¹ Yawe alandile kuli Mose, atile, ² ''Landa kuli Aaroni nabana bume bakwe, bebe bataluke ukufma kufintu ifyamushilo ifya bantu bakwa Israeli, ico bapatwilako nebo. Tabafwile basalula ishina lyandi ilya mushilo. Nine Yawe. ³ Landa kuli bena, 'Nga uuli onse uwamulupwa lwenu ukupitila munkulo shenu apalama kufintu ifyamushilo ica bantu bakwa Israeli afumishiwako kuli Yawe, ilyo ali uwakowela, uyo muntu afwile afumishiwako pacinso candi: Nine Yawe. ⁴ Takuli uwamulupwa lwakwa Aaroni uwalwala ubulwele bwankanda, nangu uwakwata ubulwele bwakusuma mumubili onse, kuti alya icili conse icelambo icapangilwa kuli Yawe panka asanguluka. Onse uwaikata icintu conse icakowela ukupitila mukukumya kucitumbi, nangu ukukumya kumwaume uulesuma ameshi yabwaume, ⁵ nangu onse uwaikata kunama iikalafuka iya mulenga uku kowela, nangu umuntu ose uwalenga ena ukukowela, umusango onse uo ukukowela kwinga belamo-- ⁶ Nashimapepo uwaikata conse icakowela akakowela ukufika icungulo. Tafwile kulya conse icintu icamushilo, kano asamba umubili wakwe na mesnhi. ⁷ Ilyo akasuba kawa, elyo akasanguluka. Nga kawa kuti alya icintu ica mushilo, pantu fyakulya fyakwe. ⁸ Taufwile ukulya icintu conse icasangwa icafwa nangu icaipaiwa nenama shampanga, epali ca mulenga ukukowesha. Nine Yawe. ⁹ Bashi mapepo bafwile ukukonka amafunde yandi, nangu bakaba nomulandu walubembu bakafwa pakunsalula. Nine Yawe uubapanga bashila. ¹⁰ Takuli uwakunse ya lupwa lwabushimapepo, nangu umweni wakwa shimapepo nangu abancito abengalya icili conse icamushilo. ¹¹ Lelo shimapepo nga ashita umusha uli onse ne ndalama shakwe, umusha uyo kuti alyako ifintu ifyapatwilako kuli Yawe. Balupwa lwabashimapepo nabasha abafyalilwa mung'anda yakwe, nabo kuti balya nankwe ifyo ifyakulya ¹² Nga umwana umwanakashi wakwa shimapepo alyupwa kuli umo uushili shimapepo, tekuti alye conse icamusangulo wabupe uwamushilo. Lelo umwana mwanakashi wakwa shimapepo nga takwata mwana, nangu nga abwelela ku ng'anda yakwa wishi ngakubukashana bwakwe, kuti alyako ifyakulya fyakwawishi. ¹³ Lelo takuli uushili wamulupwa lwabushimapepo uwingalya ukufuma kucakulya cakwashimapepo. ¹⁴ Nga umuntu alya iacakulya icamushilo mukukana ishiba ici, lele afwile abwesesha shimapepo pali ici, afwile alundapo cimo napali fisano nokubwesha ici kuli shimapepo. ¹⁵ Abantu bakwa Israeli tabafwile ukusalula ifintu ifyamushilo ifyo baimya pamulu kuli Yawe, ¹⁶ nokulenga abene ukusenda ulubembu ulwingabalenga umulandu uwakulya icamushilo, pantu nine Yawe uuba panga abashila.''' ¹⁷ Yawe alandile kuli Mose, atile, ¹⁸ Landa kuli Aroni naku bana baume bakwe, nakubantu bonse abakwa Israeli. Tila kuli bena, 'Onse umwina Israeli nangu umulebeshi uwikala mu Israeli, ilyo baletula icelambo nangu kufikilisha umulapo nangu icabupe cakuitemenwa, nangu batula kuli Yawe nge cabupe cakuninika, ¹⁹ nga cakuti kuti capokelelwa, bafwile ukutula inama iilume iyabula akalema ukufuma pa ng'ombe, impaanga, nangu imbushi. ²⁰ Lelo tamufwile mwapela conse icakalema. Nshakapokelele ici kucifulo cenu. ²¹ Uyo onse uwapela ilambo lyacabupe nangu mumukuni wampaanga kuli Yawe pakufikilisha umulapo, nangu icabupe cakuitemenwa, cifwile caba icishalemana pakuti cipokelelwe. Tamufwile mwaba akalema munama. ²² Taufwile ukupela inama isha pofula, iyalemana, nangu iyacenekwa, nangu insundu, nangu ifilonda, nangu ifiseseya. Taufwile ukupela ishi kuli Yawe nge lambo lya kuninika pacipailo. ²³ Kuti mwapela icabupe cakutemwa ing'ombe, nangu impaanga iyalepapo mucilundwa nangu iya ipipa, lelo icabupe caifyo tacakapokelelwe ngo mulapo. ²⁴ Tecakwesha ukutula kuli Yawe inama iilume iyo intoyo shakwebululwa, ishatinaulwa, ishalepulwa nangu ukuputuwa. Tamufwile ukucita ifi mu calo cenu. ²⁵ Kabili tamufwile kulapoka inama shamusango uyuukufuma kubena fyalo nokushitula ngo mutulo wafyakulya kuli Lesa wenu. Tafyakapokelelwe mukumwimininako pantu fyalibamo nobulema.''' ²⁶ Yawe aebele Mose ati, ²⁷ ''Ilyo lyonse ing'ombe, impaanga, nangu imbushi yafyalwa, ifwile ukuba nang'ina panshiku cine lubali. Elyo ukufuma pabushiku bwa cine konse konse nokuya kuntanshi, awe yena naisuminishiwa ukuba umutulo we lambo wa cakooca kuli Yawe. ²⁸ Tecakwesha ukwipaya ing'ombe atemwa impaanga notwana twashiko mubushiku bumo bwine. ²⁹ Ilyo lyonse muletula umutulo wakutotela kuli Yawe, utuleni munshila yakuti ukapokelelwe mukumwimininako. ³⁰ Ufwile ukuliwa pabushiku bwine ubo mwautula. Tewakushako nangu kamo mpaka ulucelo. Nine Yawe. ³¹ Mulebaka amafunde yandi nokuyakonka. Nine Yawe. ³² Tacekwesha ukusebanya ishina lyandi ilya mushilo. Mfwile ukwishibikwa kuli imwe mwe bena Israeli ukuti ine ndi wamushilo, ³³ kabili uwamufumishe mu calo ca Egupto no kuba Lesa wenu. Nine Yawe.