¹ Kabili pampela yamwaka walenga cine lubali, uwakusulwa kuwankongole. ² Nomusango wakusulilamo: Umuntu onsefye uwakongwesha umwiana Israeli umunakwe tali nakupoka nkongole iyoo; tali nakulipilwa kumunakwe nangu nindume yakwe, pantu ni Yawe apingwile ukusulako ku nkongole pali iyo nshita. ³ Umwina fyalo ena kuti wamupinda; lelo ufwile ukusulako ku nkongole munonko akangola. ⁴ Yawe Lesa wenu akalamupala nganshi mu calo ico ali nokumupela kukuba icabupyani cenu eico pali imwe tapafwile ukuba umulanda, ⁵ ngacakuti mwalabela Yawe Lesa wenu nokukonka amafunde yonse ayo ndemupela ilelo. ⁶ Pantu Yawe Lesa wenu akalamupala ngamulya mwine alaile; nimwe mukalakongwesha inko ishingi, leelo tapakabe uluko nangu lumo ulwakumuteka. ⁷ Ngacakuti mu musumba umo uwacalo ico Yawe Lesa wenu alamupela muli uulekabila, mwilaumya mitima nangu ukutunkanika amaboko kuli munyinenwe; ⁸ mukalefungulula amaboko, kabili mukuitemenwa, mukalemwashimisha fyonse ifyo alekabila. ⁹ Cenjeleni mukukana kwata itontonkanyo lyabipa mu mitima yenu, nokutila, ''Umwaka walenga cine lubali, umwaka wakusula kunkongole naupalama,' epakuti tamulangile umutima wabipa kuli munyinenwe uulekabila, mwakana nokumupa nangu kamo, kuti alilila kuli Yawe pamulandu wenu naimwe mukasangwa nomulandu wabubifi. ¹⁰ Mukalemupelafye ukwabula ukuilishanya mu mitima yenu, lyena pamulandu waifi Yawe Lesa wenu akalamupala muli fyonse ifyo mukalabomba nafyonse mwaikatako. ¹¹ Lyonsefye mu calo mukalaba nabalanda; kanshi emulandu wine namukonkomesesha imwe ukulafungulula amaboko kuli bamunyinenwe, abalanda na bakabila ba mu calo cen.' ¹² Ngacakuti munonko, umu Ebele umwaume, nangu umwanakashi, aishitisha ubusha kuli iwe akabombela napamyaka mutanda, mumwaka walenga cine lubali afwile ukumulekako abe umuntungwa. ¹³ Kabili ilyo wamuleka ukuti abe umuntungwa, wikaleka akaye minwe nkutwa. ¹⁴ Ukamupela ifyabupe ukwabula ukusaluluka ukufuma pafyo Yawe Lesa obe akupalilapo, impaanga, ingano, nomwangashi. ¹⁵ Mwibukishe ukuti naimwe bene mwali abasha mu calo ca Egypto, kabili Yawe Lesa wenu amulubula; kanshi emulandu wine naine namupeleela ili funde ileelo. ¹⁶ Nomba ngacakutila umusha obe asosa kuli iwe ati, 'Nshilefwaya kuya.' Pantu alikutemwa atemwa nolupwa lobe lwine kabili ekala uwasansamuka, ¹⁷ lyena ukabule akakutulilako ukutwi nokumushitilisha kucibi, nokumutula ukutwi kwakwe ninshi aba umusha obe uwa pee. Kabili nomusha obe umwanakashi efya kumicita. ¹⁸ Wikalacimona ukwafya ukuleka umusha obe abe umuntungwa, pantu imilimo akubombela pamyaka mutanda kuti yalingana nomuntu uwancito uwingakubombela pamyaka itatu. Kanshi naiwe wacita ifi Yawe Lesa obe akakupala mufintu fyonse ifyo ukalabomba. ¹⁹ Amabeli yonse ayalume ayang'ombe shenu naya fitekwa fyenu muleyapatwila Yawe Lesa wenu. Kanshi isho ng'ombe mwikalaesha kushibomfya kumilimo, kabili ne mpanga nasho mwikalashibeya masako. ²⁰ Cilamwaka imwe pamo nabamulupwa lyenu mukaleshilya pa cinso cakwa Yawe Lesa wenu pancende iyo akasala. ²¹ Ngacakutila inama yalikwata akalema, nangu yalitulika amenso, nangu ilasunta, nangu yaba nakalema akabipisha nganshi- lyena tamuli nakupela ilambo kuli Yawe Lesa wenu. ²² Inama yamusango uyo mulinokuilya mumisumba yenu; bonse abasangululwa nabashasangululwa kuti balyako, ngafilya fine balya impombo nangu insebula. ²³ Nomba mwikalalya kumo nomulopa, wena mukalewitila panshi ngamenshi.