¹ Ngaya majwi a Mozesi ngakambila ba Isilayeli bense kutala lya Jodani munkanda, mukuti lyomulonga wa Jodani munkanda kulangana o Sufi, akai ka Palani, Tofeli, Lbbani, Hazeloti, o Dizahabu. ² Kuli musizo wamazuba ali kumi obumwi kuzwa ku Holebu kwinda kucilundu ca Seili kuyosika ku kadesi Baliniya. ³ Kwakacitika mumwaka wamakumi one, mumwezi wakumi akomwi, mubuzuba butanzi bomu mwezi, Mozesi wakambola bana ba Isilayeli, kubambila zyense Mwami zyaka mulailila kujatikizya mbabo. ⁴ Eci cakacitika Mwami kazundide kale Sihoni Mwami waba Amoliwakakede ku Hesiboni, o Ogi Mwami wa Basana, wekede ku Asitaluti oku Ediyeli. ⁵ Mutala lya Jodani, munyika ya Mowabbu, Mozesi wakatalika kwambilalizya kupandulula, kuti, ⁶ ''Mwami Leza wesu wakatwambila ku Holebu, kuti, 'mwakala cindi cilafu mucilundu eci. ⁷ Amunyamuke mubweze musizo wenu, mwiki kucilundu comunyika yoku Amoli omumasena alikufwifwi okuya munkanda yo mulonga wa Jodani mukuti, munyika ye zilundu, mubusena bulansi, mu Negeve, o kunkomwe yo lwizi nyika yaba Kenani, aba Lebanoni kusikila kumulonga mupati wa ba Yufuletisi. ⁸ Amubone ndabika nyika kunembo enu: amujile mwivube nyika eyo Leza njakakonkezya kuli bamauso benu ba Abbulahamu, ba Izaka aba Jakobu kuti abape njiyo bo oku lunyungu lwabo musule lyabo. ⁹ Ndaka mwambila kucindi eco, kuti, 'nsikonzyi kumwendelezya endike. ¹⁰ Mwami Leza wenu wamuvwuzya, mponyina, amulange, sunu mulibanji mbuli nyenyezi zyokujulu. ¹¹ Mwami, Leza waba mauso benu, amuvuzye zindi zili culu kwinda mbomubende sunu, okumupa colwe, mbuli mbwaka musyomezya! ¹² Pele ino ninga mebo endike ndakonzya buti kuyumuna mukuli wenu, makatazyo enu, okumubeteka mumanyongwe enu? ¹³ Amusale balumi bacenjede, banvwisisya abalumi balemekwa kuzwa kumusyobo womwi womwi, ndibabike kuti babe basololi benu.' ¹⁴ Mwakanditaba okuti, ''cintu ciwamba cibotu kulindiswe kucicita.' ¹⁵ Mponyina ndakabweza basololi be misyobo yenu, bantu basongo, a bantu balobulemu, okubabika kuti babe basololi benu, bapati bezyulu, bapati bemyanda, bapati benkamu zyamakumi oswanwe, bapati bamakumi, a basolozi, musyobo o musyobo. ¹⁶ Ndakalailila babetesi benu kucindi eco, kuti, 'Amuvwe kulila kuli akati kaba zyalwananyina benu, okubeteka kabotu akati komuntu o mwananyina, omwenzu ukala anguwe. ¹⁷ Tamwelelde kutondezya kusalolana kuli umwi mukubeteka; muyomvwa kubanini oku bapati. Mutakayowi ciso co muntu, kubetaka kukwa Leza. Enkani zimukacila, mundetele, mponyina ndilanvwa.' ¹⁸ Ndakamwambila kucindi eco nciconya zintu zyense nzimwelede kucita. ¹⁹ Twakanyamuka kuzwa ku Hovebu mponyina twakainda akati kenkanda impati iyosya njimwakabona, munzila iya kunyika ye zilundu zyaba Amoli, mbuli Mwami Leza wesu mbwaka tulailila; mponyina twakasika ku Kadesi Baliniya. ²⁰ Ndaka mwambila kuti, ',wasika kuzilundu zyaba Amoli, eci Mwami Leza wesu njatupa. ²¹ Amubone, Mwami Leza wenu wabika nyika kunembo lyenu; kamuya mukainvube, mbonyina mbuli Mwami, Leza waba mauso, mbwaka mwambila; mutayowi nenga kutyompwa.' ²² Nywebo nwense mwakasika kuli mebo okwamba kuti, 'Atusangune kutuma balumi kunembo lyesu, kuti bakalangelange