¹ Sa taintu, sapa reen lembena setou Yahudi? Kaapa sapa nuntungena sa si nunatou? ² Laker karengan witu laker mamuali, wia nisea te se pinercaya firman Empung. ³ Wo sa se pira tou se raai mapercaya, sapa itu ka ndaai percaya nea matal kasetiaan ni Empung? ⁴ Niitu kasa raai! Si Empung tiin si ulit, maane setou se towo tanu nyai patik: "Nikau ulit tunggorem pailaamu, nikou-kou muntung sa setou mahakim nikou," ⁵ Taan, sa ndaai ulit-eta, niitu tumuru kaulitan ni Empung, sapa lilaata? Torokan kita lumila ka si Empung raai adil, ka si minehemong nukuman wia nikita? (Nyaku maila taintu, kutanu setou-te) ⁶ Ndaai karengan niitu! Sa taintu kumura si Empung mahakim kaoatan? ⁷ Taan sa limalan witu katowoangku, kaulitan ni Empung mako makaasar nisia, kaaku torope hakimen tanu si tou masiwo dosa? ⁸ Wo, (Tanu fitna ne tou wia nikai) kaa raai lumila, "Maimong ta sumiwo lewo, rior pailaan gelewo mai witu kalewoan tiin." Se maila taintu se war hukumen. ⁹ Wo sapa? Sapa talebe geleos taan setou walina? Niitu ndaai karengan, ka nikai limilaamong katare, ka leos sia tou Yahudi kaapa si tou raai Yahudi pakasaan se witu waya mbawa ndosa. ¹⁰ Tanu nyai patik: "Ndaai wana si tou maan esate, si masiwo nulit, esate tou ndaai wana. ¹¹ Ndaai wana si esa tou si wewehan akal budi. Ndaai wana si esa tou si masero Empung. ¹² Pakasaan setou se minutaroumei wia nisia, nisea mawali-wali mamuali raai si kaaraan. Ndaai wana si esa tou masiwo geleos, ndaai wana si esa tou." ¹³ Keroan nea tanu boang kubur ngimanga lila nea makiupus, mbisa ni loloi witu wihimi nea. ¹⁴ Suma nea minawuta kutuk wo pait. ¹⁵ Nae nea repet matitia ndaha. ¹⁶ Kapeendisan, kakemuan witu lalan nea. ¹⁷ Wo se raai makailek sakumura matou-tou witu gorem damai. ¹⁸ Ninde wia si Empung ndaai witu riorako weren nea. ¹⁹ Tarekan ta makailek, ka sapa te nyai lila ni Nukum Taurat, nyai wehe wia nisea, se witu bawa Nukum Taurat, makar tu mapenet suma nea, wo kaoatan witu bawa pahakiman ni Empung. ²⁰ Ndaai wana si tou si uliten tu sinaru ni Empung, kaampit makiit Nukum Taurat, ka witu makiit Nukum Taurat, mai kumenal dosa. ²¹ Taan tarekan maan raai wana Nukum Taurat, kalilitan Empung nyainong nyata, wo nyai saksi witu buk taurat, wo se nabi-nabi. ²² Ndaai te niitu, taan kaulitan Empung limalan witu iman wia si Kristus Yesus, nyai wehe witu se pakasaan tou percaya ka ndaai wana si minalaengan. ²³ Ka pakasaan setou se mina berdosamong wo se kinalionganong pengasa-ngasaran ni Empung. ²⁴ Wo sea uliten kaampit leos karunia-Na, nyai nate wehemei taintu, lumalan witu tinubus tunggorem Yesus Kristus; ²⁵ Nyaimong nyata ni Empung kalolohoan karengan mamuali lalan maleleosan tunggorem ndahana witu iman. Nyaai timuru witu kaadilan-Na ka witu te kasabaran-Na, si Empung si minayamong dosa-dosa timuur reemei rior pinasiwo-siwo. ²⁶ Nyaai waya kahai patoro matuturu kaadilan-Na wia no ras yaai rior nisia mamuali bukti ulit wo maulit setou ma-iman wia si Yesus. ²⁷ Sataintu, wisape peloo-loor nawak-eta? Nyainong rou-roume nukum sapa? Kaapa nukum peniwo-niwonta? Ndaai, taan niitu nukum iman! ²⁸ Niitumong, nyaai mong percayanta, ka si tou si uliten te witu sinaru ni Empung ka iman, ndaai witu peniwo-niwonta dumasar witu Nukum Taurat. ²⁹ Kaapa, sapa si Empung tiin si Empungete ne tou Yahudi? Ndaai reen nisia kahai si Empung ne tou raai Yahudi? En! Sia kahai si Empung ne bangsa raai Yahudi, ³⁰ ka si Empung tiin si eta te, wo sia si mulit setou-tou se sinunat tu iman, wo se raai sinunat limalan witu iman. ³¹ Wo, sapa kai mararai Nukum Taurat lumalan witu iman? Ndaai karengan, putarei, nikai kai maente Nukum Taurat tiin.