28

¹ Ортчиз суббота. Шунды ӝужаку арнялэн нырысетӥ нуналаз Мария Магдалина но мукетыз Мария лыктӥзы учкыны шӧйгуэз.

² Но тани, туж зол музъем зурказ, малыке шуоно ангел васькиз инмысь.Со лыктӥз но палдуртӥз изэз шӧйгулэн ӧсэз дорысь но пуксиз со вылэ.

³ Нош тусыз Солэн вал чилектэм кадь, но дӥсез Солэн - тӧдьы лымы кадь.

⁴ Солэсь кышкаса, возьмаськисьёс куалекъяны кутскизы но кулэм кадь луизы.

⁵ Ангел нош, кышномуртъёслы вазиськыса вераз:"Эн кышкалэ, мон тодӥсько, тӥ утчаськоды кортӵогам - Иисусэз.

⁶ Татын Со ӧвӧл - Со улӟыса султӥз, кызьы вераз вал. Лыктэлэ, учкелэ со интыез, кытын кылле вал Кузё,

⁷ но мынэ ӝоггес, вералэ Солэн дышетскисьёсызлы, Со улӟыса кулэмысь султӥз но витёз тӥледды Галилеяын. Отын ик адӟёды Сое. Тани, мон верай тӥлед".

⁸ Но, шӧйгуысь туж ӝог потыса, соос кышкаса но туж зол шум потыса бызьыса мынӥзы Солэн дышетскисьёсыз доры.

⁹ Куке соос мыно вал вераны Солэн дышетскисьёсызлы, тани, Иисус пумитаз соосты но шуиз:"Шумпотэ!" Но соос матэ лыктыса Со доры, Солэн пыдъёсыз борды кутскизы но йыбырттӥзы Солы.

¹⁰ Соку вераз соослы Иисус:"Эн кышкалэ. Мынэлэ но вералэ Мынам вынъёсылы, соос мед мынозы Галилеяе шуыса, отын соос адӟёзы Монэ".

¹¹ Куке нош соос мыно вал, соку кӧняке шӧйгу возьмасьёс, городэ пырыса, веразы первосвященникъёслы ваньмыз сярысь, мар луиз.

¹² Но священникъёс кенешыса калыклэн кивалтӥсьёсынызы, сётӥзы возьмаськисьёслы тросс коньдон

¹³ но шуизы:"Вералэ, солэн дышетскисьёсыз, тӥ уйин кӧлыкуды, лыктӥзы но луӵказы.

¹⁴ Нош та ивор кивалтӥсь доры вуиз ке, ми сое оскытом но тӥледыз шуг секытъёслэсь мозмытом".

¹⁵ Соос, коньдон басьтыса, лэсьтӥзы озьы, кызьы дышетэмын вал.Та сярысь вераськон вӧлмиз иудейёс пӧлын но вуиз та дырозь.

¹⁶ Нош дас одиг дышетскисьёс мынӥзы Галилеяе, тубизы гурезе, кызьы соосты косӥз вал Иисус,

¹⁷ Сое адӟыса, йыбырттӥзы Солы, нош куд огез ӧз оске.

¹⁸ Но матэгес лыктыса, Иисус вераз соослы:" Инмын но музъем вылын но сётэмын Мыным котькыӵе кивалтон.

¹⁹ Но озьыен, мынэлэ но дышетэлэ вань калыкъёсты, крестить карыса Атайлэн, Пилэн но Святой Духлэн нимыз понна,

²⁰ дышетыса соосты быдэстыны ваньзэ, мае Мон косӥ тӥлед. Та бере, Мон тӥленыд луокотькуд нунал дунне бырытчёзь".