhe. Batfumela titfunywa kuyoyonkhe iPhilistia kumemetela letindzaba kubonkulunkulwana babo nasesiveni sabo. ¹⁰ Babeka tikhali taSaul ethempelini labonkulunkulu babo, phindze bakhungela sikobho sakhe ethempelini laDagon. ¹¹ Ngesikhatsi Jabesh Gilead wonkhe eva konhe bekwentiwe ngemaPhilistines kuSaul, ¹² libutfo lonkhe laphuma layotsatsa sidvumbu saSaul naleto temadvodzana akhe batibuyisa eJabesh. Bawangcwaba ematsambo abo ngephasi kwesihlahla bazila emalanga lasikhombisa. ¹³ Ngakoke Saul wafa wafela sento sakhe lasenta ngekungatsembi Simakadze. Saul akayilandzelanga imiyalo, kepha wacela kululekwa ngumuntfu lokhuluma nalabafile. ¹⁴ Akakufunanga kululekwa nguSimakadze, ngakoke Simakadze wambulala wase uniketa David indvodzana yaJesse umbuso.