¹ Lisheni intandala mu Sioni, kabili bilikisheni mu lupili lwandi ulwa mushilo! Lekeni abantu bonse aba mu calo batutume no mwenso, pantu ubushiku bwakwa Yawe buleisa; icne, buli mupepi. ² Bushiku ubwa mfifi kabili ubwabipa, ubushiku ubwa makumbi kabili ubwa mfifi iikalamba. Kwati macaca ayakupile pa mpili, ibumba ilikalamba ilya fita fya maka lileisa. Takwatalile akuba ifita nga ifi, kabili takwakatale akuba nakabili, nangu nipanuma ya nko ishingi. ³ Umulilo uuleoca conse ku ntanshi yauko, na kunuma yauko kuli ulubingu luleaka. Icalo cili nge bala lya Eden ku ntanshi ya cena, lelo kunuma ya ciko kuli amatololo ayabulamo akantu. Icine cine, takuli icikapusuka ukufuma muli cena. ⁴ Imimonekele ya fita ili nga bakafwalo. Kabili bacilauka nga baume abali pali bakafwalo. ⁵ Batotoka ne congo nga amaceleta pamulu wa mpili, nge ciunda icikulu icalubingu ululeoca ifisoso, nge fita fya maka ifilesungamina ukuya mubulwi. ⁶ Ilyo fyamoneka abantu basakamana kabili ne finso fyabo fyonse fyawa. ⁷ Babutuka nga baume babulwi; banina ifibumba nge fita; baenda, bonse ukwendela pamo, kabili ukwabula ukupatuluka. ⁸ Takuli nangu umo uwakumpunkana no munankwe; bendela pamo, cila umo endela mu nshila yakwe; bapula pakati ka fyanso kabili tabafuma mushila intu baleyamo. ⁹ Bengila mumusumba, babutuka pacibumba, bengila mumayanda, nokwingila pa nsolokoto nga abapupu. ¹⁰ Isonde lya sunkana ku ntanshi yabo, imyulu yatutuma, akasuba no mwenshi fyafitishiwa, ne ntanda shaleka ukubalika. ¹¹ Yawe aimya ishiwi lyakwe ku ntanshi ya fita fyakwe, pantu abaume babulwi bengi nganshi; pantu ba maka, abo abakonka amakambisho yakwe. Pantu ubushiku bwakwa Yawe bukalamba kabili bwakutinya. Ninani uwingashipikishako? ¹² ''Eico nanomba''- uku ekubilikisha kwakwa Yawe-''Bweleleni kuli ine nemitima yenu yonse. Shilisheni, lileni, kabili losheni.'' ¹³ Lepuleni imitima yenu tefyakufwala fyenu fyeka, nokubwelela kuli Yawe Lesa wenu. Pantu wakusenamina kabili wa luse, uukokola ukukalipa kabili alanguluka pafyo alefwaya ukucita kabili atekanya pakukanda uubifishe. ¹⁴ Ninani uwishibe? Bushe limbi kuti ayaluka no kulanguluka, nokusha ipaalo kunuma yakwe, umutulo wabunga no mutulo wa cakunwa kuli Yawe Lesa obe? ¹⁵ Lisheni intandala mu Sioni, iteni ukushisha kwa mushilo, kabili iteni ukukolongana kwa mushilo. ¹⁶ Kolonganikeni bacilolo; kolonganikeni abaice nabana abaleonka. Lekeni bashibwinga bafume mumiputule yabo, nabanabwinga ukufuma mu mayanda yabuna bwinga. ¹⁷ Lekeni bashimapepo, ababomfi bakwa Yawe, balilile pkati ka ng'anda yakwingililapo wapa cipailo. Lekeni basose, ''Pususheni abantu benu, Yawe, mwilenga icakupyanina cenu ukusebana, ukuti inko shilebapumya. Mulandunshi benga sosela mu nko, 'Lesa wabo alikwi?''' ¹⁸ Elyo Yawe asakamane icalo cakwe kabili alikwatile abantu bakwe inkumbu. ¹⁹ Yawe ayaswike abantu bakwe, ''Moneni, ukamifumina ingano, uwamwangashi uupya, namafuta. Mukebukishiwa nafyena, kabili nshakamicite abasulwa mu nko. ²⁰ Nkafumya nabamisansa abakukapinda kakukuso ukutali naimwe, kabili nkabatamfisha ukwauma kabili impanga ya cibolya. Ifita fyabifya ku ntanshi fikaya kuli bemba wa kukabanga, kabili ifyakunuma kuli bemba waku masamba. Icena caciko cikakula, kabili ukununka kwaciko ukubi kukakulilako.'' Icine, nacita ifintu ifikalamba. ²¹ Witina, we calo; samwa kabili sekelela, pantu yawe akacita ifintu ifikalamba. ²² Mwitina, mwe nama shamu mpanga! Pantu umulemfwe wa matololo uli nokumena, ifintu fikatwala ifitwalo fyafiko, ne fimuti fya makunyu ne myangashi fikakwata ubusomboshi ubwafikapo. ²³ Angeni, mwe bantu ba mu Sioni, kabili sekeleleni muli Yawe Lesa wenu. Pantu akamipela imfula iya ntanshi iiyene nokumiletela iya mainsa, imfula ya ntanshi neyakulekelesha nga ku kale. ²⁴ Incende shakupililamo shikesula ingano, ne fyakukaminamo fikesula no mwangashi uupya na mafuta. ²⁵ ''Nkakwesha kuli imwe nefisabo fya myaka ifyo makanta alile-makanta wacipesha amano, namakanta uulya, kabili makanta uonaula-ifita fyandi ifya maka ifyo natumine mukati kenu. ²⁶ Imwe mukalya ifingi nokwikuta, nokulumbanya ishina lyakwa Yawe Lesa wenu, kabili nshakatale ndeta umusebanya pa bantu bandi. ²⁷ Imwe mukeshiba ukuti naba mukati ka Israel, nokutila nine Yawe Lesa wenu, kabili takwaba naumbi, kabili nshakalete umusebanya pa bantu bandi. ²⁸ Panuma yaifi fintu nkapongolwela umupashi wandi pa bantu bonse, nabana benu abaume nabana benu abanakashi bakasesema. Abaume benu abakote bakalote ifiloto; abalumendo benu bakamona ifimonwa. ²⁹ Napaba bomfi nababomfi abanakashi; muli isho nshita nkapongolwelapo umupashi wandi. ³⁰ Ine nkalanga ifipesha mano mu myulu nape sonde, umulopa, umulilo, kabili ne ntumba ya cuushi. ³¹ Akasuba kakaluka imfifi uo mwenshi umulopa, ilyo ubushiku ubukalamba ubwakwa Yawe tabulaisa. ³² Elyo uuli onse uukalilila pe shina lyakwe Yawe akapusuka. Pantu pa lupili lwa Sioni na mu Yerusalemu mukaba abo abakafulumuka, pamo ngefyo Yawe atile, kabili pali abo abakapusuka, ni abo Yawe aita.