Perempama tentang penabur ¹ Sekalik Yesus mulai ngajar de sisi danau. Urang mayuh datai ngelilingik Ya, nyuruh Ya sampai naik katau perau, lalu duduk lam yak, sidak bukai dedarat, desisi danau. ² Ya ngajar mayuh hal alam perempama ngau sidak. Alam pengajar Ya, Ya banai ngau sidak: ³ "Dinga! Bisik urang keluar rumah kak ngunsai. ⁴ Rama ya ngunsai, bisik benih jatuh desisi jalai, udek datai burung, demakai sampai abis. ⁵ Bisik te jatuk detanah te bebatu-batu, benih yak idup, empadai bisik tanah lipis. ⁶ Tapi pas matapanas tumuh, benih yak layus, empadai ndai sik akar. ⁷ Kedak jatuk de babas durik, durik yak makin besai, ngempik benih yak sampai mati, nyuruh ya ndai bebuah. ⁸ Kedak jatuk de tanah te baik, ya tumuh subur ngau bebuah, berasil tiga puluh kalik lipat, bisik te nam puluh kalik lipat, bisik te seratus kalik lipat." ⁹ Udek jekuh Ya: "Sapa te bisik pening, ya kalah ninga!" ¹⁰ Rama Ya tamai bala murid kedirik, sidak nanyak ngau Ya reti perempama tadik. ¹¹ Saut Ya: "Ngau kitak deberik ke resia kerajaan Allah, tapi ngau urang bukai, semua hal depadah alam perempama, ¹² isak ke: Sekalikpun medak, sidak ndai nangap, sekalikpun ninga, sidak ndai nyaruk, isak sidak ndai bebalik ngau bulih ampun." ¹³ Udek Ya banai ngau sidak: "Ndai nama kitak nyaruk ngau perempama tuk? Antik piak tipa kitak tau nyaruk perempama te bukai? ¹⁴ Pengunsai yak, ngunsai ke firman. ¹⁵ Urang-urang te desisi jalai yak tempat benih dunsai yak mek urang-urang te ninga firman, udek datai Iblis ngamik firman te baruk dunsai alam ati sidak. ¹⁶ Piak ugak te dunsai detanah te bebatu-batu, yak urang te ninga firman yak, nerimak ya ngau gaga, ¹⁷ tapi ndai berakar ngau tan sekejap na. Antik datai peninasan ngau keteridak empadai firman yak, sidak lansung murtad. ¹⁸ Te dunsai detengah babas durik, yak urang te ninga firman yak, ¹⁹ udek kegaduh denia tuk ngau tipu daya kekaya, ngau mayuh te kining, tamak ngempik firman yak sampai ndai bebuah. ²⁰ Udek te dunsai de tanah te baik, yak urang te ninga ngau nyamut firman yak, lalu bebuah, bisik te tiga puluh kalik lipat, bisik te nam puluh kalik lipat, ngau seratus kalik lipat." ²¹ Udek Yesus banai ngau sidak: "Urang ngemaik pelita bukai isak detaruh de babah gantang atau debabah peninuk, tapi detaruh datau kaki dian. ²² Empadai ndai sik utai te tepelabuk te ndai depadah, ndai sik te resia te ndai dungkap. ²³ Sapa te bepening, kalah ninga!" ²⁴ Jekuh Ya agik: "Cam ke nama te kitak dinga! Pengukur te kitak ngau ngukur, bakal dukur ke ngau kitak, udah yak detamah kagik ngau kitak. ²⁵ Empadai sapa te bisik, deberik kagik ngau ya, sapa te ndai bisik, mpu ya damik." ²⁶ Udek jekuh Yesus: "Upa tuk hal kerajaan Allah: Sempama urang te ngunsai benih de tanah, ²⁷ rama malam ari ya tinuk, teruas lawas ari, benih yak belantang, lantang e makin tingik, ngau cara te ndai deketau. ²⁸ Tanah ngeluar ke buah, peruba tangkai, udek igik, udek igik yak penuh terisik ²⁹ Antik buah yak dah besuh, urang siap-siap nyabit, empadai rama nyetam dah datai." ³⁰ Jekuh Ya agik: "Ngau nama gik kita baning ke kerajaan Allah yak, atau ngau perempama ni agik kita ngamar ke yak? ³¹ Hal kerajaan Allah yak sempama igik sesawi te dunsai detanah. Sesawi yaak igik te palin mit re semua jenis benih de bumi. ³² Tapi antik dunsai, ya tumuh ngau jadi lebih besai re semua jenis pakuk, ngeluar ke cabang-cabang te besai, nyuruh burung-burung tau besarang diak." ³³ Ya madah ke firman ngau mayuh perempama te upa yak sesuai ngau penumut sidak, ³⁴ ndai ngau perempama Ya ndai banai ngau sidak, tapi ngau bala murid, ya ngurai ke semua utai. ³⁵ Ari yak, dah babah ari, Yesus banai ngau sidak: "Buh kita angkat ke seberang." ³⁶ Sidak nulaka ke urang mayuh diyak, ngemaik Yesus ngau sidak seperau ke seberang, sdeserta perau-perau bukai. ³⁷ Udek ribut kayah, gelumang nyemur tamaka kalam perau, nyuruh perau yak mulai penuh ngau aik. ³⁸ Rama yak Yesus tinuk dubuntut perau. Bala murid neguk Ya, jekuh sidak: "Guru, Nuan ndai peduli antik kita benasa?" ³⁹ Ya angkat, ngelai ribut yak, banai ngau danau: "Nugau! manuh!" Ribut baduk, danau jadi tenang benar. ⁴⁰ Udek ya banai ngau sidak: "Nama kitak takut bebenar? Nama kitak ndai pecayak?" ⁴¹ Sidak jadi takut ngau banai samaa direk: "Sapa mensia tuk, sampai angin ribut pun nunak te jekuh Ya?"