Pasal 1

Surat ni Paulus eng kasa ketare-tare wia se jema’at waki
1 Waki si Paulus, kaa eng kepa’aran ni Empung si kineret minamuali rasul ni Kristus Yesus, wo si Sostenes, patuari ta, 2 wia se jema’at ni Empung waki Korintus, nyi’a i ti’i nisea se kinudusola witu si Kristus Yesus wo se kineret minamuali tou-tou kudus, ampit em baya ne tou waki e reiy’ sa mina’asa tampa, se maaleiy witu e ngaran ni Tuhan ta Yesus Kristus, nyi’a i ti’i si Tuhan nea wo si Tuhan ta. 3 E nupus karunia wo e le’os eng kale’osan waki si Empung, Ama’ ta, wo e waki si Tuhan Yesus Kristus e rumapitla nikouw.
Tetotoren syukur
4 Niaku ku reiy’ maena-ena’ matotor syukur wia si Empungku karengan nikouw witu e nupus karunia ni Empung neiy i anugerah-Nala wia nikouw witu si Kristus Yesus. 5 karengan wia Nisia kouw minekaya mouw witu e reiy’ sa mina’asa eng kapualitan: witu e minegheghioan tetotoren wo minegheghioan tine’u, 6 minatoroan ampit eng kasairian en tanume si Kristus, en tine’etepola witu e nelet miouw. 7 Tuana mouw kouw reiy’ sikareiy’awesan witu e nesa karunia tu’u kasuatan kouw ma’ena’la ni’i pa’ayola ni Tuhan ta Yesus Kristus. 8 Nisia kangkasi si laa tume’etepla nikouw i ka’ayo witu eng kesampetanna, i ka’ayo kouw reiy’ si walulang witu e nendo ni Tuhan ta Yesus Kristus. 9 Empung, si kimeret nikouw witu em paasa-asa’an ampit Sioki’-Na Yesus Kristus, Tuhan ta, nyi’a mouw si lale’.
Pinapete’an witu se jema’at
10 Ta’an niaku ku ngume’enge’la nikouw, patuari waya, kaa e ngaran ni Tuhan ta Yesus Kristus, rio kouw esa nga iyon esa nga totor wo te’a wawean em pinapete’an witu e nelet miouw, ta’an eng kapurikitna rio kouw rebet maesa’an wo esa nga ate esa nga ghenang. 11 Karengan, patuariku waya, niaku ku pinakite’uanola ne tou-tou waki ne me’urang ni Kloe en tanume nikouw, kaa e wawean em pinesali’isi’an witu e nelet miouw. 12 Em pemaksutkula nyi’a mouw, kaa nikouw siesa o siesa limila’: Niaku ku waki weteng ni Paulus. Ka’apa niaku ku waki weteng ni Apolos. Ka’apa niaku ku waki weteng ni Kefas. Ka’apa niaku ku waki weteng ni Kristus. 13 Sapa ku’a re’en si Kristus si minawete-weteng? Sapa ku’a re’en si Paulus si neiy i salibla karengan nikouw? Ka’apa sapa ku’a re’en kouw binaptis witu e ngaran ni Paulus? 14 Niaku ku matotor syukur kaa e reiy’la siesa tou tu’u kangkasi witu e nelet miouw si binaptisku ta’an i te si Krispus wo si Gayus, 15 i ka’ayo e reiy’la tou si toro lumila’la, kaa nikouw kouw binaptis witu e ngaranku. 16 O kangkasi se me’urang ni Stefanus niaku ku minaptis nisea. E reiy’ siwalina nisea niaku ku reiy’ mete’u, andi ku’a re’en sa waweane’ tou se binaptisku. 17 Karengan si Kristus si timoke niaku reiy’ kaa laa mebebaptis, ta’an kaa laa ma’abarla e Injil; wo e ni’itu tu’u e reiy’ ampit eng hikmat lelila’an, rio en salib ni Kristus te’a mamuali reiy’ sipenoron.
Hikmat ni Empung wo eng hikmat ni tou
18 Karengan em paabaran en tanume en salib memang e nyi’a mouw eng kawe’engelan wia nisea se laa mapuneng, ta’an i wee nikita si linawirla em paabaran i ti’i e nyi’a mouw eng kaketeran ni Empung, 19 Karengan wawean neiy i kepatik: “Niaku ku laa munengla eng hikmat ne tou-tou makahikmat wo eng kale’osan ne tou-tou sama’ e laa Ku re’inla.” 20 Waki wisa ku’a re’en sitou maka hikmat? Waki wisa ku’a re’en se kasasigha’ en Torat? Waki wisa ku’a re’en se mememero wia eng kaoatan i yi’i? Reiy’ ku’a re’en si Empung si simiwo mola eng hikmat eng kaoatan i yi’i e minamuali kawe’engelan? 21 Eng karengan eng kaoatan, witu en sama’ ni Empung, e reiy’ sumine’u si Empung karengan en sama’na, takar si Empung si mekepa’ar melelawirla nisea nu ma’eman kaa eng kawe’engelan em paabaran e Injil. 22 Se tou-tou Yahudi se mepa’arla eng kowa’ wo se tou-tou Yunani se masero eng hikmat, 23 ta’an nikeiy keiy maabarla si Kristus neiy i salibla: i wee se tou-tou Yahudi e nesa watu kasu’usu’an wo i wee se tou-tou reiy’ Yahudi e nesa kawe’engelan, 24 ta’a i wee nisea se kineret, le’os tou Yahudi, ka’apa tu’u reiy’ tou Yahudi, Kristus nyi’a mouw si kaketeran ni Empung wo si hikmat ni Empung. 25 Karengan e we’engel waki si Empung e lebe wangko’ en sama’na ta’an sitou wo e lewea’ waki si Empung e lebe ente’ ta’an sitou. 26 Ghenangenola, patuari waya, kumura eng ka’ada’an niouw, eng katoroan nikouw nu kereten: i ki’it e nukuran ni tou e reiy’ laker se tou sama’, e reiy’ laker se tou makaule, e reiy’ laker se tou kasa paloo’o-loo’on. 27 Ta’an sapa e we’engel i wee eng kaoatan, em pineleng ni Empung kaa laa mapairangla se tou-tou makahikmat, wo sapa e lewea’ i wee eng kaoatan, em pineleng ni Empung kaa laa mapairangla sapa e nente’, 28 wo sapa e reiy’ palo’o-loo’on wo en sero’ i wee eng kaoatan, em pineleng ni Empung, awes tare sapa e reiy’ sipenoron, em pineleng ni Empung, kaa laa merere’ila sapa e maka penoron, 29 rio e reiy’la siesa tou tu’u si mesawa’la en tou witu en sinaru ni Empung. 30 Ta’an eng karengan Nisia o kouw witu si Kristus Yesus, kaa eng karengan si Empung si minamuali mouw sama’ i wee nikita. Nisia si minulitla wo kimudusla wo timubuus nikita. 31 Karengan e ni’itu tanu wawean neiy i kepatik: “Seiy i te si mesawa’, satorona nisia si sumawa’ witu si Tuhan.”