Urang lumpuh desemuh ke ¹ Dah ngilah dua tiga ari, rama Yesus datai agik ke Kaapernaum, tesiar kabar kalau Ya bisik derumah. ² Maka uraang mayuh bekerumun datai kiak, nyuruh ndai sik pengkerang agik, penuh sampai kemua lawang. Ketengah Ya madah ke firman ngau sidak, ³ sidak datai ngemaik urang lumpuh ngau Ya, detangkun empat urang. ⁴ Tapi sidak ndai dapat ngemaik ngau Ya empadai urang mayuh, udek sidak mukak atap datau Ya; dah tebukak, sidak nurun ke tilan te ngau ya galai. ⁵ Rama Yesus medak iman sidak, Ya banai ngau urang te lumpuh yak: "Ui anakKu, dosa dirik dah dampun!" ⁶ Tapi diyak bisik ugak duduk ahli Taurat, sidak bepikir alam ati: ⁷ "Nama mensia tuk banai miak? Ya ngujat Allah. Sapa te tau ngampun dusa selain re Aallah?" ⁸ Tapi Yesus lansung ketau sidak bepikir piyak alam ati, udek Ya banai ngau sidak: "Nama kitak bepikir piak alam ati kitak?" ⁹ Ni palin mudah, madah ngau urang lumpuh tuk: Dosa dirik dah dampun, atau madah: Angkat, katung tilam ngau bejalai? ¹⁰ Tapi isak kitak ketau, kalau de denia tuk Anak Mensia bekuasa ngampun dusa" - Ya banai ngau urang lumpuh yak - : ¹¹ "Ngau dirik Ku padah, angkat, katung tilam, pulai kerumah!" ¹² Mensia ayak lansung angkat, ngatung tilam, angkat keluar dadap urang mayuh, nyak nyuruh sidak tebelenga, lalu memulia ke Allah, jekuh sidak: "Te upa tuk pan suah kita pedak." ¹³ Udah yak Yesus angkat agik ke pantai danau, mayuh urang datai ngau Ya, lalu Ya ngajar sidak. ¹⁴ Rama sidak bejalai ngelalu diyak, Ya medak Lewi anak Alfeus duduk derumah cukai, lalu Ya banai ngau ya: "Buh tamai Aku!" Maka Lewi bediri lalu tamai Ya. ¹⁵ Udah yak, rama Yesus ketengah makai derumah urang yak, mayuh pemungut cukai ngau urang bedoa tamai Ya ngau murid-murid Ya makai, empadai mayuh urang te tamai Ya. ¹⁶ Rama ahli Taurat ngau urang Farisi medak Ya makai tamai pemungut cukai ngau urang bedusa, sidak banai ngau murid-murid Ya: "Nama Ya makai tamai pemungut cukai ngau urang bedusa?" ¹⁷ Yesus ninga lalu banai ngau sidak: "Bukai urang sehat te merlu ke tabib tapi urang pedih; Aku datai bukai untuk ngumai urang benar, tapi urang bedusa." ¹⁸ Bisik sekalik rama murid-murid Yohanes ngau urang-urang Farisi ketengah puasa, datai bala urang banai ngau Yesus: "Nama murid-murid Yohanes ngau murid-murid urang Farisi bepuasa, tapi murid dirik ndai?" ¹⁹ Saut Yesus ngau sidak: "Tau kah kaban-kaban mempelai bakas bepuasa ketengah mempelai bakas yak tamai sidak? Selamak mempelai yak tamai sidak, sidak ndai tau bepuasa. ²⁰ Tapi bisik masa mempelai yak damik re sidak, rama yaak mek sidak bepuasa. ²¹ Ndai sik urang nambal ke kain te pan susut ke baju te tuai, empadai antik piyak, kain penamal bakal ngeridang kain te tuai, lalu makin besai terindang. ²² Piak ugak, ndai sik urang te ngisik anggur baru kalam kantung kulit te tuai, empadai antik piyak, anggur yak ngerinsak kantung yak, nyuruh anggur ngau kantung sama-sama tebuai. Tapi anggur te baru kalah detaruh alam kantung te baru ugak." ²³ Sekalik, rama ari Sabat, Yesus bejalai duma genum, ketengah bejalai, bala murid Ya mutik genum. ²⁴ Mungkak jekuh urang Farisi ngau Ya: "Medak, nama sidak mulah te ndai desagi pada ari Sabat?" ²⁵ Saut Ya ngau sidak: "Pan suah kitak maca nama, te depulah Daud rama ya tamai sidak te tamai ya lepik, ²⁶ tipa ya tamak ke Rumah Allah rama Abyatar nyabat sebagai Imam besai lalu makai ruti perentang - te ndai tau demakai kecuali imam-imam - merik ke ngau bala te tamai ya ugak?" ²⁷ Jekuh Yesus ngau sidak: "Ari Sabat depulah untuk mensia, bukai mensia untuk ari Sabat, ²⁸ jadi Anak Mensia yak Tuhan atas ari Sabat."