¹ Aya emashiwi ayo Mose asosele kubena Israeli mupepi na Yodani mumatololo, mululamba lwamumana wa Yodani umukonko uwalekanya Safi, pakati ka Parani, Tophele, Labani, Hezerothe, na Dizahabi. ² Cali lwendo lwakulenga ikumi na bumo ukufuma ku Horebe kunshila ya lupili lwa Seri ukufika ku Kadeshi Barnea. ³ Cacitike mumwaka wakulenga amakumi yane, mumweshi we kumi nabumo, elintu Mose asosele kubantu bamu Israeli, ukubeba fyonse ifyo Yawe amukonkomeshe ifikumine bena. ⁴ Cali ifi lintu Yawe ninshi napakasa Sihoni imfumu yamu Amerite, uwaleikala mu Heshbone, na Oge imfumu yamu Bashini, uwaleikala mu Ashitaroth, mu Edrei. ⁵ Ukucila Yodani, mucalo ca Moabi, Mose atampile ukubilikisha ifyakukonka, atile, ⁶ ''Yawe Lesa wesu asosele kuli ifwe mu Horebi, atile, namwikalisha muli ici calo campili. ⁷ Pilibukeni nokutampa ulwendo lwenu, nokuya ku calo campili ica Amorite nencende ishapalaminako kululamba lwamumana wa Yodani umukonko, mucalo campili, mumukonko, mu Negebi, kabili nakucabu cabemba- mu calo cabena Kenani na Lebanoni ukufika nakumumana ukalamba, uwa Eufureti. ⁸ Moneni, Nalipekenye icalo kuli imwe; kabiyenimo nokucikwata cilya calo ico Yawe lapile kuli ba shinwe- kuli Abrahamu, kuli Isaki, kuli Yakobo- ukupela kuli bena na kubufyashi bwabo ubukakonkapo panuma yabo. ⁹ Ine nasosele kuli imwe pali ilya inshita, natile, 'Ine nafilwa ukumisenda neka palwandi. ¹⁰ Yawe Lesa wenu amufusha, kabili, moneni, imwe leelo mufulile ngentanda shamu mulu. ¹¹ Nga Yawe Lesa waba shinwe, amilenge ukuba imintampendwa ishingi ngefyo mwaba, nokumipala, ngefyo amulaile! ¹² Leelo kuti ine nemwine neka nasenda shani ifipe fyenu, nefisendo fyenu, kabili nefimfulunganya? ¹³ Sendeni abaume bamano, abaume bomfwila, kabili abaume basuma ukufuma muli cila mukowa, na ukubapanga ukuba imitwe yenu.' ¹⁴ Mwayaswike ine nokutila, 'Ifintu ifyo ulesosa kuli baifwe fisuma ukuficita.' ¹⁵ Eico nasendele abakalamba mumikowa yenu, abaume bamano, abaume basuma, nokubapanga ukuba imitwe shenu imwe, bantungulushi pamakana, bantungulushi pamwanda, bantungulushi pamakumi yasano, bantungulushi pamakumi, nabacilolo, pamikowa ne mikowa. ¹⁶ Nakonkomeshe bakapingula benu pali ilyanshita, natile, 'Umfweni icimfulunganya pakati kaba muninenwe, nokupingula mubulungami pakati ka mwaume na ndume yakwe, nomutulatula uwali nankwe. ¹⁷ Mwilalanga kapatulula kuli onse mubupingushi; mukomfwa akanono nokukakusha. Tekuti mutine pacinso camuntu, pantu bupingushi bwakwa Yawe. Ubulwi bwakosa kuli imwe, buleteni kuli ine, naine nakulaumfwa.' ¹⁸ Nalimikonkomeshe pali ilya nshita fyaonse ifyo mulingile ukucita. ¹⁹ twayendele ukufuma ku Horebe nokuyapita mumatololo yonse yalya ayaletinya mwamwene, mulwendo lwesu ulwakuya ku calo campili ku Amoriti, ngefyo Yawe Lesa wesu atukonkomeshe, kabili twaishile ku Kadeshi barnea. ²⁰ Natile kuli imwe, mukesa ku calo campli ku Amoriti, ico Yawe Lesa wesu apela kuli ifwe. ²¹ Moneni, Yawe Lesa wenu alipekanya icalo kuli imwe; nineni kwateni, ifyo Yawe Lesa wabashinwe, asosele kuli imwe; mwitina, nangu ukunenuka.' ²² Bonse muli imwe mwaleisa kuli ine nokutila, 'Lekeni tutume abantu abakutungilila, pakuti