¹ Umwana mwaume wamano omfwa ubulangililo bwakwa wishi, lelo uwa miponto tomfwa ukwebaulwa. ² Ukufuma ku cisabo ca mukanwa kakwe umuntu alaipakisha ku fisuma, lelo ukufwaisha kwa ncenjeshi nipa lufyengo. ³ Umo uubaka akanwa kakwe aicingilila umweo wakwe, lelo uwasamuna imilomo yakwe akonaulwa umwine. ⁴ Ukufwaisha kwa bantu abanang'ani ku kumbwa lelo tabasangamo ifili fyonse, lelo ukufwaisha kwa bantu abacincila bakekuta. ⁵ Umuntu umulungami apata ubufi, lelo umuntu umubifi aipangila umwine ifya nsoni, kabili acita ifya musebanya. ⁶ Ubulungami bucingilila abo abakaeele mu nshila shabo, lelo ububifi bulenga abacita ulubembu ukuwa. ⁷ Kwaliba bamo ababepekesha ukuba abakankala, lelo tabakwata nangu fimo, kabili kwaliba bamo ababepekesha ukuba abapina, lelo ninshi bakankala. ⁸ Icilubula umweo wa muntu cuma cakwe, lelo umuntu umupina tomfwa ukukalipilwa. ⁹ Ulubuto lwa bantu abalungami ku sekelela, leloinyali ya mbifi ikafumishipo. ¹⁰ Ukuituntumba kulabusha ulubuli, lelo pali abo abaleumfwa ukwipushanya palaba amano yacifyalilwa. ¹¹ Ifyuma ifinonkwa mulubilo tafifula, lelo umo uupanga icuma mukubomba na iminwe yakwe icuma cilakula. ¹² Ilyo isubilo lyakokola ukwisa, umutima ulakalipa, lelo icenekelwa ilyo caisa ciba kwati muti wa mweo. ¹³ Uwasula ifyakukonka akalapokwa icikatilo, lelo uwacindika ikambisho akalambulwa. ¹⁴ Isambilisho lya muntu uwa mano kamfuku mfuku ka mweo, ukukufumya kufiteyo fya mfwa. ¹⁵ Ukushilimuka nganshi kuleta ipaalo, lelo inshila sha ncenjeshi tashipwa. ¹⁶ Abantu aba cenjela bakacitila ifintu mu mano mu bwanshiko bonse, lelo umu welewele akasalanganya ubupumbu. ¹⁷ Imbifi intumi iponena mu macusho, lelo uwacishinka muti uuleta ubundapishi. ¹⁸ Umo uusula ifyakukonka alabulwa kabili alasebana, lelo ukucindikwa kwisa kubalefundwa. ¹⁹ Icilolelwa nga caisa cileta ukusansamushiwa kukufwaisha, lelo abawelewele bapata ukupilibuka ukufuma ku fibi. ²⁰ Enda nabantu abamano naiwe ukaba na mano, lelo uwangala naba welewele alacula. ²¹ Ubonaushi bwisa panuma yalubembu, lelo abantu abalungami balambulwa ifisuma. ²² Umuntu umusuma ashila ubupyani abana bakwe, lelo ubonaushi bwa mubembu bubikilwa umulungami. ²³ Amabala ya mupina yafumya ifyakulya ifingi, lelo filaloba pakubulwa ubupingushi. Umo uushikalipila umwana mwaume wakwe ninshi alimupata, leo uwatemwa umwana mwaume wakwe abangila ukumulangilila. ²⁴ Umuntu umulungami alalya mpaka aikuta, lelo ulufumo lwa mubifi lubafye ulwa nsala lyonse. ²⁵ Abalungami balalya nokwikuta, lelo ifumop lya mubifi likala ne nsala.