¹ Muli bantu bakwa Yawe Lesa wenu. Mwilaiteta, nangu ukuibeya iciputulwa icili conse pamenso yenu pawafwa. ² Pantu muli luko ulwapalwako kuli Yawe Lesa wenu, na Yawe alimusala imwe ukuba abantu abacikwatwa cakwe, ukucila pa bantu bonse ababa pamulu we sonde. ³ Tamufwile ukulya icintu conse icakowela. ⁴ Ishi enama isho mwingalya: Ing'ombe, impanga, ne mbushi, ⁵ ne nsebula, nempombo, na sele, ne mbushi ya mumpanga, ne mpelembe, ne mpanga yamu mpanga necibushi mabwe. ⁶ Kuti mwalya nenama ishapanduka icibondo, emukuti, nesho icibondo cayakana pabili, elyo neshi shetulula na ukubukula. ⁷ Nangu cingaba ifyo, tamufwile ukulya inama shimo neshishetulula neshibukula nangu nesho icibondo cayakana pabili: ingamila, nakalulu, elyo na pati; pamulandu wakuti shilashetulula nokubukula leelo tashalepuka icibondo, shintu shakowela kuli mwebo. ⁸ Ne nkumba yalikowela kuli mwebo elyo kabili pamulandu yalilepuka icibondo leelo taishetulula nokubukula; ninshi yalikowela kuli mwebo. mwilalya umunofu wankumba, kabili mwilaikata nokufitumbi fyashiko. ⁹ Nefintu ifyamumenshi kuti mwalya: nangu cinga bafyo icakwata utulebelebe namamba; ¹⁰ leelo nangula cingaba fyo icishakwata utulebelebe namamba imwe mwilalya; fintu fyakowela kuli mwebo. ¹¹ Fyonse ifyuni ifyasanguluka kuti mwalya. ¹² Leelo nifi efyuni tamufwile ukulya: kapumpe, ne cikoshi, ne kubi, na pungwa wakashika, ¹³ na pungwa wafita, imisango ne iyapungwa. ¹⁴ Tamufwile ukulya imisango iya mwankole, ¹⁵ namwakatala, nafwifwi, napetrele, nolukoshi, nemisango yonse iya fwifwi, ¹⁶ nakapulu akanono, necipululu icikulu, necipululu cabuta, ¹⁷ na mukanga, nekubi ne nondo. ¹⁸ Tamufwile ukulya nakabaso, ne misango iya nkoba, na pupute, elyo nakasusu. ¹⁹ Conse icipupuka, nefintu ifisenya fyalikowela kuli mwbo; tafifwile fyalikwa. ²⁰ Kuti mwalya conse icipupuka icasanguluka. ²¹ Tamufwile ukulya icintu icaifwila; kuti mwacipela kumutulo tula uuli mumishi yenu, uwingalya ici; nangu kuti mwacishitisha kumutula tul. Pantu muli luko ulwapatwilweko ku li Yawe Lesa wenu. Tamufwile ukwipika akana kambushi mumukaka wakwa nyina. ²² Mufwile mwapela icekumi mubusomboshi bonse ubwambuto shenu, isho mwafumya mwibala umwaka no mwaka. ²³ Mufwile mwalila kucinso cakwa Yawe Lesa wenu, kuncende akasala iyashila, necekumi cangano shenu, no mwangashi wenu upya, namafuta yenu,namabeli yang'ombe shenu naya mpanga shenu; pakuti musambilile lyonse ukucindika Yawe Lesa wenu. ²⁴ Ngo lwendo lwalepesha kuli mwebo kabili mwafilwa ukucisenda, pamulandu wakuti kuncende uko Yawe Lesa wenu, akasala nge ncende yashila kwalepesha ukufuma kuli mwebo, ninshi, ilyo Yawe Lesa aoala mwebo, ²⁵ mukasangule icabupe mundalama, mukafumbate muminwe yenu, nokuya kuncende iyo Yawe Lesa wenu akasala. ²⁶ Kabili mukabomfye indalama kucili conse ico mukalafwaya: Ing'ombe, impanga, umwangashi nangu icakunwa icaluma, nangu ico mwafwaya. Kabili mukalila pacinso cakwa Yawe Lesa wenu nokusekelela, mwebo nabamung'anda yenu. ²⁷ Umwina lebi uulimukati kampongolo- shenu mwikamulekelesha, pantu takwata icakaniko nangu ubupyani namwebo. ²⁸ Napampela yacila myaka itatu mukapele icapekumi icapali conse ifya mwasombola muli uyo wine mwaka, kabili mukatutile mukati kampongolo shenu; ²⁹ nomwina Lebi, pamulandu takwata icakaniko nangu ubupyani namwebo, nomutula tula no mwana wanshiwa, namukamfwilwa abalimukati kampongolo shenu, bakesa nokulya nokwikuta. Mucite ici pakuti Yawe Lesa wenu amupale mumulimo onse uwaminwe yenu uo mukalabomba.