¹ Baporofita wi mbuzi batiya ku bayeyi, baruti wi mbuzi sheba mwanahare kuya kunwe. Wushe banjenisa shuwu sauka zututo izati sinya mani ba shapure indi Shikati ya mata bapanga. ² Shachopani, shaba shangane ku mana ka piri. Ba benji sheba bara qama mi yenduro awo yuwu shashi, mi shilibaka lyawo injira iyi njahamu shaba yixa. ³ Mi shitakazo awo yu wufumu ka yenwe, shebani kyitakye shamayi nguwu tali, kono ikaturo awo ya hwetuwa kare, kamuni sheyi mukye, muku fwa kwawo ka kukwasa. ⁴ Urezya ama fwere zuxuma manyiroi ingata fosa, kono matanga wusiza mulyuqho mashimina mawenge ngu karema ku twara ikaturo. ⁵ Hape amafwere zuxuma lyuvu lya kare. Kono mata yaka Nuwe yeye mu hweti yo muruka indi ba bamwe bali 7 inako pukali kulyeta muunda wata bbura lyuvu. ⁶ Urezya mata yatura minzi a Sodoma indi Gomora, shuku yi sinya indi ku yizwara mutwee atikya ibe ku mwenisa ku bahati tishira batiya. ⁷ Kono mata yaka Lota ikali mushiyamaikali ku swabanga mi yenduro awo, yu wuhure ba bayeyi bapa ba babbi. ⁸ Munyana yo muruka yikali ku para nawo, kali ku yuvwa wutuku mu mupupo akye wo mushiyama lyiba ni lyiba, pukali ku mwananga indi ku yuvwa zisi zawo zezi bbi. ⁹ Shikati ayi zire kura murera bayeyi ibati rapera kukwi qawuwa, indi ku bika ba babbi mwi nako yi katuro, kuba zipa ikoto. ¹⁰ Sihuru kuba kyenda shu wuparo wi nyama, shizi takazo zezibbi ibati bbisa Shikati. Bayeyi bapa mitima awo mizuwo imuba ku ywapa ku bbisa yo muqa. ¹¹ Manyiroi indi pungati tibbara ku qumu indi wukuru amanga ku hweta zi katuro iyati bbisa puwuso wa Shikati. ¹² Kono bayeyi bapa, nokoti imba nyawuya ibahati yuvwa izati para wuparo wi nyama. Izata pangirwa ku para indi ku bburuwa, bbiasa zitaba ziba hati zira mishebafwe kaze zibbi zi zawo. ¹³ Ba shangane akyopa mupuzo wu wubbi wawo. Shiba tishaka, kupara nuwu shashi indi wu shikati wati bbisa, bana wubbi bati shaka ku kitaka kwawo bashi lya nanwe. ¹⁴ A mesho awo ngayire wushashi, amaba ku kwana kuli pata ku shibe, shu wutali bati kwaka mitima awo yahali migi. Mi tima awo yata lifera ku shaka wufumu, abana shukuto! ¹⁵ Basinyi injira yi shiyama, bazimini kaba tyenda shi njira a Baremi mwana Bosori, imati shaka ku tambura ichimwe ku bababbi. ¹⁶ Kono aku qhapuruwa muku fosa kwakye- ka hashi katu hweta kucikisa wubbi wowu kuru wu wu porofita, shuku hweta shu lyiyi nokoti muyeyi. ¹⁷ Barwa bapa maqho ngara kini ami. madzudzo inga tyendisuwa ku makapa, mi wusipa wuka rema wabi shirwa wowo. ¹⁸ Kakuli batu hweta zitaba za kuli kakura, bati shemba shizi takazo zi nyama, indi shuwu shashi, bayeyi abaru kudzwa kubati para mwi mbuzi. ¹⁹ Bata basepisa ku para naqa, zini wowo bavuya baba bboro. Kakuti muyeyi muvuya ichuto kocho shati mubbara. ²⁰ Kakuli bashi ywapaiza masira zezibbi papeshi, shuku yiba Jeso Keresite, Shikati indi yamati yaka, mi bati pati shazo, indi ku kyira shazo, zitaba zi zawo zama menisizi shezibe zezibbi ku bbara izi tandzi. ²¹ Kali kuqa kuwo kambe amaba yibe injira uwu shiyama kubbara kuyi yiba indi kudzwa ku mirawo yemi chena yalyetuwa kuwo. ²² Bayerwi kwi taba yiti hweta zi nguli yi njahamu ya tikya, shungurube shataywa, shuku chena, shakali vumba mu mukyiri.