¹ Nyaku maharap, nikau sumabar wia nyaku, witu noki kalengeiangku wia nikau, kau simabarou wia nyaku. ² Ka nyaku mapendam mateir wia nikau witu teir ilahi ka nyaku timunangngou nikau o si esa kaawu tuama nisia si simembah mako nikau, tanu si wewene pocipe wo sucipe witu si Kristus. ³ Maan nyaku mainde katia masuat o si loloi witu kalicikanna timowo witu si Hawa, taintukan kahai gegenang niu ka liongena witu katulusan wo kaberesian mengiit tunggorem ni Kristus. ⁴ Ka nikau sabarete witu si tou mai wo mahabar sa kumura si Yesus, walina, minalaengan tu pahabar nai kaapa nikau makaindo roh walina, ndaaipe pina terima-terima niu, kaapa Injil walina ndaaipe pinalinga-linga niu. ⁵ Sa kumiit nyaku, nyaku ku raai si kurang witu se rasul makaerangen tiin. ⁶ Maan nyaku raai tou pande witu mengila-ngila, taan ndaai taintu witu pengetahuan, ka witu sapa-sapa toro siwon, nikai timuruumong wia nikau witu pakasaan hal. ⁷ Kaapa sapa nyaku simiwomong ndosa, witu nyaku minawa nawak eku sandiri rior nikau toro rakek-ako, ka nyaku mahabar Injil ni Empung wia nikau tu ndaai pawaeran? ⁸ Nyaku marampok jemaat-jemaat walina, kaampit tumerima gaji wia nisea ka malayani nikau. ⁹ Wo witu nyaku mawali-wali nikau, wo masusa karengan nyaku ku raai minuter si sei te sia, ka se patuari-patuari se minai tu Makedonia se mawehemei pemandungengku. Wo witu waya-waya, nyaku mayahagha nawak eku rior ku raai mamuali kawuteran wia nikau, wo nyaku memehe-mehe masiwo taintu. ¹⁰ Tanuakan kaulitan Kristus wia gorem-eku, paasa-asarangku yaai ndaai kaapean witu wilayah Akhaya. ¹¹ Kaa? Sapa ka nyaku raai maupus nikau? Si Empung ete si makailek niitu! ¹² Taan, nyaku ku memehe-mehete masiwo sapa itu toro siwongku makar nyaku toro, rumangkutako kasempatan wia nisea mapaar kasempatan ka kinaindoan masuat o nikai witu sapa-sapate, paasa-asaran nea. ¹³ Ka setou-tou tanu niitu seamong se rasul-rasul towo se memaayang ruci, se timowo masar se rasul-rasul Kristus. ¹⁴ Taan nyaai ndaas simiwo nisea kasenge, ka si Iblis kahai si timowo minamuali tanu se malaikat terang. ¹⁵ Niitumong, ndaai mamuali nyaku kasenge, sa pakasaan se pelayanan kahai se tumowo masar tanu se pelayan kaulitan, wo witu kamurian nisea tiin se makaindo masuat wo pineniwo-niwo nea mei sandiri. ¹⁶ Makasape nyaku lumila, tia wewehane si esa tou maanggap nyaku yaai tou lengei. Maane taintu terimanome nyaku tanu si tou lengei rior nyaku kahai toro mabangga maan okiite. ¹⁷ Sapa pailaaku witu gorem kumura kayakinan witu paasa-asaran yaai, nyaku raai maila tanu kapaaran ni Empung, taan tanuate tunggorem kalengeiyan. ¹⁸ Laker tou se menombo-nombong witu leona. Wo nyaku kahai ku menombo-nombong. ¹⁹ Ka nikau taulousou bijaksana makar kaampit sumenang nate niu, sumabar witu setou lengei! ²⁰ Nikau sumabarou, sa wewehan tou se mahamba nikau, lumoombot nikau, mahindo untung wia nikau, masosombong nawak, kaapa sumepe gio niu. ²¹ Kaampit makairangen karengan nyaku lumila ame ka nikai talousou weles witu niitu! Taan sapate niitu sumiwo setou walina brani menombo-nombong. Nyaku maila tanu setou lengei, nyaku kahai berani. ²² Sapa nisea tiin tou Ibrani? Nyaku kahai. Sapa sea tou Israel? Nyaku kahai. Sapa nisea taranak ni Abraham? Nyaku kahai. ²³ Sapa se malayani si Kristus? Nyaku lumembe niitu. Nyaku ku mengila-ngila tanu si tou seno, kawenduangku kasa laker, limembe nyaku witu penjara. Pemewe-meewelen ndaaimong karekenan, tai-taimong witu bahaya patean. ²⁴ Witu setou-tou Yahudi, minakalima nyaku tumerima epat ngapulu inaanei esa pasamboken. ²⁵ Makatelu nyaku weewelen nea o pondos, makasa nyaku linahawa mbatu, makatelu nyaku wehe nea tu natas kapal kimandas, esa ngawengi wo sangaendo, ku pelonta-lontai balolong witu laut. ²⁶ Makalaker nyaku tunggorem pakelangang-ku ku masaru bahaya, witu salu, ne parampok, witu pihak setou Yahudi wo witu setou-tou raau Yahudi. Nyaku paancamen mbahaya witu kota, witu padang belantara, witu laut, wo kahai bahaya witu se patuari-patuari towo. ²⁷ Nyaku ku memendu-mendu wo mapaayangwuter, tetap pajagan, matahang naharem wo reo, satoro na ndaai wana si tikohon, matahang nemel wo ndaai wana si lalambungen. ²⁸ Wo lumaengako niitu, wewehan kan kahai masala susur nendo minamuali tanggong jawab-eku witu mapipiara se jemaat-jemaat. ²⁹ Sei si weles, taan nyaku ku raai weles? Sei si kanawu, wo nyaku raai masusah? ³⁰ Saaku toro masosombonge, nyaku ku masombong witu sapa-sapa maturu witu kalengeianku. ³¹ Empung wo Bapa Empung Yesus si peloo-looren makar kaure-ure, makailek ka nyaku raai matowo. ³² Witu Damaskus si gubernur tumibawa ni Raja Aretas si maawas kota Damaskus ka matitimboi nyaku. ³³ Taan nyaku nyai tumpamei, witu nesa karanjang witu tetemboan, beton, makar nyaku kaweta tu lawas-ena.