¹ Mundi unakwilanga nainu akupula bilu wikalile wofoci. Naubiluka kwanyi mbakati, mundi unakwilkala munene mukaci no macaba ni mbumu no mukati mukaci no mibuso, kono cwale nabiluka mubika. ² Kama kulila onene usiku ni miyoti ikekekela ba matama aye. Kwa anan kumusinga oshe kakwisa oyu no kumuombaomba. Alikani oshe naku muonga na kuluka ila yaye. ³ Juda na kuta kundina munyina no kusebeliswa oyi mu ubika. Nakuyaka mukaci no mahedeni kawana pumulo. Aciti aye oshe nakumulema mukumu patisa. ⁴ Tindila tita Sione kame tili ni ndiulu kakuli kakwisa aaiya ku mikopano. Mwelo yaye kame yikalile yongeso. Ma prisita kama tonga akatama aye kama enile, ni yonyene tota nakuyupa kukola. ⁵ Ila yeya bilu ambumu waye; aamutimbile kama kondisa eyoo. Minya-upilo na kumuyupisa kukola libaka no mibonda yaye. Anaye no wamukana nakutwaliwa mu ubika. ⁶ Umbumu woshe no mwanana Sione no mukati no kubwa. Mandina aye lwanyi tipala nambulwa mafulelo, kame tienda kwaansa maata balubala lwa shenji owo. ⁷ Mu maywa anakweniswa ni shandolwa kwawo, na kupuluka Jerusalema ni ini yoshe no kuwaba inakwikalanga yaye mu maywa no matangiseta. Ababo anu aye ana kukwela mu makaa no ila yoo, kakwisa oyuno ku mutusa. Aamutimbile nakumwaliketa alemeni kumusheka mu mumai waye. ⁸ Jerusalema kama ikalile ni sibi sakupula, cwale, nakubiluka nyingi no litilo. Oshe nakumukuteka bilu amushwaula kakuli kama anakumonahala nji na kutubula kama tonga kama ala kunyima. ⁹ Litilo lyaye kame lina kuwaniwa mu misisi yaye. Ka yambuta eyi imwiyela kuuso. Elibaka elyo na kukwa mukukomokisa kame na kuulwa oyuno kumuongota mucima. Yo kulilo nji, '' Umona o kweena kwange, Minya-upilo, kakuli silasange nasikwinuneka!'' ¹⁰ Sila nasi kutwala likaa lyaso kwa mu nokuwaba yoshe. Kakuli Jerusalema na kumona mohedeni aingena musibaka no kukena saye, kwanyi kawa salaela nji alese kwingena mu kopano yowe. ¹¹ Aanu aye oshe kama atonga abasaela ndima. Nakuba einu yoo no utokwa kuula ilya nji ayoyise moyo woo. Mona, Minya-upilo, ulimuke nji sina kubiluka oyu ashwaulwa. ¹² Nji kamukwite sambo konyene, moshe mubita mu ndila? muale kame mumone nji kokuli kuena kufekile ni kuena kwanga, kwanyi Minya-upilo abana kunienisa muliywa no kutweba onene kwayonyene. ¹³ Kame kuna kutunda mu sibaka silumbile saye amatuma mulilo mu ifuba yange, naukwa yongisa. Nakuteela lubaba ku makondo ange ni kuni kwisa ngalamena. Kuma nikata mu ndiulu kame ni letuka munji ashe. ¹⁴ Coko no mibonda yange nakunungiwa kumakaa aye. Kame inimela ba ndingo yange. Nakumanisa maata age. Mbumu na kunilemisa makaa aonyene kani twese kwitamulela kwaonyene. ¹⁵ Mbumu nakumanisa tindume tange toshe tina kwikala nange. Nakwisana kopano inene no aanu kwiya kulwa nange ku yundisa andumbana ange. Mbumu nakulyatingelo mwalanjo mwanaa Juda no mukati kwanyi omo kundelwa sisansa no veine ¹⁶ Bainu eyi kame ni lila, miyo ange kama fufula miyoti; kakuti muombaombi ni yonyone okwisa mucima kame ali kule ni mene. Aanabde kama aikalile nyambwanaleka kakuli sila sange nasiku nitula. ¹⁷ Sione naolola makaa aye; kakwisa oyuno ku muongota mucima. Minya-upilo nalaele nji aaikalile banyonga ya Jkobo aikale ila yaye. Jerusalema kama monahala kwanji sinyingi no litilo. ¹⁸ Minya-upilo koma lukile, kakuli sino kukumeseza milao yaye. Muyupe, anyi anu moshe, mumone kuena kwange. Akatana ange ni andumbana na kutwaliwa mu ubika. ¹⁹ Sina kwiisana alikani ange, kono na nionga. Maprisita ange nakufela mu mundi, abana kusaela eyino kulya nji aongote mioyo yoo. ²⁰ Mona, minya-upilo, kakuli kame nili munalelwa; mila yange kame iyupa kukola, mucima kame utinine musifuba sange kakuli nanikukumuseza wene twaatu. Bande mbinji naikwiibaa mu mundi kwanyi mu lifu. ²¹ Nakuyupa kutonda kwange kakwisa oyuno kunikwisa mucima. Oshe ila yange yoshe na kuyupa linyando lyange, kame nakuwabelwa nji esona tende. Nakulita liywa una kwaamba cwale mbakufeke nimene. ²² Ouyi woo oshe wiiye balubala lowe, watende omo una kunitendda mu mibonda yange yoshe. Sitongo sange ni sinene kame mucima kame ikoyoka.