¹ Nakwikalana mulume nu naha no Uzi e litina lyae neli Jobo; kame Jobo kaikala ni mubonda neli munu no kusepahala mulume no kucila o Mulimu kame ano kutundisa kwa ino kwiiba. ² Nakweeleka aana no alume ano utanu ni ambiili ni aana no akati aatu. ³ Kama ana kuluwa tingu tikuma ba ikiti itanu ni ikiti yiili, ikiti yaatu no tikamele, ni mapulu akumana ni ticoko no myunda itanu, ni matongi no myaanda itanu ni abika no kupula. Simbangeso oyu mulume kama ana kwikala mukulu onene kubita anu oshe no ku upa. ⁴ Muliywaa lyoshe no kweelekiwa kwanmwana no mulume yoshe, kama ana kutenda o mukiti mu ndoo yaaye. Oshe kama ana kwisana amandoo kwiya mu kulya ni kunwa ni anyene. ⁵ Amaywaa no mukiti abana kubwa, Jobo kama ana kwaisana nji aiye akenise. Kama ana kwinguka kusili amasiku kulita amatabelo no kucina akumana ni anaae no alume oshe, kakuli kama ata kwaamba nji, ''Mweendi kwa anaange kwaali oyu ana anakufosa ni kunyefula Muliimu mu micinma yoo.'' Jobo na kutendanga ngeso e nako yoshe. ⁶ Cwale mulyaa eliciili aana Mulimu bihi akumonahaza balubala no Minya-Upilo. Satani ni yonyene yo kwiingena bamweya ni onyene. ⁷ Minya-Upilo yo kwaamba kwa Satani nji, ''Kubine ukatundile?'' Satani yo kutambula Minya-Upilo nji, ''Kame ni katundile mu kweenda mu litunga, ni kupota mo oku noku,'' ⁸ Minya-Upilo yo kwaambela Satani nji, ''Nukumona mubika wange Jobo? kakuli mu litunga kakwisa oyu akufekile nae, kakwite mubonda munu no kusepahala, oyu no kucila Mulimu oyu wasingi eyino kwiiba.'' ⁹ Cwale Satani yo kutambula Minya-Upilo nji, ''Kandi kakwisa libaka elyo Jobo acitela Mulimu? ¹⁰ Kokaa na uku mu babalela yonyene ni ano ndoo yae, ni eyi alemine yoshe mu maneku oshe, nu nulubete musebezi no makaa ae, tingombe taye kame tikusalile mu naha yoshe. ¹¹ Kono cwale olole e likaa lyowe uleme ba inu yae akwite, umone nji kate ku kunyefula yo ikalile ba lubala lowe.'' ¹² Minya-upilo yo kwaambela Satani nji, ''Mona, yoshe akwite kame ili mu likaa lyowe. Fela ulese kutwala e likaa lyowe ba lutu lwae.'' Ababo Satani yo kutunda ba lubala no Minya-upilo. ¹³ Eliywaa e liciili, anae no alume ni ano akati abana lemine kulyela ni kunwela veine mu ndoo no mukulowo. ¹⁴ Bilu kubita o numwana kwa Jobo ni kwaamba nji, ''Amapulu kama alima kame timbongolo na tikwema o kufula kunyonga ni onyene. ¹⁵ Masabea kwamba ana ku itulukela ni kwiilonda. Kwa onyene abika, na kwaibaa ni mbinji. Kame kuna ku banduka mene nji ni iye ni kwaambela.'' ¹⁶ Yo silemine kwaamba, bilu kwiiya o muciili kame ni kwaamba nji, ''Mulilo wa Mulimu una kutunda kuwilu na ukucina tingu ni abika. Mene fela sina kubanduka nji ni iye ni kwaambela.'' ¹⁷ Usilemine kwaamba, o munjiili bilu aiya ni kwaamba ji, ''A makalede na kwiiya atenda itopa inatu, na kutulukela e tikamele ni kutilonda. Kwa onyene abika, na kwa ibaa ni mbiinji. Mene fela sina kubanduka nji ni iye ni miaambele.'' ¹⁸ Yo kasimana ni kwaamba, o muciili yo kwiya ni kwaamba nji, ''Anowe no alume ni akati kama ana kulyanga ni kunwango veine mu ndoo no mukuloo. ¹⁹ Ababo bilu kwiiya e mebo no linungwa una kutunda mu lihalaupa bilu u fula mu maneku anee no ndoo. Cwale e ndoo bilu ikwela andumbana, ni kwaibaa. Ku siya mene fela kwaba sina kwiiya mu ku miambela.'' ²⁰ Cwale Jobo seli aimana, ni kukayaula e sito sae, yo kubeula e tinuli ku mutwi, ni ku kwela bashi ni lubala, ni ku kumbela Mulimu. ²¹ Na kwaamba nji, ''Sina kutunda mulipuma lya maa nambuliva sinu, kame ita kuuka nambulwa sinu. Minya-upilo na kuniba, kame ni Minya-upilo na kuni byangulo. Kububelwe e litina lya Minya-upilo.'' ²² Mu yaambo eyi yoshe, Jobo kasifosa, kame kaba mubonda kwa Mulimu.