^{1 2} 1 Каш хонук эрткенде Иисус катап база Капернаумга келген. Ону улус бажыңында деп билип каан. 2 Ынчан эжик чоогунда безин кижи турар чер чок кылдыр хөй улус чыглып келген. Иисус оларга Өөрүнчүг Медээни чугаалап турган. ^{3 4} 3 Ол үеде аңаа чартыктаан кижини дөрт кижи көдүржүп эккелген. 4 Кижиниң хөйүнден эртер арга чок боорга, Иисустуң турган бажыңының дээвиирин адыргаш, чартыктаан кижизин чыткан дөжээ-биле катай Ооң мурнунче бадырып эккелген. ^{5 6 7} 5 Иисус оларның бүзүрелин көргеш: "Оглум, сээң бачыттарың өршээттинген-дир"- деп чартыктаан кижиге чугаалаан. 6 Аңаа олурган ном-хоойлу тайылбырлакчыларының чамдыызы мынча деп бодааннар: 7 "Чүге Ол Бурганны дорамчылап турарыл? Бургандан өске, кым бачыттарны өршээр эргелигил?" ^{8 9} 8 Иисус оларның бодалдарын Сүлдези-биле билип кааш: "Чүге чүректериңерде ынчаар бодап олурар силер?" 9 Чартыктаан кижиге чүү дизе экил?: "Бачыттарың өршээттинген-дир" -- дээри бе? Азы: "Тургаш, дөжээңни көдүрүп алгаш, кылашта" -- дээри бе? ^{10 11 12} 10 Ынчалза-даа Кижи амытан Оглу бо черге бачыттарны өршээр эргелиг деп билип алыңар" -- дээш, чартыктаан кижиге: 11 "Тургаш, дөжээңни көдүрүп алгаш, чана бер деп чугаалап тур мен"- дээн. 12 Ол кижи хамык улус көрүп турда, ол-ла дораан тургаш, дөжээн алгаш, үне берген. Шупту улус кайгап ханмайн, магадап: "Мындыг чүвени кажан-даа көрбээн бис"- дижип, Бурганны алдаржыдып турганнар. ^{13 14} 13 Иисус катап база далай эриинге барган. Ооң соондан чеде берген хөй чонну Ол аңаа өөредип турган. 14 Иисус орук ара үндүрүг хавырар черде олурар Алфейниң оглу Левийни көрүп кааш: "Мени эдерип чорувут!"- дээн. Левий тургаш, Ооң соондан чорупкан. ^{15 16} 15 Левийниң бажыңынга Иисус өөреникчилери-биле чемненип, дыштанып турда, Ону эдерген хөй улустуң аразынга үндүрүг хавырыкчылары болгаш бачыттыг улус база бар турган. 16 Иисустуң үндүрүг хавырыкчылары база бачыттыг улус-биле кады чемненип турарын ном-хоойлу тайылбырлакчылары болгаш фарисейлер көрүп кааш, Ооң өөреникчилеринден: "Ол чүге үндүрүг хавырыкчылары-биле база бачыттыглар-биле чемненип турарыл?"- деп айтырганнар. ¹⁷ 17 Иисус ону дыңнап кааш: "Эмчи кадык эвес, аарыг улуска херек. Мен "бачыт чок мен" дээр улусту эвес, а бачыттыг улусту өршээл алыры-биле кыйгырар дээш келген мен"- деп оларга чугаалаан. ^{18 19} 18 Иоанның өөреникчилери болгаш фарисейлер шээрленип турар үеде, чамдык улус: "Иоанның өөреникчилери болгаш фарисейлер шээрленип турда, Сээң өөреникчилериң чүге шээрленмейн турарыл"- деп, Иисустан айтырганнар. 19 Иисус оларга: "Кажан душтук оол чанында турда, Ооң өңнүктери канчап шээрленирил? Амдыызында душтук оол кады турда, олар шээрленмес. ^{20 21} 20 Кажан душтук оолду олардан чарып алгаш баарга, ынчан оларның шээрленир хүннери база келир. 21 Кым-даа эрги хепке чаа пөстен чамашкы салбас, чүге дээрге чаа чамашкы эрги хепти чыыра тыртыптар, а ойбак оон-даа улуг апаар. ²² 22 Кым-даа чаа дүшкен араганы, эрги көгээржикче кутпас. Чүге дээрге чаа арага көгээржикти деже тептер, ынчан арага-даа төктүп каар, көгээржик-даа сандан үнер. ^{23 24} 23 Бир-ле катап Иисус амыр-дыш хүнүнде тараа тараан шөлдү таварып эртип бар чыткан. Өөреникчилери тараа бажын ууштап чий бергеннер. 24 Ынчан фарисейлер: "Көрүңер, амыр-дыш хүнүнде кылбас ужурлуг чүүлдү олар чүге кылып турарларыл?"- деп, Иисустан айтырганнар. ^{25 26} 25 Иисус оларга: "Боду база кады чораан өөрлери аштай бергеш, Давид хаанның чүнү кылганын кажан-даа номчувааныңар ол бе? 26 Бурганның дээди бараалгакчызы Авиафар турган үеде, Давид хаан Бурганның өргээзинче киргеш, Бурганның бараалгакчыларындан өске кым-даа чивес ужурлуг ыдыктаан хлебти чигеш, кады чораан улузунга база берген болгай"- деп чугаалап берген. ^{27 28} 27 Оон ыңай: "Бурган кижини амыр-дыш хүнү дээш эвес, а амыр-дыш хүнүн кижи дээш чаяап каан. 28 Ынчангаш Кижи амытан Оглу - амыр-дыш хүнүнүң база Дээргизи-дир"- деп, Иисус немеп каан.