Yohanes Pemanik ¹ Tuk peruba Injil tentang Yesus Kristus, Anak Allah. ² Upa bisik tetulis alam kitab nabi Yesaya: "Pedak, Aku nyuruh utusanKu ngenulau Mih, ya bakal nyiap ke jalai bagi Mih; ³ bisik ingan urang te mukau ngangau de padang pasir (padang gurun): Siap ke jalai untuk Tuhan, lurus ke jalai bagi Ya", ⁴ upa ayak mek Yohanes Pemanik tampil de padang gurun ngau nyeru: "Betobat me, berik ke dirik kitak depanik, isak Allah ngampun dosa kitak." ⁵ Udek datai ngau ya kiyak seluruh daerah Yudea ngau semua penuduk Yerusalem, samil ngakuk dosa, sidak depanik de sungai Yordan. ⁶ Yohanes ngau jubah bulu unta, ngau ketang pungung kulit, pemakai ya buntak ngau madu rimak. ⁷ Tuk mek te depadah ke ya: " Se udah aku, bakal datai Ya te lebih bekuasa repada aku; ngemungkuk ngau ngelecut tali sanai Ya pun aku ndai pantas. ⁸ Aku manik kitak ngau aik, tapi Ya manik kitak ngau Roh Kudus." ⁹ Rama yak datai Yesus re Nazaret de tanah Galilea, udek Ya depanik de sungai Yordan ulih Yohanes. ¹⁰ rama Ya ncanguk re aik, ya medak langit terinsak, ngau Roh upa burung merpati turun katau Ya. ¹¹ Udek tedinga ingan re surga: "Mih mek AnakKu te kukasih, ngau Mih mek Aku bekenan." ¹² Udah yak Roh mimpin Ya ke padang gurun. ¹³ De padang gurun yak, Ya nugau selamak empat puluh ari, decuba Iblis. Ya nugau din dentara bala benatang sigak ngau malaikat-malaikat ngelayan Ya. ¹⁴ Seudah Yohanes detangkap, Yesus datai ke Galilea madah ke Injil Allah, ¹⁵ jekuh Ya: "Waktu dah genap; Kerajaan Allah dah damping. Betobat ngau pecayak ke ngau Injil!" ¹⁶ Rama Yesus ketengah bejalai de danau Galilea, Ya medak sedua nyadik Simon ngau Andreas. Sidak ketengah nyempalung jala de danau, empadai sidak penyala ikan. ¹⁷ Yesus banai ngau sidak: "Buh tamai Aku, kitak kak Kujadi ke penyala mensia." ¹⁸ Seklin yak sidak nudi ke jala, udek tamai Ya. ¹⁹ Udek Yesus bejalai sikit, depedak Ya sedua nyadik Yakobus ngau Yohanes anak-anak Zebedeus, ketengah ngapis jala alam perau. ²⁰ Yesus sigat ngumai sidak, sidak lansung nudi te apai sidak Zebedeus alam perau tamai bala anak buah, sidak lalu tamai Yesus. ²¹ Sidak datai de Kapernaum. Ari Sabat daah mulai, Yesus tamak kalam rumah ibadat ngau ngajar. ²² Sidak tebelenga ninga pengajar Ya, empadai Ya ngajar ngau kuasa, ndai upa bala ahli-ahli Taurat. ²³ Rama yak, derumah ibadat bisik urang te kesarung sitan, ya menciak: ²⁴ "Nama urus Mih ngau kami, Yesus urang Nazaret? Mih datai kak nyelaka ke kami? Aku ketau sapa Mih: Te Kudus re Allah." ²⁵ Tapi Yesus ngerara (menghardik), jekuh Ya: "Sunyik, keluar re ya!" ²⁶ Roh jaik nguyu mensia yak, samil menciak ngau ingan kayah ya keluar re mensia yak. ²⁷ Sidak diyak iran semua, samil banai, jekuh sidak: "Nama tuk? pelajar baru. Ia banai ngau kuasa. Roh te jaik pun nunak te jekuh Ya." ²⁸ Udek berita tentang Ya tesebar sekamar Galilea. ²⁹ Keluar re rumah ibadat yak Yesus tamai Yakobus sedua Yohanes angkat ke langkau Simon sedua Andreas. ³⁰ Mentua inuk Simon ketengah galai tabin. Sidak lansung madah ke peniau ya ngau Yesus. ³¹ Ya nguang inuk yak, megai jari ya, neguk ya, ngayap ke tabin ya. Udek inuk yak ngelayan sidak. ³² Kak malam, mata panas dah kak tengelam, bala urang te pedih ngau te kesarung sitan debaik ngau Yesus. ³³ Maka urang begerumung demua lawang. ³⁴ Ya nyemuh ke urang te kenak mayuh macam pemedih, ngau ngusir sitan; Ya ndai nyagi sitan-sitan banai, empadai sidak ngelala Ya. ³⁵ Lam kenyung begayap, gik keleman, Ya teruas, angkat keluar. Ya angkat re te sunyik, bedoa din. ³⁶ Tapi Simon ngau bala kaban-kaban ya nurut penudi; ³⁷ Rama sidak nemu Ya, sidak banai: "Semua urang ngegak Nuan." ³⁸ Saut Ya: "Buh kita angkat ke tempat bukai, ke kuta-kuta te bekedamping, isak din aku tau madah Injil, empadai untuk yak mek Aku datai." ³⁹ Udek Ya angkat ke sekamat Galilea, madah ke Injil alam rumah ibadat ngau ngusir sitan-sitan. ⁴⁰ Urang te pedih kusta datai ngau Yesus, mintak muhun samil belutut demua Ya, jekuh ya: "Antik Nuan kak, Nuan tau nyemuh ke aku." ⁴¹ Udek tegerak ati Yesus ngau belas kasih, Ya ngulur ke jari Ya, nyapai urang yak, lalu banai: "Aku kak, tahir nuan pituk." ⁴² penyakit kusta mensia yak semuh sekelin yak. ⁴³ Sigat ya nyuruh mensia yak angkat, ngau depadah bebuti: ⁴⁴ Kingat ke, nang madah sapa-sapa tentanaga hal tuk, taapi padah ke ngau imam, berik persembahan te deperintah ke Musa sebagai bukti bagi sidak." ⁴⁵ Tapi mensia yak angkat madah kin kituk, nyak nyuruh Yesus ndai tau lagik terang-terangan taamak kalam kuta. Ya nugau de tempat te sunyik; tapi urang datai seruntik ngau Ya re semua penyuru.