¹ Niitumong nikau ndaai mong toro lumila sapa, kauntou, sei te si mahakim si tou walina, ka witu kou mahakim nisia, kou kahai mahukum nawak-Emu, ka, nikau si mahakim tiin kahai masiwo sapa-sapa masuat. ² Kailekan ta pahakiman ni Empung, nyai nawu kaampit nadil witu natas pakasaan setou, se masiwo waya-waya tanu niitu. ³ Taan, sapa kau mailape torope kaweta witu pahakimen ni Empung, ei kauntou niitu nikau si minakim nisea, se masiwo waya tanu niitu, taan kahai masiwo masuat. ⁴ Kaapa, sapa kau maanggap porar kakayaan kamurahan na, kasabaran na, ka selaan natena, wo raai makailek ka kaleosan ni Empung, matoro witu nisia mapimpin nikau mako witu patobatan? ⁵ Taan ka kaketean rookos niu, wo nate niu, taak matobat, nikau simimpangou nupi lewo tu natas nawak-emu sandiri, witu nendo kamurkaan sa itu pahakiman nulit wia si Empung nyata mei. ⁶ Nisia si maer pakasaan setou, kiit peniwo-niwon nea sandiri, ⁷ niitumong katotouan ndaai si kaapuan, witu nisea sekaampit katahangan nea masiwo leos masero pengasa-ngasaran wo kaormatan, ⁸ taan nupi wo karanguan wia nisea se paarete mawewesu nawak sandiri wo raai makiit nulit, se paarete masiwo ndaai kaulitan, ⁹ se makaindo kasusaan, wo kasiksaan tu natas pakasaan mukur nea se masiwo lewo, katare-tare witu setou-tou Yahudi wo setou kahai Yunani. ¹⁰ Taan pengasa-ngasaran, kaormatan wo damai sejahtera, niitu wehe witu setou masiwo leos, katare-tare wehe witu setou-tou Yahudi, tumondongako setou Yunani. ¹¹ Ka si Empung si raai menisir tou. ¹² Wehe witu setou-tou masiwo ndosa, ndaai kumenal Nukum Taurat, sea semaapu ndaai make Nukum Taurat. Taan masiwo dosa tumbawa Nukum Taurat se akimen kiit Nukum Taurat. ¹³ Ka ndaai se melinga nukum taurat se uliten, tu sinaru ni Empung, taan setou makiit nulit nukum tiin senyata mako ulit. ¹⁴ Ka witu sea setou raai Yahudi, se raai si Nukum Taurat se makelangete makiit kailekan nea sapa patuntuten Nukum Taurat tiin, witu nisea, se raai wana Nukum Taurat sea se wewehan Nukum Taurat wia nawak sandiri. ¹⁵ Nyaai waya timuru ka pasiwo-siwoan Nukum Taurat tiin nyai kapatik witu nate nea sandiri, wo witu gorem nate nea mawehe kasaksian, wo genang nea, sea mokan sematutuduan kaapa mabela nisea. ¹⁶ Witu nendo si Empung mahakim genang-genang ne tou nyai kasindek, lumalan si Yesus Kristus kiit kaampit ninjil-Eku. ¹⁷ Taan sakau, maila nawak-emu tou Yahudi, wo gimantong witu Nukum Taurat wo gumeleos tu gorem ni Empung, ¹⁸ makailek kapaaran na, wo mapaar kaleosan niajarou Nukum Taurat. ¹⁹ Wo parcaya ka nawak-emu mamuali penuntun wia nisea se letok, wo mamuali terang wia nisea se witu pe karimbunan, ²⁰ pengajar witu setou-tou wengel, guru witu setou-tou raaipe tu'a, wo ka wewehan kapandean, wo laker kailekan kaampit kaulitan tunggorem Nukum Taurat. ²¹ Wo ei kau, se mahajar setou walina, kaa kau raai mahajar nawak niu sandiri? Nikau mahajar nisea raai toro marongkit, ndaai reen maan nikau marongkit? ²² Nikau malarang setou masiwo zina, ndaai reen maan nikau masiwo zina? ²³ Nikau meloor-loor Nukum Taurat, taan mawehe makairangen si Empung, nikau malawet nukum-ena! ²⁴ Ka tanu nyai patik: "Ngaran ni Empung pahujaten ne bangsa-bangsa walina ka nikau." ²⁵ Sunat tiin wewehan nargana, sakau makiit nulit Nukum Taurat, taan sa kou tou melawet Nukum Taurat, sunatemu tiin mamuali raai sinunat. ²⁶ Niitumong sa si raai sinunat sumiwo prentah-prentah tu gorem Nukum Taurat, ndaai reen si tou raai sinunat tiin si rekenong sinunatou? ²⁷ Wo kaapa raai si tou raai sinunat witu nawakena, sa sia makiit Nukum Taurat sia si maakim nikau, si tou maan sia makataintu Nukum Taurat wo sinunat, taan si malawetekan nukum? ²⁸ Ka si pailaan Yahudi karengan, ndaai si tou palolohon wia luar nate, wo sunat makiit karengan nulit ndaai sunat witu nawak-ena te. ²⁹ Si tou Yahudi karengan sia mong si tou witu gorem natena ulit karengan Yahudi, wo sunat nulit karengan niitumong sunat witu gorem nate pakelang ni Roh, ndaai nukum nyai patik. Palooran witu si tou tanu nyaai, ndaai minai wia si tou, taan minai wana si Empung sandiri.