bayebatufwaile icalo, nokutubwesesha amashiwi nenshila twingapakashilamo, namumisumba isho tukekala bwino.' ²³ Icikoseleshi cangwamina; nasendele abaume ikumi nababili muli imwe, umwaume muli cila mukowa. ²⁴ Balibwelele nokuya nina mu calo campili, baishile kumumana wa Eshko, nokucilengula. ²⁵ Basendeleko fimo muminwe yabo ifyali ku calo kulya nokuleta kuli ifwe. baletele namashiwi kuli ifwe nokutila, 'Calo icisuma ico Yawe Lesa wesu apele kuli baifwe.' ²⁶ Leelo mwakene ukupakasa, leelo mwayalukile amafunde yakwa Yawe Lesa wenu. ²⁷ Mwaleilishanya muma tenti yenu mwatile, ''Pamulandu wakuti Yawe alitupata atufumya ku calo ca Egypto, nokutuleta muminwe yama Amorite kukutonaula. ²⁸ Twalaya kwisa nomba? Bandume shesu balesungulula imitima, batile, 'Abo bantu bakalamba kabili batali ukucita ifwe; kulya imisumba shikulu kabili balisushaisha ukufika mu mulu; nokucilisha, twalimwene abana baume bakwa Anakimu kulya.''' ²⁹ Elyo natile kuli imwe, 'Mwitutuma nangu ukubatina. ³⁰ Yawe Lesa wenu alemitangilila, alemilwila, ngafyonse ifyo amucitile mu Egypto ifyo mwamwene mumenso yenu, ³¹ kabili namonse mumatololo, mwalimwene ifyo Yawe Lesa wenu amusendele, ngafintu wishi asenda umwana mwaume wakwe, konse mwaleya mpaka mwafika kuli ino ncende.' ³² Leelo muli aya mashiwi tamwacetekele Yawe Lesa wenu, ³³ uwamitangilile munshila kukufwaya incende mwikapangako insakwe, mumulilo kumfimfi namukasuba mumakumbi. ³⁴ Yawe alyumfwile ifiunda fyamashiwi yenu nakabili alifulilwe; alapile nokutila, ³⁵ 'Mucishinka takwakabe umuntu nangu umo uwa muliiyi nkulo yabipa ukumona icalo icisuma eyo napela kufikolwe fyenu, ³⁶ kano Caleb umwana mwaume wakwa Yefune. Akaimona kabili nkamupela kumo nabufyashe bwakwe icalo ico apitilemo, pantu alakonka Yawe.' ³⁷ Yawe afulilwe kumo naine pamulandu naimwe, atile, 'Naiwe wine tawakaye kulya; ³⁸ Yoshua umwana mwaume wakwa Nuni, uwaiminine kuntanshi yenu, akengila mulya; ukamukoselesha, akalenga Israeli ukucipyana. ³⁹ Nakucila, abana benu abanono, ebo mwatile bakaba mubwafya, abo leelo bashikwete amano yakwishiba ubusuma nangu ububi- bakengile mulya. Leelo bena ine cikapelwa, kabili bakacikwata. ⁴⁰ Leelo kuli imwe, pilibukeni mutampe ubulendo bwenu ubwakuya mumatololo kunshila kuli Bemba wa kashika.' ⁴¹ Elyo mwalyaswike mwatile kuli ine, 'Natubembukila Yawe; Tukaya nokuyalwa, kabili tukakonka fyonse ifyo Yawe Lesa wesu atukonkomesha ukucita.' Umwaume onse muli ba imwe afwale icanso cankondo, kabili muipekanye kukuya lwisha icalo campili. ⁴² Yawe atile kuli ine, 'Landa kuli bena, ''Mwipakasa kabili mwilwa, pantu ine nshabe naimwe, kabili abalwani benu balemucimfya.' ⁴³ Nasosele kuli imwe muli iyi nshila, leelo tamwaumfwile. Mwasangukile amafunde yakwa Yawe; mwali na icilumba kabili mwapakasa icalo campili. ⁴⁴ Leelo abena Amorite, abaikele mu calo campili, balimyalukila nokumitamfya nge nshimu, kabili bamitentemushe ku Seri, ukutali nga ku Horma. ⁴⁵ Mwalibwelele kabili mwalilile kuntanshi yakwa Yawe leelo Yawe talekutika kumashiwi yenu, nangu ukulosha mano kuli imwe. ⁴⁶ Efyo mwaikele ku Kadeshi inshiku ishingi, inshiku shonse mwaikele mulya.