¹ Wilakumbwa ababipa, kabili wilakumbwa ukuba nabo. ² Pantu imitima yabo ikalilafye mukutontonkanya pa bupuupu, ne milomo yabo ikalilafye mukusosa ifyabipa. ³ Amano eyalenga ukuti ing'anda ikulwe, kabili ukwiluka ekulenga ukuti ikose. ⁴ Nokwishiba ekulenga ukuti imiputule ya muakti isulemo ifyuma fyonse ifyauma umutengo kabili ifisuma. ⁵ Umuntu uubomfya amaka yakwe mano mano e mwaume wine wine, no wamano alakosha amaka yakwe. ⁶ Pamulandu butungulushibwa mano inkondo ilalwikwa, kabili apali abakupanda amano abengi, abantu balapusuka. ⁷ Ku muwelewele amano ya cine yaba apasansuka; mu mpongolo takasamune akanwa kakwe. ⁸ Onse uupanga ukucita ububi, aketwa umukalamba wa mapange ya bubifi. ⁹ Ukuilekelesha ukwa buwele wele lubembu, kabili umunru uupumya wabunani ku bantu. ¹⁰ Bushe ulanenuka mu bushiku bwa macushi? Awe ninshi amaka yobe yanono. ¹¹ Pokolola abo baletwala ku mfwa; nabaletalantanta ukulola ku kwipaiwa, ubabweshe. ¹² Nga watila, ''Iye! Tatwaishiba ici,'' bushe uuceceta imitima takeluke, kabili bushe uulinda umweo obe takeshibe nokulambula umuntunse ukulingana no mulimo wakwe? ¹³ We mwana wandi umwaume, lya ubuci, pantu busuma; kabili leka uluto lwa buci ulwalowa lube mukanwa kobe. ¹⁴ Efyaba nokukwata amano. Nga wayakwata ukekala imyaka iingi, nefyo usubila fikafikilishiwa. ¹⁵ Wilabelamina apekala umulungami filya ficita umubifi; wionaula apo atushisha. ¹⁶ Pantu umulungami kuti awa imiku cine lubali, lelo ukwima akema; abacushi bena ilyo baponenwa nobucushi balawililila. ¹⁷ Umulwani obe nga awa, wi sansamuka; kabili nga aipununa, umutima obe wisekelela, ¹⁸ epali Yawe nao amona naco cabipa mu menso yakwe kabili alesha ubkali bwakwe kuli ena. ¹⁹ Wilaumfwila incita tubi, wilakumbwa ababifi. ²⁰ Pantu ababifi tacakabawamine; inyali ya babifi ikashima. ²¹ We mwaana wandi, tiina Yawe ne mfumu. Wi ipoosa pali bacipondoka. ²² Pantu ubucushi bukabemina mukupumikisha, kabili nani akeshiba ilyo bacipondoka balobele? ²³ Aya mashiwi nayo yaba mano: Ukuba nakapatulula mu bupingushi takwawama. ²⁴ Uutila ku mubifi: ''Uli mulungami,'' abantu nabantu bakamulapisha, ne nko shikamupata. ²⁵ Lelo abalemufunda cikabawamina, kabili pali bena pakesa ipalo ilisuma. ²⁶ Uwasuka ifyafumaluka atomona imilomo ya muntu umbi. ²⁷ Bomba imilimo yobe iyapanse, ulime nebala. Elyo uye nokukosha aba mu ng'anda yobe. ²⁸ Wiba inte yakushinina umunobe ilyo taushininkishe bwino bwino. Pantu ukaba umuwelewele ku milomo yobe. ²⁹ Witila: Filya fine acitile, efyo naine nalamucita. Nkalandula ukulingana nefyo umuntu umo umo acitile.'' ³⁰ Napitile pe bala lya munang'ani pe bala lya myangashi ilya muntu uwabula umutima wa mano. ³¹ Kabili mona! Lyonse lyamenemo ifyani. Kabili lyaiswilemo bakaenya, ne cibumba ca liko mabwe calibongolweke. ³² Awe nalolekeshe kufyo namwene na menso yandi, nomba nasambilako cimo pafyo namwene. ³³ Ukutubilikishakofye panono, ukusendamakofye amaboko panono pakuti utushekofye, ³⁴ elyo ubupina bukakwishila ngo mpupu, elintu no kubulwa kukawililila nge cipondo icili ne canso.