Penuh ke kumai pelayanan ¹ Dadap Allah ngau Yesus Kristus te udah ngakim urang idup ngau urang mati, aku bepesan bebenar ngau mih demi penyataan ngau Kerajaan Ya: ² Padah ke firman, siap sedia, baik ngau ndai baik waktu ya, nyata ke nama te salah, rara, nasihati ngan penyabar alam pengajaran. ³ Empadai bisik masa urang ndai dapat nerimak ajaran sehat, tapi sidak ngumpul ke guru-guru sepenekak ati sidak, untuk muas ke pening sidak. ⁴ Sidak malik ke pening sidak re te benar untuk ninga engkana. ⁵ Tapi kuasai dirik alam semua hal, sabar alam penisa, kerja ke madah Injil ngau tunai ke tugas ngelayan! ⁶ Ngenang ke aku, darahku dah mulai kak detumpah sebagai pesembahan ngau pematiku dah damping. ⁷ Aku dah betemuk petaning ngau baik, aku dah datai ke garis pengabis, ngau aku nyaga iman. ⁸ Pituk dah siap bagi aku mahkota kebenaran te deberik ke Tuhan ngau aku, hakim te adil, rama ari Ya: tapi bukai cuma ngau aku, tapi semua urang te gauk ngau penatai-Ya. ⁹ Berusaha sigat datai ngau aku, ¹⁰ empadai Demas cinta ngau denia, ngau nudi ke aku. Ya dah angkat ke Tesalonika. Kreskes dah angkat ke Galatia, Titus, Dalmatia. ¹¹ Cuma lukas te dudi tamai aku. Amik Markus baik ya kituk, empadai pelayanan ya penting bagi aku. ¹² Tikhikus dah kukirim ke Efesus. ¹³ Antik mih kituk, baik ugak jubah te kududi de Troas de rumah Karpus ngau kitab-kitab aku, terutama perkamen. (perkamen; bahasa alkitab). ¹⁴ Aleksander, tukang temaga yak, ya mayuh mulah pengenyaik ngau aku. Isak Tuhan malas pempulah ya. ¹⁵ Mih kalah waspada ugak ngau ya, empadai ya nentang ajaran kita. ¹⁶ Rama pembelaan aku te peruba, ndai sik uranag te nulung aku, semua nudi ke aku-tapi semua yak ndai sah detangung ke ngau sidak-, ¹⁷ Tapi Tuhan dah ngaban aku, nguat ke aku, isak ngelalu aku Injil depadah ngau penuh, ngau urang bukai Yahudi ninga ke yak. Ngau upa yak aku lepas re mulut singa. ¹⁸ Tuhan bakal ngelepas ke aku re semua usaha jaik. Ya nyelamat ke aku, nyak nyuruh aku tamak kalam keraajaan Ya de surga. Bagi Ya mek kemuliaan selama-lamanya! Amin. ¹⁹ Salam ngau Priska, Akwila, ngau menyanak Onesiforus. ²⁰ Erastus dudi de Korintus, ngau Trofimus kududi ketengah pedih de Miletus. ²¹ Berusaha me kituk sapan musim celap. Salam re Ebulus, Pudes, Linus, ngau Klaudia ngau semua menyadik. ²² Tuhan nyereta roh mih. Kasih karunia nyereta mih!