Nang ngupuk mua ¹ Bala menyadik, sebagai urang te beriman ngau Yesus Kristus, Tuhan kita te mulia, nang iman yak kitak amal ke ngau npuk mua. ² Antik bisik urang tamak kalam kumpulan kitak, mengau cincin mas, bepengau baik, udek bisik ugak urang meskin ngau pengau jaik, ³ kitak lalu ngehurmat urang te bepengau baik yak, lalu banai ngau ya: "Duduk kituk nuan, re pengkerang te baik!" sedang ngau uraang meskin kitak banai: "Bediri din!" atau " Duduk de lantai damping penijak aku!" ⁴ Ndai mek kitak udah ngebida ke sidak alam ati, ngau betin'ak jadi hakim ngau pemikir te jaik? ⁵ Dinga ke, u bala menyadik te kukasih! Ndai mek Allah milih urang-urang te dangap miskin ulih denia tuk untuk jadi kaya alam iman, ngau nyadi ke ahli waris kerajaan te udah dejanyi ke Ya ngau barangsapa te ngasih Ya? ⁶ Tapi kitak dah ngehina urang meskin. Bukai mek urang kaya te ninas kitak, ngirit kitak ke pengadilan? ⁷ Bukai kah sidak te ngujat nama te mulia, te empadai Ya kitak jadi empu Allah? ⁸ Tapi kalau kitak nyalai ke ukum pertama alam kitab suci: "Kasih ngau urang upa kasih kedririk", kitak mulah te baik. ⁹ Tapi antik kitak medak mua, kitak mulah dusa, ulih ukum yak jadi nyata, kitak ngelangar. ¹⁰ Empadai barangsapa te nunak semua ukum yak, tapi ngabai ke salah sutik re ukum yak, ya besalah ngau teradap seluruh nyak. ¹¹ Empadai Ya te madah: "Nang bejinah", Ya madah ugak: "Nang munuh". Jadi antik kitak ndai bejinah tapi munuh, maka kitak jadi pelangar ukum ugak. ¹² Banai serta ngau kerja upa urang-urang te bakal dakim ulih hakim te memerdeka ke urang. ¹³ Empadai pengakiman te ndai bebelas kasih belaku ngau urang te ndai bebelas kasih. Tapi belas kasih bakal menang atau pengakiman. ¹⁴ Nama guna antik urang madah ya bisik iman, tapi ya ndai sik pempulah? Tau mek iman yak nyelamat ke ya? ¹⁵ Antik bisik urang te kurang pengau ngau pemakai, ¹⁶ surang dentara kitak banai: "Selamat jalai, pengau ke kain panas, ngau makai sampai kenyang!" , tapi ya ndai sik merik ngau ya nama deperlu, nama guna? ¹⁷ Upa yak ugak ngau iman: Antik iman ndai deserta ngau pempulah, maka iman yak mati. ¹⁸ Tapi amang bisik urang banai: "Entang kitak bisik iman, entang aku bisik pempulah", aku kak nyaut ya: "Tunyuk ke ngau aku iman te ndai sik pempulah, udek baruk ku nunyuk iman ku te sederta ngau pempulah." ¹⁹ Kitak pecayak bahwa hanya bisik surang na Allah? Yak baik! Tapi bala sitan sik pecayak ugak, ngau sidak begetar. ²⁰ Hai mensia bebal, kak ndai pituk kitak ngakuk, kalau iman ndai deserta pempulah adalah puang? ²¹ Ndai mek Abraham apai kita debenar ke empadai pempulah-pempulah ya, rama mempesemah ke Ishak anak ya datau mezbah? ²² Kitak medak, iman bekerjasama ngau pempulah-pempulah, ulih bala pempulah yak iman jadi sempurna. ²³ Ngau jalai piyak genap nas te madah: "Udek Abraham pecayak ngau Allah, maka Allah ngitung hal yak sebagai kebenaran." Maka Abraham dejenang: "Kaban Allah." ²⁴ Jadi, kitaka medak, mensia debenaar ke empadai pempulah ya bukai empadai iman. ²⁵ Ndai kah Rahab, pelacur, upa yak ugak, debenar ke empadai pempulah-pempulah ya, empadai ya ngelabuk urang te desuruh yak alam rumah ya, lalu nulung sidak lulus keluar re jalai bukai? ²⁶ Empadai upa tubuh ndai sik roh adalah mati, upa yak ugak iman ndai sik pempulah adalah mati.