Keadaan mensia de pengabis zaman ¹ Ketau ke rama ari pengabis, datai masa2 mar. ² Mensia lebih sayang ngau dirik ngau jadi hamba duit, sidak ngampur, nyumung ke dirik, tugam nyangkak urang, meruntak ngau urangtuai, ndai numut beterimak kasih, ndai peduli ke agama, ³ ndai numut ngasih, ndak kak bedamai, rajin bejaik urang, ndai kak ngekang dirik, garang, ndai rajin te baik, ⁴ tugam behianat, ndai bepikir panyai, belagak ketau, lebih nunak ke hawa nafsu repada nunak Allah. ⁵ Secara lahiriah sidak nyalai ke ibadah, tapi sebenar sidak ngemungkir yak. Tangkis ke sidak yak! ⁶ Empadai dentara sidak bisik te kaak nyelunup ke rumah urang, nyerat bala inuk lemah te sarat ngau dosa, ngau dekuasa bemacam ragam hawa nafsu, ⁷ te tunak kak dajar tapi ndai kak ngelala kebenaran. ⁸ Upa Yanes ngau Yambres nentang Musa, upa yak ugak sidak nentang kebenaran. Akal sidak repuk, ngau iman sidak ndai tau uji. ⁹ Tapi pasti sidak ndai bakal lebih maju, upa alam hal Yanes sedua Yanbres, budu sidak nyata bagi semua urang. ¹⁰ Tapi mih dah nunak pengajarku, cara idupku, imanku, kesabaranku, kasih ngau perajinku. ¹¹ MIh dah tamai sisa upa te suah kuasai de Antiokhia ngau de Ikonium ngau de Listra. Semua yak kukelalu ngau Tuhan dah ngelepas ke aku re semua yak. ¹² Mimang setiap urang te kak idup beribadah alam Yesus Kristus bakal sisa keteridak, ¹³ sedangke urang jaik, penitu, bakal betamah jaik, sidak nyesat ngau desesat. ¹⁴ Tapi mih kalah bepegai ngau kebenaran, te udah mih terimak ngau mih yakin, ngau kingat ke urang te dah ngajar ke yak ngau mih. ¹⁵ Ingat ke ugak mulai re gik mit, mih dah ngelala Kitab Suci, te merik hikmat ngau mih, ngiring mih ngau keselamatan ulih iman ngau Yesus Kristus. ¹⁶ Semua tulisan te deilham ke Allah mimang beguna ngau ngajar, madah ke tesalah, nyemaik pempulah, ngau nidik urang te benar. ¹⁷ Ngau upa yak, tiap-tiap mensia empu Allah depelengkap ngau setiap pempulah baik.