¹ Amulange, mumazuba alya enako ilya, ndakupilusizya buzike boku Juda oku Jelusalemu, ² ndiyobunganya masi onse, ape okubeta kunyika yoku Jehoshaphat. Ndiyobabeteka bonse kunu, akambo kabantu bangu olunyungu lwa Isilayeli, oyo ngubakatantamuna akati kamasi, ape akambo kokuti bakabanya nyika yangu. ³ Bakapanga bantu bangu kuba bazike, kucincanya musyiani omuhule, ape okuzya mwanakazi owani kuti bakolwe. ⁴ Ino, ninzi wandinywemena mebo, Tyre, Sidon ape ecisi ca Philistia? ino uyondibbadela? nikuba kuti uyondibbela, ndiyokupilusizya mukufwambana. ⁵ Kambo wakandibwezela siliva engolide, ape wakandetela zintu zibotu mutempele yako. ⁶ Wakauzya bantu boku Juda abo ku Jelusalemu kuma Giliki, mukuti babe kule omunyika yabo. ⁷ Langa, ndilabasala, kuzwa kucibaka cimwakabauzya, ape ndiyopilusizya cikoloti. ⁸ Ndiyouzya bana benu balumi abanakazi, kwindila amanza abana Juda. Bayobauzya kubana Sabeans, kucisi cilikule, kambo Mwami wamba.'' ⁹ Amwambile masi: ''Amulibambile kukondo; amubunganye balumi bapati; amubaleke baze afwifwi; amuleke balumi bonse baze kunkondo. ¹⁰ Amume zikekele zyenu kuti zibe masabule entimba zyenu kuti zibe masumo. Amuleke batakwenguzu bambe, 'Ndilidiide.' ¹¹ Amufwambane kamuza, nonse nomasi ali afwifwi; amubungana antomwi awa. Mwami, eta ansi balwani bapati. ¹² Leka masi alibusye ape okuza kunyika ya Jehoshaphat. Kambo oko ndiyokala okubeteka masi alafwifwi. ¹³ Amubike mucibikilo, kambo butebuzi bulafwi. Koza, sina busansa, kambo zipangilo zyawani zilizwide. Zibikilo zyafusuka, kambo bubi bwabo mbupati.'' ¹⁴ Kulicongo, conga munyika yobubetezi. Kambo buzuba bwa Mwami buli afwifwi munyika yobubetezi. ¹⁵ Izuba omwezi zyasiya bbi, inyenyezi tazimwekisi. ¹⁶ Mwami uyongolola kuzwa ku Zion, mponya okongololisya kuzwa ku Jelusalemu. Ijulu enyika ziyozungana, kono Mwami uyoba ngomwevule wa bantu bakwe, ape uyoba ciyubilo cobwanda kubantu ba Isilayeli. ¹⁷ ''Mponya muyoziba kuti ndime Mwami Leza upona mu Zion, mulundu wangu usalala. Mponya Jelusalemu uyoba usalala, mponya basimwenda tabayokozi kutimbula mumo ape. ¹⁸ Ciyosika mubuzuba obo milundu nuyokunka wani ilwela, tulundu tukunka amalili, tonse tulonga mu Juda tuyokunka amanzi, ape akasensa kamanzi kayokunka kuzwa kuna'nda wo Mwami okutilila nyika ya Shittim. ¹⁹ Ijipiti iyoba nyika itakali bantu, ape Edom iyoba nkanda itakali bantu, akambo kenkondo wakacitwa kubana Juda, kambo bakatila boluwa butakwe cibi munyika yabo. ²⁰ Kono Juda uyozula ape, mponya Jelusalemu uyozula kulunyungu olu mane kulunyungu luza. ²¹ Ndiyobalwanina akambo kobulowa mbundatakalwanina, Kambo Mwami ulapona mu Zion.''