Dusa empadai dilah ¹ Bala menyadik, dentara kitak nang mayuh te jadi guru, empadai kita ketau, sebagai guru kita bakal dakim nunak ukuran te lebih berat. ² Empadai kita semua besalah alam mayuh hal; barangsapa ndai besalah alam anai tutur ya, ya urang te sempurna te mampu ngendalikan seluruh tubuh ya. ³ Kita ngelekat ke kekang ke mulut kuda, nyak nyuruh ya nunak nama te kedekak kita, ngau upa yak kita tau ngendali ke seluruh tubuh ya. ⁴ Pedak kapal-kapal te besai, degerak ke ribut kayah, tapi tau dekemudi ke urang te mit sesuai penekak ya. ⁵ Upa yak ugak dilah, walaupun ya mit ari bagian tubuh bukai, ya tau memegah ke pekara-pekara te besai. Pedak api, walaupun ya mit, ya tau nunu rimak te besai. ⁶ Dilah pun api; ya yak denia kejahatan, ngamik tempat dentara anggota tubuh kita, utai te tau menodai seluruh tubuh, ngidup ke roda kehidupan kita, sedang ke ya dipidup ulih api neraka. ⁷ Semua jenis benatang liar, burung-burung, bala benatang ngelantar, benatang laut, tau ngau udah dejinak ke mensia, ⁸ Tapi ndaia sik urang te bekuasa nyinak ke dilah; ya buas, ndai mampu dekuasa, penuh racun te nyuruh mati. ⁹ NGau dilah kita muji Tuhan Apai kita, ngau dilah kita ngutuk mensia te depulah nunak rupa Allah, ¹⁰ ari mulut te sutik keluar berkat ngau kutuk. Hal upa yak ndai tau tejadi, bala menyadik. ¹¹ Bisik ndai mata aik mancak ke air tabar ngau aik pait re mata aik te sutik? ¹² Bala menyadik, bisik pun ara ngasil ke buah zaitun, ngau pun anggur ngasil ke ara? Upa yak ugak mata aik masin ndai tau ngeluar ke aik tabar. ¹³ Sapa dentara kitak te bijak ngau bebudi? Ngau cara idup te baik, ya nyata ke pempulah ya ulih hikmat te lahir ari kelemahlembutan. ¹⁴ Antik kitak bisik naruh perasai iri ngau kitak menting ke dirik kedirik, nang kitak megah ke dirik, nang bedusta ngelawan kebenaran! ¹⁵ Yak bukai hikmat te datai ratau, yak ari denia, ari nafsu mensia, ari sitan-sitan. ¹⁶ Empadai dini bisik iri hati ngau menting ke dirik kedirik, diak bisik kacau ngau semua pempulah jaik. ¹⁷ Tapi hikmat te ratau pertama-tama murni, udek pendamai, peramah, penurut, penuh belas kasih ngau buah-buah te baik, ndai mangan ngau ndai munafik. ¹⁸ Buah re kebenaran detabur kalam damai untuk sidak te ngada ke damai.