¹ Paulus hamba Yesus Kristus, si tinowa mamuali rasul, nyai sandiri mako witu ninjul Empung. ² Si nyai nong kawar ni Empung katare-tare, limalan witu senabi-nabina witu buk suci, ³ kumura si okiina, sa kumiit leo na mina tou witu taranak ni Daud. ⁴ wo nyai nyata, tanu oki ni Empung si makuasa limalan witu katotouran na witu nantara ne tou minate, kiit Roh Kakudusan, siamong Yesus Kristus Empung eta. ⁵ Lumalan witu nisia, nikai makaindo anugerah wo jabatan karasulan maali kataatan iman, witu nantara se bangsa-bangsa raai Yahudi ka ngaran-Ena, ⁶ kauntep nikau si tinowa mamuali taintu ni Kristus Yesus. ⁷ Wia nikau waya wia Roma yaai, kaupus ni Empung, wo tinowa mamuali tou-tou kudus. Anugerah wo damai sejahtera, wia nikau witu si Empung Bapa-ata, wo wia si Empung Yesus Kristus. ⁸ Katare-tare nyaku mehe syukur witu si Empung-Eku lumalan witu Kristus Yesus witu nikau waya ka iman niu nyaimong nyata wia pakasaan kaoatan. ⁹ Ka si Empung palayanengku, kaampit Roh-Eku, tunggorem ninjil okiina mina muali saksi wia nyaku ka nyaku, ku raai mena' magenang nikau, ¹⁰ witu gorem sombayangeku, nyaku raai mena maki wehe, satoro tarekan yaai, witu kapaarante ni Empung, nyaku toro mai wia nikau. ¹¹ Nyaku, ku paar karengan mahilekan o nikau, rior nyaku toro mehe karunia rohani maente nikau. ¹² Niitu rior tatoro enteen mawali-wali tu imaneta sandiri-sandiri, leos witu imanemu kaapa iman-eku. ¹³ Patuari-patuari, rior tu kailekan niu, ka nyaku makapiramong marencana maai wia nikau, taan wehane mahape makar tarekan, rior nyaku kahai toro mupu wia nantara niu, tanukan kahai tu nantara ne bangsa-bangsa Yahudi walina. ¹⁴ Nyaku, ku wewehan nutang witu setou Yunani, wo witu setou bar-bar, wo witu setou pande kaapa witu setou wengel. ¹⁵ Niitumong ku paar karengan mahabar ninjil, wia nikau, kau wia Roma yaai. ¹⁶ Nyaku, ku raai mairang witu ninjil, ka ninjil tiin niitumong kuasa Empung, tu kalempotan ni tou mapercaya, katare-tare setou Yahudi, wo mako witu setou Yunani. ¹⁷ Ka witu goremena, kaulitan ni Empung nyai nyata witu iman mako tu iman, tanu nyai patik, "Tou makiit nulit si tumou wia iman." ¹⁸ Ka, nupi ni Empung, palohomei na surga witu pakasaan lewo pasiwon, wo kalewoan ne tou, se matekan kaulitan, kaampit kalewoan nea. ¹⁹ Niitumong, sapa toro kailekan kumura si Empung, terangou wia nisea ka si Empung si nyatamong wia nisea, ka si Empung si timuruumong wia nisea. ²⁰ Tumuureemei siniwo kaoatan yaai, kumura si Empung ndaai kalohoan, niitu kuasa-na, ndaai si kaakaran wo kumura kailahian-na, palolohonong tu kailekan nyu mata witu pakasaan siniwo na makar nisea raai toro maindo nalasan. ²¹ Taan, maane sea kumenalou si Empung, taan ndaai maormat nisia, tanu sia Empung kaapa mawehe syukur wia nisia, putarei, gegenangan nea mamuali raai si kaaraan, wo nate nea wengel tiin minamuali rimbun. ²² Se mengila-ngila tou pande taan se wengel, ²³ wo sumawel pa asa-asaran ni Empung ndaai wana si resik, kaampit gambar-gambar ne tou fana, burung-burung, tayapo nae epat, kaapa se tayapo raai si nae. ²⁴ Niitumong si Empung sumerakan nisea witu kapaaran nate nea si mapaar kacemaran makar nisea macemar nawak nea sandiri-sandiri. ²⁵ Ka nisea se si mawel kaulitan ni Empung kaampit katowoan, wo sea matuutuk wo masembah se makluk siniwo, ndaai si simiwo si palooren makaure-ure, nulit. ²⁶ Niitumong, Empung sumerakan nako nisea witu kapaaran-kapaaran gelewo ka se wewene-wewene nea masawel nubungan wajar wo ndaai wajar. ²⁷ Taintukan kahai se tuama, sea kahai tumelaau nubungan wajar o si wewene taan malaya-layas tu gorem kapaaran tu sinaru ni esa wo se walina, tuama o si tuama masiwo paayangen makairangen wo witu gorem nawak nea sandiri, nisea se tumerima nukuman witu dosa-dosa nea. ²⁸ Wo ka nisea setia ma aku si Empung witu kapandean nea, wo si Empung sumerakan nako nisia witu magena-genang gelewo makar sea sumiwo sapa-sapa, nulitena ndaai toro siwon nea. ²⁹ Nisea se wuta o segala macam ndaai ulit, kalewoan, sorookep, kasesoan, wuta o dengku, mawunu, matotokol, ma loho, nisea se mahabar towo, ³⁰ mafitna, maseso si Empung, kasar, penombongan, laker suma, masero kalewoan, raai malinga se tu'a sandiri, ³¹ wengel, raai setia, raai si perasaan, wo kejam. ³² Wo maan tu kailekan nea natoran ni Empung limila, ka setou masiwo tanu nyaai waya, sea se pantas mate, nisea ndaai te meniwo-niwo niitu taan kahai se maruur setou masiwo taintu.