¹ Uwikala eka afwayo kucita ifyo atemenwe umwine kabili atalikana ne fyabupingushi fisuma. ² Icipumbu tacicankilwa ukumfwa, lelo mu kusokolola icili mu mutima waciko. ³ Ilyo umntu umubi aisa, esa ne misula pamo ne nsoni elyo no musebanya. ⁴ Amashiwi yamukanwa ka muntu menshi ayashika; akamfuku mfuku ka mano kamana kakwata amenshi ayapita. ⁵ Tacawama ukuba kulubali lwa muntu wa bubi, nangu ukupondamika ubupingushi ku muntu umulungami. ⁶ Imilomo ya cipumbu iciletela intulubundi na kanwa ka ciko keta impumo. ⁷ Akanwa ka cipumbu ebonaushi bwa ciko kabili ciipangila iciteyo ne milomo yaciko. ⁸ Amashiwi ya wamulomo yaba ngo twakusasula utwalowa kabili yatentemukila mu fyamukati fya mubili. ⁹ Eco, kabili uwatompoka mu kubomba ni munyina ku wa bonaushi. ¹⁰ Ishina lyakwa Yawe lupungu ulwakosa; umntu umulungami alabutukilamo no kupusuka. ¹¹ Ifyuma fya mukankala lilinga lya kosa ilyo musumba wakwe na mu kwelenganya kwakwe fyaba nge cibumba icitali. ¹² Ilyo takulafika ukuwa kwakwe umutima wa muntu uba uwacilumba, lelo ukufuka kutangilila ubucindami. ¹³ Uwasuka talati omfwe bupuba bwakwe ne nsoni. ¹⁴ Umutima wa muntu ushipikisha mu bulwele, lelo umutima wafunshika nani enga upokelela? ¹⁵ Umutima wa cenjela usanga ukwishiba no kukutika kwa wa mano kufwaya ukufumyapo ici. ¹⁶ Icabupe ca muntu kuti camwiswila inshila noku muleta pa cinso ca muntu wa cindama. ¹⁷ Uubalilapo ukulubulula umulandu wakwe amoneka uwalungama mpakafye uwamulandu mu nankwe aisa no kumwipusha. ¹⁸ Ukupendula kupwisha ifikansa no kupatulukanya pakati kaba maka. ¹⁹ Munyina walufyanishiwa akosapo ukunasha ukucila umusumba wakosa, no kukansana kwaba nge mipilikisho yakwisalila mu makule yakankala. ²⁰ Ku cisabo cakanwa kakwe ifumo lya muntu lilesushiwa; na kubusomboshi bwa milomo yakwe alekuta. ²¹ Imfwa no mweo fitungululwa no lulimi, nabo abatemwa ululimi bakalya icisabo caluko. ²² Uwasanga umukashi asanga icintu icisuma kabili alapokelela ukusenaminwa ukufuma kuli Yawe. ²³ Umubusu apapatila uluse, lelo umukankala asuka bukali bukali. ²⁴ Uufwaya ifibusa ifingi fimuletela ubunonshi, lelo kwaliba icibusa iciba mupepi ukucila indume.