4

¹ Кытысь тӥляд керетонъёсты но вожвылъяськонъёсты? Сьӧлык лэсьтыны мылпотэмъёстылэсь ӧвӧл шат, кудъёсыз бугыръясько тӥ пушкын?

² Тӥледлы марке но кулэ но тӥляд со ӧвӧл. Вииськоды, вожъяськиськоды, нош басьтыны уд быгатӥське, соин ик вожвылъяськиськоды но керетӥськоды. Нош тӥляд ӧвӧл, уго тӥ уд куриське.

³ Куриськоды но тӥлед сётымтэ, уго ӟечлы уд куриське, нош куриськоды асьтэлэн сьӧлыко мылпотэмъёстылы.

⁴ Осконтэм калыкъёс! Тӥ уд шат тодӥське, дуннеен эшласькон - Инмарлы пумит нюръяськон? Озьыен кин эшлаське дуннеен, со луэ Инмарлэн тушмонэз.

⁵ Яке тӥ малпаськоды, Писаниеын токма гожтэмын:”Духэз, кудыз улэ ми пушкын, Инмар вожатчёзь яратэ”?

⁶ Нош Со сётӥз на асьмелы бадӟымгес благодать. Соин ик гожтэмын:” Инмар вылтӥяськисьёслы пумит, нош зибытъёслы сётэ благодатьсэ”.

⁷ Озьыен, сётӥське Инмарлы, султэ дьяволлы пумит, соку со пегӟёз тӥ дорысь.

⁸ Матэ кариське Инмар борды, соку Со но матэктоз тӥ доры. Сьӧлык лэсьтӥсьёс, миське киостэс. Сюзялэ сюлэмъёстэс, чеберъяськисьёс.

⁹ Чигиське, бӧрдэ но викышъялэ. Тӥляд серекъянды бӧрдонэн мед берытскоз, шумпотонды - куректонэн.

¹⁰ 10 Зибыт кариське Инмар азьын, соку Со тӥледды вылӥе пуктоз.

¹¹ Вынъёсы, ог огды сярысь урод эн вералэ. Кин вера выныз пумитэ яке сое судить каре, со Закон пумит вера но Законэз судить каре. Нош тон Законэз ке судить кариськод, соку тон Законэз быдэсъясь ӧвӧл ини, нош судья.

¹² Одӥг гинэ вань Законодатель но Судья но, Кудӥз быгатэ утьыны но быдтыны но. Нош тон кин сыӵе, судить кариськод мукетсэ?

¹³ Табере кылзиське тӥ, кин вера:” Туннэ яке ӵуказе мыномы кыӵе ке городэ, отын уломы одӥг ар, вузкаромы но узырмомы”.

¹⁴ Тӥ уд тодӥське мар луоз ӵуказе. Мар со тӥляд улонды? Бус, кудӥз кӧняке дырлы гинэ вуылэ но собере нош ик ыше.

¹⁵ Верантэм тӥледлы:” Улэп ке луимы но Инмар кулэ кариз ке, лэсьтомы сое но тае но”

¹⁶ нош тӥ ушъяськиськоды асьтэлэн бадӟымъяськеменыды. Котькыӵе сыӵе ушъяськон - ӟечлы уг вутты.

¹⁷ Озьыен, кин тодэ, кызьы ӟеч уж лэсьтыны, нош уг лэсьты - со сьӧлыкын улэ.