¹ Umfweni aya mashiwi ayo Yawe asosele kuli imwe, mwe bantu bakwa Israel, kulupwa lonse ulo nafumishe mu calo ca Egypt: ² ''Ninsala imwe mweka ukufuma mu ndupwa shonse ishapano sonde. Emulandu wine nkamikandila pa membu shenu shonse.'' ³ Bushe abantu babili kuti baendela pamo nga tabapangene? ⁴ Bushe inkalamo kuti yalila mumutengo ilyo taikwete icakutakanya? Bushe umusepela wa nkalamo kuti wa buluma mu bwikalo bwauko nga tapali ico ikeete nangu cimo? ⁵ Bushe icuni kuti caikatwa ku citeyo pa mushili nga tapali icikonkelelo kuli ceena? Bushe iciteyo cilafyampuka pa mushili ilyo tapali ico cikete nangu cimo? ⁶ Nga intandala yalila mu musumba, bushe abantu tabakatutume? Nga kwapona amacushi mu musumba, bushe Yawe tewatumine ico? ⁷ Mucishinka shikulu Yawe tacitapo icintu nangu cimo kano asokolola amapange yakwe kuba bomfi bakwe bakasesema. ⁸ Inkalamo naibuluma; nani uushatine? Shikulu Yawe nasosa; nani uushaseseme? ⁹ Bilisheni ici mumalinga yapa Ashhdod, na mumalinga ya mu calo ca Egypt; nokutila, ''Longaneni pamo pa mpili sha Samaria nokumona ifimfulunganya ifingi mu kati kakwe, ne milandu ya lufyengo iili muli ena. ¹⁰ Pantu bena tabeshibe ifyakucita ica lungama uku ekusosa kwa kwa Yawe abasunga ubunkalwe nokusansa ifipe mumalinga yabo.'' ¹¹ Eico, ifi efyo shikulu Yawe asosa: ''Umulwani akashinguluka icalo, kabili akawisha namalinga yobe nokupoka amaka yobe.'' ¹² Ifi efyasosa Yawe: ''Filya fine umucemi asompola mukanwa ka nkalamo amolu yabili nalyo icipimfya ca kutwi; efyo nabana bakwa Israel abekala mu Samaria bapusushiwe; bakashala fye pakafyemfye kaikatwa nangu icipimfya ca musengele.'' ¹³ Umfweni nokushimika ubunte mu ng'anda yakwa Yakobo - ifi efyo shikulu Yawe asosa, Lesa wamabumba: ¹⁴ ''Pantu mubushiku bulya nkakanda imembu sha bena Israel, nkakanda nefipailo fyaku Betele. Ne nsengo shakucipailo shikaputaulwa nokuponena panshi. ¹⁵ Nkonaula ne ng'anda ya munshita ya mpepo pamo ne ng'anda ya mulusuba. Amayanda ya meno yansofu yakaloba, kabili ama yanda ayakulu yakaloba-ifi efyasosa Yawe.