¹ Lizya lwija lwe mbelele mu Zion, ape ulizye amulundu wangu usalala! Leka bantu bonse bakala omo munyika bayowe, kambo buzuba bwa Mwami bwabuza; masimpe, bulafwifwi. ² Mbuzuba buyosya bomundima, buzuba bwamayoba ape okusiya. mbuli mpaso zyamwakila amulundu, mabunga amabunga abalwani abuza. Takwe nikwali mbunga mbuli eyi, ape takwe nikuciyoba, kusika mane kukasike lunyungu lumwi. ³ Mulilo ulikunyonyona zyonse zili kunembo, ape kufuta kwateni mulilo ulikutenta. Inyika ilimbuli gadeni ya Eden kunembo kwateni, kono kusule kwateni kuli nkanda inyonyondwe. Masimpe, takwe ciyofutuka. ⁴ Imbunga yabalwani ili mbuli mahosi, ape azuza mbuli basikwaezya. ⁵ Adula econgo mbuli kuti cikocikala cilatala lyomulundu, ape kuvwika mbuli kuti mulilo ulikutenta munda, ape mbuli kuti nimbunga lyabalwani baya kunkondo. ⁶ Zyalibonya bantu balanyema ape amenso abo kulacica. ⁷ Zizuza mbuli balwani bapati; zilatanta bwanda mbuli balwani; zilendela amwi, ape buswana, ape tazizwi mumulaini. ⁸ Takwe olo womwi utonta mwezinyina; zilendela atomwi, njaya mumulaini; zilazunda nkondo kono tazizwi mumulaini. ⁹ Zilafwambanina mumasi, zilazuza kubwanda, zilatanta mumanda, ape zilanjila apulungwido mbuli bebbi. ¹⁰ Inyika elazungana kunembo lyabo, ijulu lyayowa, izuba omwezi zyasiya, ape enyenyezi zyaleka kumweka. ¹¹ Mwami waongololo kunembo lya balwani bakwe, kambo balwani bakwe mbanji; kambo balenguzu, abo basilila malailele akwe. Kambo buzuba bo Mwami mbupati ape mbubi. Nguni unga wacikozya? ¹² ''Olo ino''-Mwami mbwamba-''Amupiluke kulime emyoyo yenu yonse. Mukufwambana, lila, ape mulile.'' ¹³ Amuyaule myoyo yenu noti buyo zyibiya, mponya mupiluke kuli Mwami Leza wenu. Kambo ulabulemu anguzu, amucesye mukunyema ape mujatisyane muluyando ape musosoloke mukwepwa. ¹⁴ Nguni uzi? kuti na ulacica okulekelela, ape ukusiya cileleko musule lyakwe, cipo ce mbuto ape ecipo cokunywa ku Mwami Leza wenu? ¹⁵ Lizya lwija lwe mbelele mu zion, amupange buzuba bokulimya kulya, ape mupange buzuba busalala bokusyangana. ¹⁶ Amubunganye bapati; amubunganye bana aba nini. Amuleke sikukwata azwide anze, ape ukwata. ¹⁷ Amuleke mupaizi, muzike wa Mwami, lila akati kamajililo etempele acipalilo. Amuleke bambe, ''Amubaleke bantu benu, Mwami, ape mutapangi lukono muzintu, kutegwa masi atamusanyi. ino balamba nzi akati kamasi, 'Ino Leza wabo ulikuli?''' ¹⁸ Mponya Mwami; waliyandide okubafwida luse bantu bakwe. ¹⁹ Mwami wakataba bantu bakwe, ''Langa, Ndiyomutuma ape, wani ipya, ape amafuta. Muyokuta azizyo, ape siyomusulaiki akati kamasi. ²⁰ Ndiyomutalusya kubalwani bokumbo, ape ndiyozigwisya okuzitola kunyika njumu ilikule. Bokusanguna ndiyobatola kunyika lyokulwizi, ape bamwi kujwe. Mibili iyofunduluka, ape ecinuko cibi ciyovwika.'' Masimpe, wacita zintu zipati. ²¹ Mutayowi, nyika; amubotelwe okunonenywa, kambo Mwami wayociti zintu zipati. ²² Mutayowi, nywebo noba nyama bomusaka! kambo nyika yomunkanda eyomena, misamu iyozyala micelo, ape emisamu yemisansa emwi ziyozyala micelo minji. ²³ Amubotelwe, nobantu boku Zion, okukondwa mu Mwami Leza wenu. Kambo uyoita mvula mpati mbuli mbucakambwa okweta tufafalizi twe mvula kulinywe, imvula mpati mbuli cindi. ²⁴ Awo avulwida kuyozula buyo esenke, ape ezibikilo zyamafuta ziyozula. ²⁵ ''Ndiyo mupilusizya ezyo zyonse zyakaligwa empaso-mpaso zipati, impaso zyibi, ape empaso zyinyonyona-imbunga wabalwani pati njindakatu akati kenu. ²⁶ Muyolya zinji ape okukuta, okulumbaizya zina lyo Mwami Leza wenu, oyo wacita zibotu akati kenu, ape siyoiti muswabisyi. ²⁷ Muyoziba kuti ndili akati kabana Isilayeli, ape kuti ndime Mwami Leza wenu, ape takwe umwi, ape takwe nindiyo swabisya bantu bangu. ²⁸ Ciyosika kuti mane ndikatile muya wangu ku nyama yonse, ape bana benu balumi abanakazi wayo sinsima. Bapati bayolota ziloto; bana basyimani bayobona zilikunembo. ²⁹ Ape kubabelesi ababelesi banakazi, mumazuba ayo ndiyotila muya wangu. ³⁰ Ndiyotondezya zyibiliko kujulu anyika, malowa, mulilo, ape omusumpululu wobusi. ³¹ Izuba liyosanduka kuba mundima ape mwezi kuba malowa, kakutana kusika buzuba bubi bo Mwami . ³² Coyoba kuti oyo yonse wita zina lya Mwami uyofutulwa. Kambo amulundu wa Zion oku Jelusalemu kuyoba zila yokuzwida, mbuli Mwami mbwakamba, ape akati kabasikukozya, abo Mwami mbakaita.