¹ Oyuno-maata-oshe ngaibi kaikala ni tinako tina kusumiwa? aa amucila, sikene aba sa mono a maywaa ae no kwaamba e yaambo? ² Anu anjiili kama ashenyisa a mawe a no tindinda, kama alya e mitapi yao no tingu, kame ata okalisa. ³ Kama abyangula tindiala e mbongolo yoo kama itwala; e pulu no mukati no mbelwa na kwiilonda kwanyi e sepiso no sikoloti. ⁴ Kama ana kusindela anjebwe kubita mu ndila. Mawe a akushuwa mu naha kama ata okushweka bamweya. ⁵ A okame, kama aikalile kwanyi timbii no mu liyungu, kama abamena ku misebezi yao eyino kusaela e silya ni kubambaba, litunga na kwa limiwa kame lita kwaaba e ilya no ana ao. ⁶ Kame asaela eyino kulya mu matongo. Kama abyangulula mu matongo no veine eyi anu nakwacila Mulimu. ⁷ Usiku oshe kama alangana situtu, nambulwa ito, kakwisa omwata kutendela kwisiteka ku seenge. ⁸ Nakulokiwa ni mbula ba malundu, kame na o kukumbata ku mawe libakano kuulwa mukunda. ⁹ Kame aciili kama ana kupamula ku maele no anu kufelwa kwa sitao, kwatenda e sipiso no sikoloti. ¹⁰ A okame, kame aenda njenje nambulwa sikumango, kame afa elishebo simba na kukutula manata no uloto. ¹¹ Simba akamuna olive kuitundisa ku maati, simba ailyatingela sisansa mu sikandelo no veive, a akome kama afa linyotwa. ¹² Mu mindi no anu kame kuyupahala kutosaela kwa anu aibaiwa, mebo no anu ana kuyaiwa kame ukuwanga, simbangeso Mulimu katokomela o kwiiba oko. ¹³ Anu anjiili kama akana e liseli, kasingi tindila no Mulimu ka singi kwenda mo. ¹⁴ Mwibai kama inana nako no liseli aba ibwa, okaibaa anjebwe ni ano kusheba, kame usiku, kama ashondalela kwanyi mbuyi. ¹⁵ Oyuno liito yonyene kama atatela e nako no mabuliwa; kame aambe nji, ''Kakwisa e litiyo lita kunimona.'' kama akufuka lwaambi ku lubala. ¹⁶ Nako no usiku niyonyene e nako a toyola e tindoo; kono o munji kama akuyatilela; kakwite sambo ni liseli. ¹⁷ Kwa onyene oshe, e nako no masiku kame ifelile kwanyi mwiinda no lifu. Abana kumona kuyanduluka kama ana kukalelwa kwanyi nionyene mwiinda no lifu. ¹⁸ Oyuno kwiiba kama abwa nawangu kwanji sinu siyeyaka ba meyi; e saauda sao kame sikulwe munaha. Kakwisa oyu alekula matongo ao no itando ya veine. ¹⁹ Kwanyi linanga ni kamwi aba li mana a meyi no litwa, a mayumbelo kame ata kumina ngeso ao ana kutenda sibi. ²⁰ Oyu no kumweleka kama ata ku mutobola, mibila kame ita okukola kuwaba kwa mwiili wae, kata kupulukiwa kuta kutelela. Oyu akata na kucila Mulimu kame ata kucolwa omo kucolelwa sitondo no kukukuta. ²¹ Kakuli kame unyandisa o mukati no mbelwa oyu wakwite ana, kame katwese kutenda nawino o mukati no mbelwa. ²² Kame Mulimu kama ayoyisa ano maata ni maata ae, kama ata, kuuka, simba ka sepile nji kame ata kuyoya. ²³ Mulimu kama aba wiketo, aikale ni sepo, a miyo kame amonena mutindila tao. ²⁴ Ni akulu ee, kono munako inyonyo feela kaata kwiikalabo, kama akatile kushi, kama afa kwanyi anu oshe. Kama a yangulwa kwanyi makunka no makonga. ²⁵ Nji kasangeso? anyine so ni monahalisa nji kame nili oyuno maya, kamba kunimonisa nji ange kakwite tuso.