¹ Mbumu kame una kufuka mwanaa Sione no mukati ni likumbielibaka no kutina. Kuwaba kwa Isilaele nu kutundisa kuwilu ni kuukondela bashi. Kasipuluka sipula nama lyatelo no makondo aye mu liywa lya kutweba kwaye. ² Mbumu na kushandola mundi yoshe ya Jakobo kasikatwa simba simweya. Mumaywa akutina nakushandola mundi ni makwakwa no mwanaa juda no mukati; na kwikwiseza bashi nakushwaula mubuso ni akwambuyu awo. ³ Nakucola maata no Isilaelile mu kutweba kunene kwaye. Naku kwisa likaa lyaye no silyo balubala no sila. Nakucina Jakobo kwanyi mulilo no lubya ushandola okunoku. ⁴ Nakuobamisa wuta waye kwanyi sila, na kuolola likaa lyaye no silyo kwanyi oyu alwa. Na kwibaa oshe ana kumuwabeliswa mutende no mwanaa Sione no mukati; na kwitela kutweba kwaye kwanyi mulilo. ⁵ Mbumu nakufeka kwanyi sila. Nakumina Isilaele. Nakushandola tindoo toye toshe no umbumu. Nakushandola mindi yaye no mumakwakwa. Nakushangela kuena kunena ni kulila kwa mwanaa Juda no mukati. ⁶ Nakusinya taberbakele yaye kwanyi litema. Nakushandola sibaka no makonganelo. Minya-upilo na kupalamisa Sione mikiti ni tisabata, kakuli na kushwaula mbumuni muprisita libaka no kutweba kwa kutina kwaye. ⁷ Mbumu nakukana aletare yaye na kutimba ndoo no kukena yaye. Nakuba makwakwa no silelzo kwa tindoo no umbumu mumakaa no ila. Ni yonyene ila na ikutenda lilata mu ndooo no minya-upilo, omo kuna tendelwa liywa no mukiti. ⁸ Minya-upilo nakuyambuta kushandola makwakwa no mundi wa mwanaa mukati no Sione. Nakuolola muhala no kulikanyeza kame kasiusa likaa lyaye mukushandola makwakwa ni yuba yae no kulwa. Nakutingenya mukuena; bamweya nati kusinyeha. ⁹ Lyatuliso yaye neikutotobela mumumbu; nakushandola ni kucala ipakiso yaye ya mwelo. Mbuwawaye ni makwambuyu aye nakucitelwa kwa anu, kakwisa mulao ni apolofita aye kawana tipono kwa minya-upilo. ¹⁰ Akulu no mwanaa mukati no Sione kama aikalile bashi a ondokile. Na okutukulela lukuungu ku mitwimyoo akucoletile masaka. Akatana no Jerusalema nakwineka miwi yoo bashi. ¹¹ Amiyo ange kamabwa libaka no mioti; mila yange kame inyungana; nyoko yange kame ibwela bashi kakuli mwanaa sicaba no mukuti aama ni anyonyo na siyamwa seli akwela mu mapetelo no mundi. ¹² Seli aibanguta anyina nji, '' okoili ndima ni waine?'' Aamba alemine kukwela mu mapatelo no mundi, kwanyi kama ama kuholofazwa, upilo owo kame utunda mukaci koo ni kubanena ba ifuba no anyina owo. ¹³ Nisike nita okupakela naso? Nisike sani kufekise naso, wene mwanaa Jerusalemu no mukati? Nisike nito kufekisa naso, nji ni kuongote mucima wene mwalanji no Sione? kakuli sikelela sowe ni sakuneba kwanyi liwate. Anyine so kubalisa? ¹⁴ Mapolofita owe naku monene tipono no maya ita weebo. Kasi monahaza uyi owe nji okuyoyise kwa uyo ikalile mu ubika, kono nakumonene eyino upolofita no maya ni ya nji mukaniwe. ¹⁵ Aabita mu ndila oshe kama kwashela makaa aba ku mona. Kama soma ni kunyungela mwanaa Jerusalemu no mukati mitwi ni kwamba nji, '' Okame mundi ama kwisana aanu nji, kuwaba kunene,' ni nji kuwabelwa kwa litunga lyoshe'?'' ¹⁶ Lla yowe kame ikuyatulela tunwa twawo kwawene. kutweba ni kukweca maeo mukutina ni kwaamba nji, '' Natukumumina mbuu! Lyokame liywa tuna kutatela natuku bita mo ni kulimona!'' ¹⁷ Minya-upilo natende esana kufumba. Nakutenda sambo awa kuyambuta mumaywa no kukale. Nakukwisi nambulwa lineke, kakuli nakutwesa kuwabeliswa ila yowe; Na kuongota maata no ila yowe. ¹⁸ Mumicina yoo kama lilela kwa mbumu, lukwakwa no mwanaa Sione no mukati! Witeke miyoti kwanyi lweeti munji ni usiku. Ulese kupumula, ulese kumulisa a miyo owe. ¹⁹ Inguka, ulile mu usiku, kumatatekelo no usiku no kutatelo! Witeke mucima owe kwanyi meyi bahibala lwa mbumu. Wimeke makaa owe kwa yonyene nji ayoyisa upilo no anoowe alemine kuwelela kwa lishebo mulikulu na mulikululu.'' ²⁰ Umone, minya-upilo, umone ana kutenda ngeso. Nakufanene nji akati alye ano lewelekela mu mapumo owo, aana anaku cikisa mu makaa owo? Kame kufanene nji muprisita ni mupolofita aibaiwe mundoo no kukena ya mbumu? ²¹ Oshe andumbana ni acembele kama langanine bashi mu mapatelo. Akatana ni andumbana ange nakwisezwa kwa mbiinji; naukwaibaa muliywa no kutweba kowe nu kwaibaa nambula tineke kwaonyene. ²² Nukuningulela eyi icilisa, kwanyi kama kame unakwisaana anu ku liywa no mukiti, kucila kwange muneku oshe, mu liywa no kunita kwa minya-upilo okukakena simba munu mumweya anakuyoya; awo sina kulena ni kwacikisa, sila na sikwa ibaa.