nyika, okuzotwambia nzila njetwelede kutola kuyolwana, ape eminzi cituyosika. ²³ Muzezo oyo wakandi botela; ndakasala balumi bali kumi ababili akati kenu, muntu womwi kumusyobo umwi aumwi. ²⁴ Bakanyamuka bainka kuzilundu, basika kukuti lya Esikolo, okulangalanga nkuko. ²⁵ Bakabweza imwi micelo yenyika mumanza abo okweta kuliswebo. Mponyina bakatwetela majwi okuti, ' nyika eyi nimbotu njatupa Mwami Leza wesu.' ²⁶ Nikuba namu mwakaka kubalwana, pele mqakapapila malailile a Mwami Leza wenu. ²⁷ Mwali kutongoka muzivuka zyenu okuti, '' akambo kokuti Mwami ulimusulaikide ncencico cakatugwisizya munyika ya Ijipiti, kuti azotwabe mumanza aba Moli kuti batumane kutujaya. ²⁸ Ino tulayinka kuli? banama bacita kuti myoyo yesu ityompye, kuti, aba bantu mbapati, ape mbalafu kwinda swebo; minzi yabo mipati ape iliyakilidwe alunkwankwa lusika kujulu; nikuba namu, twakababona bana ba Anaki okuya.''' ²⁹ Mponyina mebo ndaka mwambila kuti, mutazungani, nenga kubayowa. ³⁰ Mwami Leza wenu, ulamuzulwida, ulamulwanina, mbonyina mbwakamu citila mu Ijipiti kuneso enu, ³¹ o mwakacita munkanda, oko kumwakabona mbuli Mwami Leza wenu mbwaka mubweza, mbonyina mbuli muntu mbwalele mwanakwe, kufumbwa kumwali ngwinda mane okusika okuno.' ³² Pele nikuba ndakamba manjwi aya mwakakala kusyoma Mwami Leza wenu, ³³ oyo waka muazwulwida munzila kuyo muyandweda busena bokuyaka zilao, mumulilo cindi camasiku o mumayoba cindi cesikati. ³⁴ Mwami wakanvwa manjwi enu wakanyema; wakakonka okuti, ³⁵ 'Masimpe takwe naba womwi wabantu aba bomusela oyu mubi uyobona nyika mbotu eyo njindaka syomezya kupa kuli basikale benu, ³⁶ Ati kalebi mwana wa Jefune. Nguyobona nyika eyo mponyina ndiyomupa olunyungu lwakwe nyika njakasyata mumo, nkambo wasyoma kucilila Mwami. ' ³⁷ Mwami wakandi nyemena amibo akambo kenu, okuti, ' Ayibo toyonjili munyika eyo; ³⁸ Josyuwa mwana wa Nuni, mugwasyi wako, nguyonjila mulinjiyo; komuyumya, nkambo nguyozwuluda ba Isilayeli mukuyoikona. ³⁹ Mpampawo, bana benu banini, abo mbomuti bayojatwa abasi nkondonyoko, abo sunu batazi cibi ecibotu mbayonjila omuya; kulibo njoipa, mponyina bayoivuba. ⁴⁰ Pele nywebo, amupiluke mwike munkanda kunzila yokulwizi lusalala.' ⁴¹ Mponyina mwakanditaba okunditi, 'twakabisizya Mwami,; tulainka okuyolwana, mponyina tulacilila zyense ezyo Mwami Leza wesu mbwaka tulailila kuti tucite.' Mwalumi wense akati kenu abike zilwanisyo zyakwe zye kondo, mponyina mulibambile kuyolwana abe zilundulundu. ⁴² Mwami wakati kulime, 'Bambile, ''Mutasoli kubayosya ape mutasoli kulwana, nkambo mebo nsikoyoba ambabo, mponyina muyozundwa aba sinkondo nyoko.' ⁴³ Ndaka mwambila munzila eyi, pele nywebo takwe nimwandi swilila. Mwakazangila malailile o Mwami; mukuli kankaizya kwenu mwakainka kuyolwana kuzilundu lundu. ⁴⁴ Mponyina ba Amoli, bakande omo muzilundu lundu, bakeza kuzomulwana okumutanda mbuli zonki, okumukoma mu Seili, mane kusikila mu Homa. ⁴⁵ Mwaka pilika okulila kunembo lyo Mwami; pele Mwami takwe nakaswilila njwi lyenu, nenga kumubikila mano. ⁴⁶ Mponyina mwakakala buyo ku Kadesi mazuba manji, mbonyina mbwakabede mazuba enu okukala nkuko.