¹ Simoni Pitorosi, muvuya indi muporofita a Jeso Keresite, kubapa ibata yamuhera itumero iyati swana indi yetu, shilibaka lyuwu shiyama iwuna ku Rezya indi muyakuzi Jeso Keresite. ² Shishemo indi kozo zini yi njipire mwi ngana Urezya indi Jeso Keresite Shikati etu. ³ Mata akye, tandi putata pewaizati shakahara kozo zu wuparo indi wu rumeri, shilibaka lyi ku muyiba yeye yamata ti berashi liseli indi maata akye. ⁴ Sha zopa matatipa zi sepiso zezi kuru indi zuwu tokwa atikya shazopa tishangane ikabero kuzana nazo Shikati shuku banduka kuzo zubboro izina mu lyuvu shi shitakazo. ⁵ Shilibaka lyopani, ni pange munati kwena izuto zeziqa kwi tumero enu ku yekeza maata, ku maata ku yekeza ingana. ⁶ Kwi ngana ni yekezeko kuli pata indi kuli gisa, kuku ligisa indi yekeza kuku rapera. ⁷ Kuku rapera ni yekeze kuli shaka mani indi ku shaka bayeyi koowo. ⁸ Ati izuto zopani zina kokunwe indi ku kwira kokunwe, shezini kini kawo wutweli indi kwaha kwana ku bika zipata za mano anga Shikati etu Jeso Keresite. ⁹ Kono yo muku izuto zopa, mupofo amaku mwena koshire, kali ayibara ku chenisuwa kwa mata ngati chenisa zibe zakye za kare. ¹⁰ Nanga ndipakyo, bakwenga, nidzere ku wuso mukuli gisa, kakuli puna kwisi zopa kamuni shaniwe. ¹¹ Ni shipanga akyo shani puwe shibaka sheshi kuru, shika njena mu muwuso waha mana wa Jeso Keresite Shikati indi muyakuzi etu. ¹² Shilibaka lyopa, mbonda kuni yanakanisa shi zuto zopaninnga ndunwe ini zi yizire akyopa nanga nidnwe ba bagi mwi njahamu inina nayo. ¹³ Indi pundahati nahana atikya, ndati para mu munganda enu ndati swanera kuni tambusa shukuni yanakanisa zi tana. ¹⁴ Kanda yi zire atikya ndati swanera ku siya munganda wopani kapiri piri shamatandi zira Jeso. ¹⁵ Mani shandi pemere atikya pushe ndaku shakahara nibe ni shati ni yanakanisa zitaba zopa. ¹⁶ Ka kuti amata yendye shuzu nguli zata panguwa shuwu saukaputata ni yakuza za maata a Shikati etu Jeso Keresite indi kuya kwakye, kono tata limwena wu kuru wa kye shamesho etu. ¹⁷ Kakuti mata pewa ku Tatye likutye indi liseli inako yi karu kuyerwa lyizwi lyatidzwa kuliseli li kotuka ilyatikya yoo imwananga indati shaka indatiqha. ¹⁸ Inditswe tayuvu lyiyi lyopa oulyatidzwa kwi lyiiro, outarana nakyepwi kakumuko yi chena. ¹⁹ Hape tan lyiyi lyishi porofita lyelyigi ku bbara, lina ku panga naqa ku twara mu tima kokuklyo, nokoti irambi yati mwenisa mushibaka imuna karema, ku twara pakati lya masuku, inyata ushi chacha yati mwanahara mu mitima enu. ²⁰ Nanyina ni yibe atikya ku njemwa muporofita, yateri kuli zira ye halinee. ²¹ Kakuli mu mayiba ngakare wu porofita kawahali ku mwanahara shuku shaka ku muyeyi, kono bayeyi baru ku hweta ku Rezya pubaru kuyisiwanga shu mupupo chena.