¹ Ariòwòdỹỹnykre waatena itxesedu kiata ariraòkre ywihikỹmy aõmybo Deuxu kanarybekre kia timy waixira rybe kidirawyònykre. ² kia Deuxu tyhyhykỹ rarybere: “Taba-ò biritinyke kaa tuu arue-di bobikre, biritinykre itỹnytyhymy aõbo adee ariteòsinykre, kia rira irutaõlemy rỹikremy. ³ Kia tamy bede rehemynyõlemy ratxireri tiu bedeu òbitimy rỹikre-ò kia tuu tabite rỹikremy; kiaremyta tii tikiemy tuu bede rutỹỹnykre. Bede òbitihyylemy ioholemy edehemynykre; kiaremyta biraõkre, aõhe-wana Urihimyòmy raroorehenykre, kia tuu tabite tanonana òbitiu kanakre. ⁴ Kaa heka rybe wahina rare: Iny binabina mahãdu heka imynydureny ihoõrenykre, ka iny mahãdu òbitimy rỹimyhỹrenyrele tahe ratxirenykre Deuxu rityhynymy rỹimyhỹrenyre-ki.” ⁵ Uriki inatyhymy iny ityhymy iaõdimy rỹimyhỹre ròbòdỹỹmyhỹre, iny mahãdu ixityhytyhydỹỹluurenyre tiu awimy ywimy ratxirenyke ihoõre. Ibòdỹỹnareny heka ikonanaõhyyrenyre. Tii boho awityhymy ratxirenyõhyymyhỹrenyre: “rubu bedereny wesemy, ikiemy ixyby tuu rekoamyhỹrenyre. ⁶ -Ka iny mahãdu ramymy ratximyhỹrenyre tahe babilônio boho deramy rekoamyhỹrenyre kia idireny risinymyhỹrenyre myy raryberenymy: “Uri kai boho aaõnadirenymy aityhyrenymy atxitenyte kia aaõnaõnareny aõkõ temymyhỹtenyte! Tiubo tahe maityhynybenykre kia adewedỹỹdureny-di tesỹnymyhỹtenyte araòwynyrenykremy ?” ⁷ Timykibo kai bohole, babilônio boho dewed:yỹdumy manatxidenyke; taita tedewenymyhỹtenyte mahãdu adireny rarurunyrenykre adewedỹỹnareny biòwynybenykremy ixiratyrerenymy. Tii boho ymyreny raòhòterenykre, kai boho tahe ilaureny buberubenykre; tii boho ibutumy riwyrenykre aõbo ahõrõrenyrereny-di. ⁸ Kai boho tewasinytenyte iwitxira hãwa hãwa tyhynareny sõemy, ka tahe wiji tii boho iyrybutyhyle adeereny riwinykre. Kai boho teerenytenyte biòwynybenykre kia aõbinabina tewinytenyte iny mahãdu hãwa hãwamy rỹimyhỹrenyre òludurenymy kia tai hãwadureny òludumy. ⁹ Uri kai babilônio binahãkỹ, kia aheto tetỹxinyte kia iny witxirareny-ribi tewasinytenyte! Idi heka kai bexiwomy bexiijekremyre aõnaõna òhãruna-ribi kia aòludureny mahãdu-ribi mahenybenykemy. ¹⁰ Ka abededỹỹnanareny heka ixyrumy adeereny tiwyde ahãwyy boho dee ariòrereny boho deereny, kia sõemy iny mahãdu tehutenyte òraruki, kai òbitile heka aumy iòhãrumy tesỹnyte. ¹¹ -Kia heto weti mana sõe dorile kia hetoti òwòru dorile rirajuarenyre aòludurenymy! ¹² Uri kai, kia ahãwa tewinyte rubudỹỹ su mahãdu tyre kia aõbinabina-di! ¹³ -Ibutumy aõmysỹdỹỹ rurutere iny mahãdu riwinyrenyre kia kai temyte aõmy adee aõki awiõhyykre, kia tii boho riwinyrenyre kia heòty ritoonykre. Kia Deuxu Tyhyhykỹ, Ibutumy Tabedeery rurutere-di kia tuu riwinyre. ¹⁴ -Kia suu tahe sõemy tỹximy roikre Deuxu wihikỹ erydỹỹnana-di, iwese bee ritỹxinymyhỹre wese bero nihikỹ sa-my bero. ¹⁵ Uri kai, kia tewahinymyhỹte abiòwa dee mona besò (vinho) itxỹtena rati-di teurinymy! Tii raõdewàrimyhỹre, tatyy ritamyhỹre, kia ibutumy tuu robimyhỹrenyre tademy. ¹⁶ -Kia kai heka biinodỹỹnykre atyhydỹỹnana kia maixỹru niihikỹmy matxikre. Kiemy dori Deuxu Tyhyhykỹ aramonykre takyaranahãkỹ bedeò-di, kiata kai tule aòde rawàrinylekre. Kia kai aõwiwihikỹ bimykewihikỹ, kai urile umy dòò rỹikre. ¹⁷ -Kai tehute Libano hãwalò bederaderade; ka tahe wiji rexihukre,; kai iròdu iròdu terubunyte kia ka tahe wiji kai ilaureny buberukre. Kia heka tuu adee rutỹỹnykre aleeryna òraruki kia aõbinabina kai tewinyte òraruki iny mahãdu òludumy kia ihãwa hãwareny òludumy. ¹⁸ Aõbo tahe tai ityhydỹỹnare ỹnyxiwe òtaòta su ritxoo? ỹnyxiwe heka hãbu su ritxoo òwòru ritxoo riwinymyhỹre ratyre aõkõ rare kia heka iny mahãdu bòdỹỹdukile awire. Su ritxoo, òwòru ritxoo heka raryberenyke aõkõre; timybo tahe inyõ rityhynyke su ritxoo kia tii òbitile riwinyreny-ò? ¹⁹ -Uri kai, tarybete òwòru ritxoo tyhydỹỹna raremy: “Bexieke!” aõmybo tahe rarybere mana ritxoo tyhydỹỹnana: “Làmamy myide!” Mana ritxoo tyhydỹỹnana aõbo aõ rybe riwahinyke? Kõre, aõkõhyyre. Tii heka rahetymy roireri mana r:ysỹhỹkỹ-ki kia mana rỹsỹ òtaòta-di, kia tahe aõ rubukrehekỹle rare. ²⁰ Deuxu Tyhyhykỹ taheto tyhyhyk:y-ki ratxireri, kia ibutumy rybeõmy ratximyhỹrenyre iruki.