¹ Nyaku, ku meloor nawak maane niitu ndaai se kauntungan. Nyaku ku memehe-mehe mako peloho-lohon wo pernyataan-pernyataan wia si Empung. ² Nyaku makailek si tou tunggorem Kristus, niitu witu maplo epat ngataun limangkoimong mong si nialimong na surga tingkat katelu, sapa mbitu gorem nawak-ena ndaai kailekangku, kaapa mbitu luar nawak-ena, ndaai kailekangku, si Empung-ete si makailek. ³ Wo kailekangku kumura si tou yaai, sapa sia tunggorem kaapa witu luar nawak-ena, ndaai kailekangku si Empung-ete si makailek. ⁴ Sia niangkat na Firdaus wo liminga paila ndaai palilingan, ndaai toro lila ni tou. ⁵ Wia si tou tiin nyaku meloo-loor, taan wia nawak-eku sandiri nyaku raai maloo-loor, waya te witu kalemahan-kalemahangku ndaai. ⁶ Taan saaku paar meloo-loor, nyaku ku raai mamuali tou lengei, ka nyaku mako lumila, kaulitan. Taan nyaku matatahang rior ndaai si tou lumoho nyaku lumembe witu linoho nea kaapa kumura nisea liminga nyaku. ⁷ Ka mategham rior nyaku raai kasa meloo-loor witu pernyataan-pernyataan makaerangen tiin, wo nesa tutuek nyai wehemei witu leonaku, niitu pereho ni Iblis, mai masususa nyaku rior nyaku raai meloo-loor nawak. ⁸ Witu nyaai waya nyaku makiwehe wia si Empung minakatelu, rior hal niitu tumelaaume nyaku. ⁹ Taan nisia lumila wia nyaku, "Anugerah ku minakarou wia nikou, ka kuasaku sinempurna tunggorem kalemahanu." Niitumong nyaku ku kasa senang maloor kalemahangku, rior kuasa ni Kristus mena wia goremeku. ¹⁰ Niitumong, nyaku mapendam senang tu kalemahangku tunggorem kasiksaan, tunggorem kaapeendisan, tunggorem peleo-leongan, wo tunggorem kaapeendisan wo si Kristus. Ka witu nyaku raai si keter, witu nyaku mapendam ente. ¹¹ Nyaku ku minamualimong tou lengei, ka nikau mapaksa wia niitu, sa indonei nulit nyaku woan ku looren niu. Ka nyaku raai kimurang sapa-sapa bandingenei se rasul-rasul se luar biasa tiin maane nyaku raai si sapa-sapa. ¹² Tanda-tanda mabubukti niitu wia si rasul nyainong papaloho wia nikau witu pakasaan katabahan niu tu gorem tanda-tanda, mujisat-mujisat, wo makaerangen-makaerangen. ¹³ Ka witu gorem sapa nikau pemawa-mawa ne jemaat-jemaat walina, kacuali nyaku ndaai minuter wia nikau? Ampungan o mei witu raai si kaadilan wia nyaku. ¹⁴ Tarekan nyaku simiapou mako tu nikau witu katelu yaai wo nyaku raai mamuali wuter wia nikau, ka nyaku raai menero sapa-sapa witu taintu niu, taan nikau te. Ka se oki-oki se raai wajib maharur harta witu se tu'a nea, taan se tu'a merur wehe se oki-oki nea. ¹⁵ Wo nyaku kaampit kasenangan nateku, mehe taintuku wo nawak-eku wia nikau. Saaku kasa maupus nikau sapa nikau raai maupus nyaku? ¹⁶ Taan, maane nyaku raai muter nikau, nikau mailaate ka nyaku tou lihu wo timaan weetes kaampit katowoan. ¹⁷ Sapa nyaku minindomong untung wia nikau lumalan witu setou-tou nyai ku rehomei mai tu nikau? ¹⁸ Nyaku dimesar si Titus mangemong, wo rumeho si patuari nai mange mawali nisia. Sapa si Titus minindo untung wia nikau? Sapa nikai raai makelang tunggorem roh masuat wo makelangete witu gorem tanda nae masuat? ¹⁹ Wo, sapa nikau uremo memiki-mikir ka nikai mabela nawak sandiri wia nikau? Nikai masirita tu sinaru ni Empung tunggorem Kristus, taan nyaai waya, nikau kau kaupuseku ka mawawangun nikau. ²⁰ Ka ku mainde, sa witu nyaku mai, nyaku kumako sumero nikau ndaai tanu paarapengku, wo nikau raai kasumpak nyaku tanu paarapen niu. Tia-tia wewehan patotokolan, madedengkian kaupian, paarete nawak sandiri, mafitna, desas-desus, kasombongan wo kakacauan. ²¹ Nyaku mainde, saaku mai sumaup, si Empung-Eku si mehemako nyaku tumbawa tu sinaru niu, wo nyaku masusa karengan witu se laker tou, riorako se minaberdosa mong akar tarekan se tia mabertobat witu kanajisan, percabulan, hawa nafsu siniwo nea waya.