7

¹ Вынъёсы,тӥ уд шат тодӥське, - тае законэз тодӥсьёслы верасько - закон кузёяське адямиен, куке со улэп?

² Бызем кышномурт герӟямын законэн улэп кузпалыныз, но ку картэз кулоз, соку кышномурт герӟямын ӧвӧл ини соин законэн.

³ Соин ик, картэз улэп дыръяз бызиз ке мукет пиосмуртлы, калгись кышномуртэн нимамын луоз, нош картэз кулӥз ке, со куспалъяськон законлэсь мозмемын, но мукет пиосмуртлы бызиз ке, калгись кышномуртэн уз лыдъяськы.

⁴ Озьы ик тӥ но, вынъёсы, законлы кулӥды Христослэн мугорыз пыртӥ, нош али тӥ, Инмарлы емыш ваён понна, кулэмысь улӟыса султэм Иисус Христослэн луиськоды.

⁵ Куке ми мугорлэн куронэзя улӥмы, соку сьӧлыко мылпотэмъёс, кудъёссэ закон адӟытылӥз, кузёяськылӥзы асьмелэн мугормылэн люкетъёсыныз, кулонлэсь емышсэ вайён вылысь,

⁶ нош табере, кулыса закон понна, кудыныз асьмеос керттылэмын вал, мозмытскимы солэсь, но али, букваен ӧвӧл, нош выльдӥськем духен Инмарлы служить кариськомы.

⁷ Мар вераны? Шат сьӧлык закон бордысь потэмын? Ӧвӧл. Нош сьӧлыкез мон тодӥ закон пыр гинэ. Мон ӧй но тодысал муртлэсь мылкыд каронъёсты, закон ке ӧй верасал:" Муртлэсь мылкыд эн кары".

⁸ Нош сьӧлык, заповедьысь адӟем карыса, мон пушкун кылдытӥз котькыӵе мылпотэмъёс, малыке шуоно сьӧлык законтэк улэп ӧвӧл.

⁹ Куке-но мон законтэк улӥ, нош ку вуиз заповедь, сьӧлык улӟиз,

¹⁰ нош мон кулӥ, озьыен заповедь, кудыз сьётэмын вал мыным улыны, монэ кулонэ вуттӥз

¹¹ уго сьӧлык, адӟем карыса заповедьысь, пӧяз монэ но со пыртӥ вииз.

¹² Соин ик закон святой, заповедь но святой, шонерлыко но ӟеч.

¹³ Озьыен, шат ӟечез мон понна кулон вайись луиз? Ӧвӧл, нош сьӧлык, аслысьстыз пуштроссэ ӟечез пыртӥ возьматыса. монэ кулонэ вуттэ. Озьы бере,заповедь пыртӥ усьтӥське сьӧлыклэн кышкыт пуштросэз

¹⁴ Уго асьмеос тодӥськомы, Инмарлэн законэз духовной шуыса, нош мон мугоро, сьӧлыклы вузамын.

¹⁵ Мон уг валаськы, мар лэсьтӥсько, уго уг лэсьтӥськы сое, мае лэсьтэме потэ, нош лэсьтӥсько сое, мае адӟемпотӥсьтэм карисько.

¹⁶ Нош лэсьтӥсько ке сое, мае лэсьтэме уг поты, соку законэн соглаш луисько, со ӟеч шуыса,

¹⁷ соин ик мон уг ни лэсьтӥськы, нош мон пушкын улӥсь сьӧлык лэсьтэ.

¹⁸ Тодӥсько уго, мынам мугоры пушкын ӟечез уг улы, малыке шуоно мынам вань мылкыды лэсьтыны ӟечсэ, нош уг быгатӥськы лэсьтыны сое.

¹⁹ Ӟечсэ, кудзэ мылкыд карисько, уг лэсьтӥськы, нош уродзэ, кудзэ лэсьтэме уг поты, лэсьтӥсько.

²⁰ Мае лэсьтэме уг поты сое ке лэсьтӥсько, сое мон ачим уг ни лэсьтӥськы. нош лэсьтэ мон пушкын улӥсь сьӧлык.

²¹ Озьыен, мон валай законэз: куке лэсьтэме потэ ӟечсэ, монэ кыске лек ужзлы

²² Уго мон аслам пушкысь адямиеным Инмарлэсь законысьтыз шумпотон басьтӥсько,

²³ нош мугорылэн люкетъёсаз мукет законэз адӟисько, кудыз пумит султэ мынам йырвизелэн законэзлы но мынам мугор люкетъёсам кузёяськыса, монэ сьӧлыко законлэн пленаз возе.

²⁴ Шудтэм мон адями! Кин мозмытоз монэ та кулоно мугорылэсь?

²⁵ Тау карисько асьмелэ Инмармес асьмелэн Кузёмы Иисус Христос пыртӥ.

²⁶ Озьы бере, мон аслам йырвизьмыным Инмарлэн законэзлы тыршисько, нош мугорыным - сьӧлыклэн законэзлы.