Он алдыгы эге
1
2
1 Амыр-дыш хүнү эрткенде, Мария Магдалина бичии Иаков биле Иосийниң авазы Мария база Саломия Иисустуң мага-бодун чаап каар дээш чаагай чыттыг үстер садып алганнар.
2 Олар неделяның бирги хүнүнде, эртен эрте, даң хаяазы чырып орда, чевег-куйже чорупкан.
3
4
3 Орук ара: "Чевег-куйнуң аксын дуглаан дашты кым биске чайладыр чууктап бээрил?- деп аразында чугаалажып чорааннар.
4 Чедип келгеш олар аажок улуг дашты кыдыынче чууктап каанын көрүп каан.
5
6
7
5 Чевег куйнуң иштинче кире бергеш, ооң оң талазында ак хеп кеткен аныяк оолдуң олурарын көрүп кааш, аажок кортканнар.
6 Ол оол: "Кортпаңар. Силер Назарет чурттуг, хере шаптырган Иисусту дилеп тур силер бе? Ол мында чок.
Ол дирлип келген!
Ооң чыткан чери бо-дур.
7 Ам баргаш Пётрга болгаш өске-даа өөреникчилерге: "Ооң силерге чугаалааны дег, Ол силерни мурнай Галилеяга чеде бээр. Ону аңаа көрүп каар силер"- деп дамчыдыңар"- дээн.
8
8 Олар шуут кайгап, чевег-куйдан үнгеш, кортканындан маңнажып чорупкан. Орук ара кымга-даа, чүнү-даа чугаалавааннар.
9
10
11
9 Неделяның бирги хүнүнүң даң бажында, Иисус катап дирлип келгеш, бир дугаарында, ынчан бир-ле чеди бугун үндүр сывырып бергени Мария Магдалинага көзүлген.
10 Ол оон чоруткаш, качыгдап ыглашкан, Иисус-биле кады чоруп турган улуска:
11 "Иисустуң дирлип келгенин көрдүм"- деп, Мария чугаалаарга, олар аңаа бүзүревээн.
12
13
12 Оон Иисус суур кирип бар чыткан ийи өөреникчизинге, өске хевир-биле ужурашкан.
13 Олар дедир эглип келгеш, арткан өөреникчилерге чугаалаарга, олар база бүзүревээн.
14
15
16
14 Ооң соонда Иисус он бир өөреникчизи чемненип олурда көстүп келгеш, Ооң дирлип келгенин көрген улуска бүзүревээннери дээш база ажык эвес чүректери дээш оларны чемелээн.
15 Оон оларга: "Бүгү делегейни эргий кезип, бүгү кижи төрелгетенге Өөрүнчүг Медээни суртаалдаңар.
16 Бүзүрей бергеш, сугга суктурар кижи камгалалды алыр, бүзүревес кижи -- шииттирип алыр.
17
18
17 Бурган бүзүрээн улусту дамчыштыр кайгамчык демдектерни көргүзер: Мээң адым-биле буктарны үндүр сывырар, өске дылдарга чугаалаар,"
18 чыланнарны тудуп алырга, оларны шакпас, хораннап каан чемни чиртиптерге, олар өлбес, аарыг кижиге холун дээртип алгаш мөргүүрге, ол сегип туруп кээр"- деп чугаалап берген.
19
20
19 Ооң соонда Дээрги Иисус дээрже көдүрлүп үнгеш, Ада Бурганның оң талазында саадап олуруп алган.
20 Иисустуң өөреникчилери тарай бергеш, барган черлеринге-ле Өөрүнчүг Медээни суртаалдап чораан. Каяа-даа, кайызы-даа суртаалдап чорда, Дээрги-Чаяакчы оларны деткип, бадыткал демдектерин көргүзүп берип турган.