¹ Kame e liywaa eliciili ana Mulimu na kumonahaza balubala no Minya-Upilo kame Satani niyonyene nakwiiya nao ni o kumonahaza balubala lwa Minya-Upilo. ² Minya-Upilo yo kwaamba nji, ''Kubine ukatundile?'' cwale Satani yo kutambula nji, ''Kame nikatundile mu kwenda-enda mu litunga.'' ³ Cwale Minya-Upilo seli waamba Satani nji, ''Mibika wange Jobo nu mumono? mulitunga kakwisa oyu akufekile nae ni mulume no kuluka onene oyu acilile Mulimu oyu ano kutundisa kwa ino kwiiba yoshe. Yonyene kama ongotete mu uwa wae simba u ni sineleketa nji ni lwe nae ni mwibae nambulwa mubonda. ⁴ Cwale Satani yo kwaambela Minya-Upilo nji, ''Situmba kwa situmba! munu esalemine sohe kame asiba nji ayoyise moyo wae. ⁵ Kono u olole e likaa lyowe u muleme baifuba yae ni ba nyama no ba mwiili wae, abo ha kame uta kumona nji kate ku kunyefula balubala lowe.'' ⁶ Minya-Upilo bilu waambela Satani nji, ''Mona yokame mu likaa lyowe, kono ulese kulema ba moyo wae. ⁷ Ababo, Satani yo kutunda balubala no Minya-Upilo ni kufula ⁸ Jobo ni malonda no kwiiba oyi, kutunda kunalyatelo no makondo konji okakeela bakaci no mutwi.Jobo bilu a londa linetani no kunwaisa yo kaikala ba mufese no ba litiko. ⁹ Cwale mukatae bilu a mwaambela nji, ''Sikene abo wongotela mu ku sepahala kowe? weete Mulimu kame ufe!'' ¹⁰ Kono Jobo yo ku mutambula nji, ''Kame waamba kwanyi mukati wa mweelo. Ngaibi, kame tufanene kutambula feela eyino kuwaba mu likaa lya Mulimu kame iyino kwiina twikane ku itambula?'' Muyaambo eyi yoshe Jobo kasi fosa mu kanwa kae. ¹¹ Cwale ababo alikani ae Jobo a anatu, abana kuyupa makandauko ae. Munu ni munu na kutunda kwao- Elifazi noku Temani, Bilidadi no ku Shuwa ni Zofati no ku Naama. Nakutenda e sipangano ni kuta nji akamuyepele tineke niku muomba-omba. ¹² Cwale abana ana kumwaliketa asiendela kule kaa Mulimu ka nawino. Seli akalumuka o kulila. Munu ni muni bilu akayaula e sikumango sae bilu akusukulela o lukuku kumitwi. ¹³ Cwale bilu aikala nae bashi maywaa atanu ni maywaa ambiili ni usiku utanu ni usiku wiili, kame kakwisa simba munu mumweya ana kutundisa e liywi kwa Jobo. Kakuli na kumona nji okuyupa kukola kwae kame kuna kunemeba onene.